ლონდონის საფონდო ბირჟის FTSE 100 ინდექსში მოხვედრა Lion Finance Group-ისთვის მრავალწლიანი სწავლისა და განვითარების შედეგია, რომელიც არაერთ გამოწვევასა და შეცდომაზე გადის.  ამის შესახებ Business Insider Georgia-სთან ინტერვიუში Lion Finance Group-ის აღმასრულებელმა დირექტორმა, არჩილ გაჩეჩილაძემ განაცხადა. მისი თქმით, გადამწყვეტი როლი ამ წარმატებაში სომხეთში გაფართოებამ და „ამერიაბანკის“ შეძენამ ითამაშა, რამაც კომპანიას ინდექსში უფრო სწრაფად მოხვედრის შესაძლებლობა მისცა.

„რამოდენიმე მომენტი იყო განმსაზღვრელი ჩვენი წარმატების ამ გზაზე და ერთ-ერთი, რომელსაც გამოვყოფდი, ეს არის ჩვენი გადაწყვეტილება, რომ ძალიან დიდი რესურსი ჩაგვედო ციფრულ შეთავაზებებში და ასევე ბრენდის სიძლიერეში და ეს სადღაც 7 წლის წინ განვაცხადეთ, რომ ჩვენ ამას ვაპირებდით. ეს დიდი გადაწყვეტილება იყო ერთის მხრივ და მეორეს მხრივ არც ისე მარტივი გასაკეთებელი, ვინაიდან თქვენ წარმოიდგინეთ, რომ ფილიალში რომ ადამიანი შემოდის და მას შეიძლება რაღაც შესთავაზო პროდუქტი, ამას ერთის მხრივ აკეთებთ, ამის გაციფრულება არ არის უბრალოდ პროცესების კოპირება. მთლიანად უნდა გადაიაზრო თავიდან როგორ და რანაირად ხდება და ამის გაკეთება რამოდენიმეჯერ მოგვიწია, შეცდომებიც ბევრი დავუშვით და მერე ეს გამოვასწორეთ, ვისწავლეთ და ეს მუდმივი პროცესია. ასე რომ, ამის გაკეთება როგორც გუნდი ერთად, გუნდისთვის მთლიანად ამის კეთება არ არის მარტივი, ვინაიდან აქ სისწრაფე არის, უცებ სწავლა, რომ რა მოსწონს და რა არ მოსწონს ჩვენ მომხმარებლებს. ეს არის მთელი პროცესი, ვიტყოდი, რომ ერთ-ერთი დიდი გამოწვევა იყო.

მეორე საფეხური ასევე უმნიშვნელოვანესი ამ მიზნის მისაღწევად იყო ჩვენი გაფართოება სომხეთში. ეს იყო ერთის მხრივ საკმაოდ რისკიანი ნაბიჯი, მაგრამ როგორც აღმოჩნდა და დრომ გვაჩვენა, ეს იყო ძალიან წარმატებული ნაბიჯი. როგორც მოგეხსენებათ, 2024 წლის მარტში ჩვენ, ანუ ორი წლის წინ, შევიძინეთ „ამერიაბანკი“, რომელიც არის წამყვანი ბანკი სომხეთში, ნომერ პირველი ბანკია არა მარტო ციფრებით, არამედ ბრენდის სიძლიერით და ხარისხით. და ეს ტრანზაქცია ძალიან დაგვეხმარა იმაში, რომ FTSE 100-ში შევსულიყავით და შევსულიყავით უფრო მალე, ვიდრე ეს სხვა შემთხვევაში მოხდებოდა“- განაცხადა გაჩეჩილაძემ.

შეგახსენებთ, რომ საქართველოს ბანკი, როგორც Lion Finance Group-ში შემავალი ფინანსური ინსტიტუტი, FTSE 100-ში შევიდა და გახდა პირველი კომპანია საქართველოდან, რომელმაც ლონდონის საფონდო ბირჟის 100 წამყვან კომპანიას შორის დაიკავა ადგილი.