ქართული ბანკებისთვის უცხო იურისდიქციის სანქციების „ავტომატურად“ შესრულების ვალდებულება ვერ წარმოიშობა მხოლოდ იმ საფუძვლით, რომ სანქცია გაერთიანებულმა სამეფომ (ან სხვა სახელმწიფომ) გამოაცხადა — თუ ასეთი ვალდებულება არ გამომდინარეობს ზემოაღნიშნული სამართლებრივი კავშირიდან ან საქართველოს კანონმდებლობიდან, - ამის შესახებ ახალგაზრდა ფინანსისტთა და ბიზნესმენთა ასოციაციის მიერ გავრცელებულ განცხადებაში ვკითხულობთ.

როგორც ასოციაცია განმარტავს, ეროვნული ბანკის პრეზიდენტის განცხადება, რომ საქართველოში მოქმედი ბანკები ვალდებულნი არიან იმოქმედონ საქართველოს კონსტიტუციისა და კანონმდებლობის ფარგლებში, არ წარმოადგენს პოლიტიკურ შეფასებას და ეს მარეგულირებლის მანდატის ზუსტი დაფიქსირებაა.

განცხადებაში ასევე აღნიშნულია, რომ  წესებზე დაფუძნებული სამართლებრივი წესრიგის ალტერნატივა ვერ უნდა გახდეს ძალაუფლების ლოგიკა — „ვინც დიდია, ყოველთვის მართალია“.

“დიდი ბრიტანეთის მიერ „იმედისა“ და „პოსTV“-ზე სანქციების დაწესება გაერთიანებული სამეფოს (UK) სუვერენული გადაწყვეტილებაა. ამასთან, ეროვნული ბანკის პრეზიდენტის განცხადება, რომ საქართველოში მოქმედი ბანკები ვალდებულნი არიან იმოქმედონ საქართველოს კონსტიტუციისა და კანონმდებლობის ფარგლებში, არ წარმოადგენს პოლიტიკურ შეფასებას — ეს არის კანონის უზენაესობის პრინციპის პირდაპირი გამოხატულება და მარეგულირებლის მანდატის ზუსტი დაფიქსირება.

UK-ის სანქციები პირველ რიგში სავალდებულოა UK-ის იურისდიქციაში მყოფი პირებისა და UK-ის სამართლის მიხედვით დაფუძნებული პირებისთვის და კომპანიებისთვის. პრაქტიკაში, სანქციებთან დაკავშირებული ვალდებულებები შესაძლოა წარმოიშვას ასევე მაშინაც, როცა არსებობს UK-თან საკმარისი სამართლებრივი კავშირი — მაგალითად, თუ კონკრეტული ტრანზაქცია/ანგარიშსწორება გადის UK-ის ფინანსურ ინფრასტრუქტურაზე, ან პროცესში მონაწილეობს UK იურისდიქციას დაქვემდებარებული მხარე — ან როდესაც შესაბამისი მოთხოვნა ასახულია საქართველოს სამართლებრივ ჩარჩოში. შესაბამისად, ქართული ბანკებისთვის უცხო იურისდიქციის სანქციების „ავტომატურად“ შესრულების ვალდებულება ვერ წარმოიშობა მხოლოდ იმ საფუძვლით, რომ სანქცია გაერთიანებულმა სამეფომ (ან სხვა სახელმწიფომ) გამოაცხადა — თუ ასეთი ვალდებულება არ გამომდინარეობს ზემოაღნიშნული სამართლებრივი კავშირიდან ან საქართველოს კანონმდებლობიდან.

ამავე დროს, პრაქტიკაში ბანკები მართავენ საერთაშორისო შესაბამისობისა და რეპუტაციულ რისკებს, განსაკუთრებით მაშინ, როცა ბანკი  წარმოდგენილია საერთაშორისო ბაზრებზე (მათ შორის, ლონდონის ბირჟაზე) და მუშაობს გლობალურ პარტნიორებთან. ასეთი სიფრთხილე და შესაბამისობის არქიტექტურა ბუნებრივია, თუმცა იგი არ ცვლის საბაზო პრინციპს — სად, რა ვალდებულება და რა წესით წარმოიშობა.

და ბოლოს, პრინციპი უნივერსალურია: თუ საქართველო ნებისმიერი მიზეზით დაასანქცირებდა, მაგალითად, BBC-ს, წარმოუდგენელია, რომ UK-ის ფინანსური ზედამხედველი — Financial Conduct Authority (FCA) და მისი თავმჯდომარე Ashley Alder — აცხადებდეს, თითქოს ბრიტანულ ბანკებს ავტომატურად დაეკისრათ ქართული სანქციების შესრულება. პირიქით, ის იტყოდა, რომ UK-ის ინსტიტუტები მოქმედებენ UK-ის სამართლისა და შესაბამისი იურისდიქციის ფარგლებში. სწორედ ეს არის წესებზე დაფუძნებული სამართლებრივი წესრიგი და მისი ალტერნატივა ვერ უნდა გახდეს ძალაუფლების ლოგიკა — „ვინც დიდია, ყოველთვის მართალია…“ - აღნიშნულია ასოციაციის განცხადებაში.