საქართველოს საბანკო ასოციაციის ხელმძღვანელის ალექსანდრე ძნელაძის განცხადებით, საქართველოს ბანკის FTSE 100-ში გადანაცვლება მნიშვნელოვანი მიღწევაა, რომელიც ზრდის როგორც კომპანიის, ისე ქვეყნის ცნობადობას და ინვესტორების ინტერესს. რაც მისივე თქმით, კაპიტალის მოზიდვის კუთხით დამატებითი წინ გადადგმული ნაბიჯია.
„FTSE 250-ის ინდექსში ორი მსხვილი ქართული ბანკი იყო წარმოდგენილი, დღეს კი საქართველოს ბანკმა FTSE 100-ში გადაინაცვლა. რას ნიშნავს ეს? აღნიშნული ფაქტი ზრდის ცნობადობას და, პირდაპირი მნიშვნელობით, ამაღლებს ქვეყნის ხილვადობას საერთაშორისო ასპარეზზე.
100 ყველაზე გამორჩეული კომპანიის სიაში მოხვედრა ძალიან მნიშვნელოვანია არა მხოლოდ ერთი კომპანიისთვის. ინვესტორების მხრიდან ეს ზრდის ინტერესს ქვეყნისა და მასში ინვესტირების მიმართ. ამ თვალსაზრისით, ეს კაპიტალის მოზიდვის კუთხით ქვეყნისთვის გადადგმული კიდევ ერთი მნიშვნელოვანი ნაბიჯია“, - აცხადებს ალექსანდრე ძნელაძე.
ალექსანდრე ძნელაძის განცხადებით, საქართველოს ბანკის FTSE 100-ში გადანაცვლება არა მხოლოდ ახალი შესაძლებლობების და ინვესტიციების არხების გაჩენას უწყობს ხელს, არამედ ქმნის ახალ ნიშნულს, რომლის მიღწევასაც სხვა კომპანიებიც შეეცდებიან.
ასოციაციის ხელმძღვანელის განცხადებით, მიუხედავად იმისა, რომ პანდემიამდე საქართველოს საინვესტიციო რეიტინგის მიღების უფრო ოპტიმისტური მოლოდინი არსებობდა, გლობალური და რეგიონული რისკების ზრდამ ეს პროცესი შეაფერხა. თუმცა, მისი თქმით, ქვეყნის საკანონმდებლო ბაზა და მაკროეკონომიკური პარამეტრები რეიტინგის გაუმჯობესების პოტენციალს კვლავ ინარჩუნებს, რაც მხოლოდ საბანკო სექტორზე არ არის დამოკიდებული.
„მნიშვნელოვანია ყურადღება გავამახვილოთ იმაზე, რომ 2019-2020 წლებში, პანდემიის დაწყებამდე, საინვესტიციო რეიტინგთან დაკავშირებით უფრო ოპტიმისტური მოლოდინი გვქონდა. პრინციპში, კონკრეტული პერიოდიც იყო დასახელებული - საქართველოს საინვესტიციო რეიტინგი 2023-2024 წლებში უნდა მიეღო, თუმცა მსოფლიოში ვითარება მნიშვნელოვნად შეიცვალა. რეგიონში რისკები გაიზარდა, ხოლო საბანკო სექტორის რეიტინგი, უმეტესწილად, ქვეყნის რეიტინგის იდენტურია ან მასთან მჭიდრო კავშირშია. ეს იმის წინაპირობაა, რომ დღეს აქცენტი იმ მაკროეკონომიკურ მაჩვენებლებსა და რისკებზე უნდა გადავიტანოთ, რომლებიც ქვეყნისა თუ რეგიონის წინაშე დგას.
რეიტინგის ზრდის პოტენციალი ნამდვილად არსებობს, რადგან საქართველოში საკანონმდებლო ბაზა არა მხოლოდ შემუშავებული, არამედ იმპლემენტირებულია, რაც რეგიონში აშკარად გამოგვარჩევს. მეორე მხრივ, არსებობს პარამეტრები, რომლებიც დღის წესრიგში რისკებად დგას. მთავარი გამოწვევა კვლავ რეგიონული არასტაბილურობაა, თუმცა არსებობს კონკრეტული საკითხების ჩამონათვალი, რომლებზეც სამუშაოა როგორც ქვეყნის, ისე კომპანიების დონეზე. რეიტინგის გაუმჯობესებას მხოლოდ საბანკო სექტორი ვერ შეუწყობს ხელს - მართალია, მყარი საბანკო სისტემა ერთ-ერთი გადამწყვეტი ფაქტორია, თუმცა საერთო წინსვლისთვის სხვა სექტორების განვითარებაც აუცილებელია“, - აღნიშნა ძნელაძემ.
ალექსანდრე ძნელაძის განცხადებით, მიუხედავად იმისა, რომ საქართველო საბანკო სექტორის განვითარებისა და დიგიტალიზაციის მიმართულებით უკვე გამორჩეულ პოზიციებზეა და შესაბამისი ეკოსისტემაც ჩამოყალიბებულია, მხოლოდ ამით ფინანსურ ჰაბად ჩამოყალიბება ვერ მოხდება; ამისთვის აუცილებელია სხვა ფინანსური პროდუქტებისა და ფასიანი ქაღალდების ბაზრის განვითარება, რაშიც, მისი თქმით, უკვე იდგმება მნიშვნელოვანი ნაბიჯები.