ვმუშაობთ როგორც სამინისტროსთან, ასევე, კომიტეტთანაც გავაგრძელებთ მუშაობას, რომ ბიუჯეტის საბოლოო ვერსიაში სრულად აისახოს ის საჭიროებები, რომლებიც ახალი საკანონმდებლო ცვლილებებიდან გამომდინარე სამინისტროს წინაშე დგას და ეს დაფინანსება მოვიძიოთ, - განაცხადა ფინანსთა მინისტრის მოადგილე გიორგი კაკაურიძემ.

მისი თქმით, საგარეო მიმართულებით ბიუჯეტის ზრდა საჭიროებას არ წარმოადგენს, თუმცა ამ საკითხს კომიტეტი კიდევ განიხილავს.

„საკითხები, რა თქმა უნდა, მნიშვნელოვანია როგორც მყარი ნარჩენების მიმართულებით, ასევე გარემოს ზედამხედველობის, სატყეო და დაცული ტერიტორიების მიმართულებით. აქ გვაქვს დაფინანსების ზრდა, თუმცა დამატებითი საჭიროებები არსებობს და ჩვენ ვმუშაობთ როგორც სამინისტროსთან, ასევე კომიტეტთანაც გავაგრძელებთ მუშაობას, იმისათვის, რომ ბიუჯეტის საბოლოო ვერსიაში სრულად აისახოს ის საჭიროებები, რომლებიც ახალი საკანონმდებლო ცვლილებებიდან გამომდინარე სამინისტროს წინაშე დგას და ეს დაფინანსება მოვიძიოთ. საგარეო მიმართულებით, პრინციპში, დაფინანსების მოცულობა არის ადეკვატური, დიდი საჭიროებები აქ არ არის, თუმცა კიდევ გვექნება დამატებითი განხილვა. შესაძლებელია, მცირე ცვლილებები იყოს საჭირო“, - აღნიშნა კაკაურიძემ.

2027 წლის სახელმწიფო ბიუჯეტი 3 კომიტეტის - ევროპასთან ინტეგრაციის, საგარეო ურთიერთობათა და გარემოს დაცვისა და ბუნებრივი რესურსების კომიტეტების გაერთიანებულ სხდომაზე განიხილეს. პირველად ვერსიაში ნაერთი ბიუჯეტი, ჯამში, 37 მილიარდ 531 მილიონი ლარია და 5%-იან ეკონომიკურ ზრდაზეა გათვლილი. იზრდება ყველა უწყების დაფინანსება. ქვეყნის მთავარი ფინანსური დოკუმენტის პროექტის მიხედვით, ასევე, იზრდება პენსია. დაგეგმილია არაერთი მნიშვნელოვანი პროექტი, მათ შორის, ერთიანი აგროპროექტის მევენახეობა-მეღვინეობის დაფინანსება და სამელიორაციო სისტემების მოდერნიზაცია. ბიუჯეტის საბოლოო ვერსიას პარლამენტს ფინანსთა სამინისტრო დასამტკიცებლად ნოემბრის ბოლოს წარუდგენს.