კონკურენციისა და მომხმარებლის დაცვის სააგენტოს თავმჯდომარის განმარტებით, სააგენტო მომხმარებელთა უფლებების დაცვას 2022 წლიდან ახორციელებს, თუმცა ბოლო წლები მომართვიანობის მაჩვენებელი საგრძნობლად გაიზარდა, რაც პირდაპირ უკავშირდება როგორც საზოგადოებრივი ცნობიერების ამაღლებას, ისე ონლაინ ვაჭრობის დინამიურ განვითარებას, რომელსაც ბუნებრივად ახლავს მომხმარებელთა პრეტენზიების მატება. ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას ირაკლი ლექვინაძემ აღნიშნა, რომ სააგენტოს გადაწყვეტილებების დაახლოებით 90% მომხმარებელთა სასარგებლოდ წყდება, აღნიშნული გარემოება კი უწყების მიმართ ნდობას მნიშვნელოვნად ზრდის.

ირაკლი ლექვინაძის განცხადებით, სააგენტოს აქტიური ჩართულობის შედეგად, მომხმარებლები წლიურ ჭრილში, ჯამურად, ერთ მილიონ ლარამდე ფინანსურ სარგებელს იღებენ. ეს მაჩვენებელი ხაზს უსვამს უწყების ეფექტიანობასა და მის როლს მოქალაქეთა ეკონომიკური ინტერესების დაცვის პროცესში.

„კონკურენციისა და მომხმარებლის დაცვის სააგენტო უკვე 2022 წლიდან აღასრულებს ამ ფუნქციას, რასაც მომხმარებელთა უფლებების დაცვა ჰქვია. ბოლო წელი გამორჩეულია იმით, რომ თითქმის გაორმაგებულია მაჩვენებელი მომხმარებელთა მომართვიანობის. ეს ერთის მხრივ უკავშირდება იმას, რომ ცნობიერება უფრო გაზრდილია და უფრო მეტმა იცის საკუთარი უფლებების შესახებ. მეორე არის ის, რომ ზოგადად ვაჭრობის სფერო და ონლაინ ვაჭრობის სფერო საკმაოდ დინამიურად მზარდია და ზრდასთან ერთად ბუნებრივია იზრდება ის საკითხები რაც შეიძლება გარკვეულ პრობლემატიკას თუ მომხმარებლის პრეტენზიას უკავშირდებოდეს მოვაჭრის მიმართ. მე ვფიქრობ ასევე ჩვენი გადაწყვეტილებების უმრავლესობა, დაახლოებით 90% წყდება მომხმარებლის სასარგებლოდ და თვითონ მომხმარებელი ჰყვება შემდგომ თავის წრეში იმ გამოცდილების შესახებ, რომელიც ჰქონდა ჩვენს უწყებასთან და ესეც ვფიქრობ რომ ერთგვარი ნდობის ზრდის შედეგიც არის, იმიტომ რომ ალტერნატივა თუ აქვს მოვაჭრესთან, ერთი ალტერნატივა არის რომ მიმართოს კონკურენციის სააგენტოს, რომელსაც აქვს შეზღუდული ვადა საჩივრის განხილვის და გადაწყვეტილების მიღების, და მეორე ალტერნატივა არის სასამართლო, რომელიც ხარჯიანია და ასევე გრძელდება საკმაოდ ბევრად უფრო მეტხანს ვიდრე მაგალითად ჩვენთან საკითხის განხილვა.

ჩვენთან ყოველგვარი საზღაურის გარეშე, უდანახარჯოდ ნებისმიერ მომხმარებელს შეუძლია მოგვმართოს ნომერზე -1520 და მიიღოს მისთვის საჭირო ინფორმაცია და განაცხადის წარმოდგენის შემდგომ უკვე ჩვენი თანამშრომლები ერთვებიან საკითხის მოგვარებაში. დაახლოებით წლიურად 1 მილიონ ლარამდეა ის თანხა, რომელსაც მომხმარებელი იბრუნებს ჩვენი ჩართულობის შედეგად. ხშირ შემთხვევაში ეს თანხები ერთეულ შემთხვევაში დიდი არ არის, შეიძლება იყოს 150 ლარი, 200 ლარი, 300 ლარი, ყოფილა 50 ლარიანი შემთხვევებიც, როდესაც მაგალითად პრინციპის საკითხია უბრალოდ რომ მომხმარებელმა საკუთარი უფლება დაიცვას. თუმცა ზოგჯერ მასშტაბი ერთ მოვაჭრესთან მიმართებაში იმხელაა, რომ ის ბევრი 50 და ბევრი 150 ლარია, ამიტომ ჯამში ამ ციფრზე გავდივართ და დაახლოებით 65% მოდის ონლაინ ვაჭრობაზე, იმიტომ რომ ეს სფერო დინამიურად მზარდია და პლუს განსხვავებით ფიზიკური ვაჭრობისგან მომხმარებელს ეს პირადი შეხება ნივთთან არ აქვს და როცა იღებს ნივთს მერე აქვს იმ მახასიათებლებთან შედარების საშუალება რაზეც თავიდან ჰქონდა სურვილი რომ ის მიეღო როგორც სასურველი ნივთი. ძირითადად არის ტექნიკა და ტანსაცმელი, რაც ამ ონლაინ ვაჭრობის ნაწილშიც და ფიზიკური ვაჭრობის ნაწილშიც ხვდება. და ბოლო პერიოდში გაზრდილია მიწოდების სერვისები“, - აცხადებს ირაკლი ლექვინაძე.

ირაკლი ლეკვინაძის განმარტებით, ონლაინ შეძენების პროცესში პრობლემები განსაკუთრებით მაშინ წარმოიქმნება, როცა ნივთი უცხოეთში რეგისტრირებული ვებ-პორტალიდან იგზავნება. ასეთ შემთხვევაში მთავარ პასუხისმგებლობას პორტალი და მისი ქვეყნის კანონმდებლობა განაპირობებს, თუმცა ტრანსპორტირების პროცესში ადგილობრივი კომპანიის ჩარევა, ნივთის დაკარგვა, დაზიანება ან ხარვეზით მიწოდება ხშირად წარმოადგენს მომხმარებლის პრეტენზიების მთავარ მიზეზს. მისი თქმით, მიწოდების სერვისების დინამიური ზრდასთან ერთად ასეთი პრობლემატიკაც უფრო აქტუალური ხდება.

„თუ მაგალითად უცხოეთში რეგისტრირებული ვებ-პორტალიდან ხდება ნივთის გამოწერა, უკვე ის გვერდია პასუხისმგებელი და იმ ქვეყნის კანონმდებლობა, სადაც ის გვერდია რეგისტრირებული, თუმცა ტრანსპორტირებისას თუ მას ადგილობრივი კომპანია ემსახურება - ეს ნაწილია უკვე ჩვენი ყურადღების საგანია, იმიტომ რომ ნივთი ზოგჯერ იკარგება, ზოგჯერ ზიანდება, ზოგჯერ გარკვეული ხარვეზით ჩამოდის, რომელიც გადამზიდავის პრობლემაა და ეს სფერო ასევე თავის დინამიურ ზრდასთან ერთად ეს პრობლემატიკაც მზარდია ბოლო პერიოდში“, - ამბობს კონკურენციისა და მომხმარებლის დაცვის სააგენტოს თავმჯდომარე.