მინდა მივულოცო ბაზისბანკს ლიბერთის შეძენა, - განაცხადა საქართველოს საბანკო ასოციაციის ხელმძღვანელმა ალექსანდრე ძნელაძემ ტელეკომპანია „მაესტროს“ ეთერში, გადაცემა  Business Insider Georgia-ში სტუმრობისას.
მისი განცხადებით, ბაზისბანკის მიერ ლიბერთის შეძენა მნიშვნელოვანი გარიგებაა, რადგან მცირე ბანკმა უფრო მსხვილი ბანკი შეიძინა. ხოლო კონკურენციის კუთხით, მიუხედავად ბაზრის კონცენტრაციაზე აქცენტისა, საქართველოში მოქმედი 19 საბანკო ლიცენზიის პირობებში, ბანკებს საკუთარი ნიშები უკავიათ და სტაბილურად ფუნქციონირებენ. 
„გარიგება შედგა და ეს ნამდვილად მნიშვნელოვანი მოვლენაა. არ მახსენდება მსგავსი მასშტაბის შემთხვევა, როდესაც შედარებით მცირე ბანკმა უფრო მსხვილი ბანკი შეიძინა, რაც ამ ნაბიჯს კიდევ უფრო მნიშვნელოვანს ხდის.
საქართველოში 19 საბანკო ლიცენზიაა გაცემული და კონკურენციის თვალსაზრისით, თითოეულ მათგანს საკუთარი ნიშა უკავია. სწორი იქნება აღვნიშნოთ, რომ ბანკის ცნობადობიდან და მასშტაბიდან გამომდინარე, რაც უფრო მსხვილია ბანკი, მით მეტი შესაძლებლობა აქვს მას, თუმცა კონკურენციის პირობებში სხვა ბანკებიც წლებია სტაბილურად ოპერირებენ, ბაზარზე მყარად არიან წარმოდგენილნი და საკმაოდ მაღალი მოგების მაჩვენებლებიც აქვთ. კონცენტრაციის კუთხით, შეგვიძლია ვივარაუდოთ, რომ მომავალში ორი ბანკის ნაცვლად ბაზარზე სამი მსხვილი მოთამაშე იქნება.
მესამე მსხვილი ბანკის გაჩენა, რა თქმა უნდა, გააფართოებს კონკურენციას, განსაკუთრებით მსხვილი კლიენტებისთვის. მნიშვნელოვანია ისიც, რომ ჩვენ მხოლოდ გამსხვილების პროცესს არ ვიხილავთ - მოსალოდნელია მნიშვნელოვანი სიახლეები მომხმარებლებისთვის და ახალი პროდუქტების დანერგვა. ამ თვალსაზრისით, ნამდვილად შემიძლია ვთქვა, რომ ეს გარიგება გარკვეულწილად წაახალისებს კონკურენციას არა მხოლოდ მსხვილ, არამედ შედარებით მცირე ბანკებს შორისაც, რადგან მათთვისაც გაჩნდება ახალი გამოწვევები. გაერთიანების პროცესი სრულად ერთ წელიწადში უნდა დასრულდეს და ამ მოვლენას დიდი იმედით ვუყურებთ. რეალურად, დღევანდელი მონაცემებით, ამ ორი ბანკის გაერთიანების შედეგად მთლიანი აქტივები დაახლოებით 12 მილიარდ ლარს მიაღწევს, რაც იმას ნიშნავს, რომ საბანკო სისტემაში სამ ძლიერ სისტემურ ბანკს ვიხილავთ“, - აღნიშნა ალექსანდრე ძნელაძემ.