ოქროსა და იუანის წილი მთლიან რეზერვებში საკმაოდ მცირეა, - აღნიშნა ტელეკომპანია „მაესტროს“ ეთერში, გადაცემა  Business Insider Georgia-ში სტუმრობისას საქართველოს საბანკო ასოციაციის ხელმძღვანელმა ალექსანდრე ძნელაძემ. მისი თქმით, მიუხედავად ოქროს ფასის შესაძლო მაღალი ვოლატილობისა, მყარ აქტივებში მსგავსი დივერსიფიკაცია მაინც მნიშვნელოვანია.
„რეზერვების დივერსიფიკაცია ცალსახად დადებითად უნდა შეფასდეს. ის, თუ რატომ გაკეთდა აქცენტი ოქროსა და იუანზე, ვფიქრობ, დიდ კითხვებს არ აჩენს, რადგან ოქრო კვლავ რჩება რეზერვების შევსების ერთ-ერთ უალტერნატივო წყაროდ. უნდა გავითვალისწინოთ, რომ ოქროსა და იუანის წილი მთლიან რეზერვებში საკმაოდ მცირეა. მყარ აქტივებში მსგავსი დივერსიფიკაცია ყოველთვის მისასალმებელია, მიუხედავად ფასების ცვალებადობისა
რაც შეეხება იუანს, ჩინეთი ჩვენი ერთ-ერთი მსხვილი სავაჭრო პარტნიორია, ამიტომ ამ ვალუტაში რეზერვის შექმნა აბსოლუტურად ლოგიკურია. ხშირად ისმის კითხვა რეზერვების მოცულობასთან დაკავშირებით - რატომ არის ამ დონეზე, ან რატომ არის ასეთი მაღალი. ამ საკითხზე დისკუსია მუდმივად მიმდინარეობს, თუმცა დღევანდელ პირობებში, როდესაც რეგიონში დაბალი განჭვრეტადობა და არაერთი რისკფაქტორია, მაღალი რეზერვების ფლობა უფრო მეტად გამართლებულია, მათი დივერსიფიკაცია კი მხოლოდ მისასალმებელი“, - აღნიშნა საქართველოს საბანკო ასოციაციის ხელმძღვანელმა.
ალექსანდრე ძნელაძის განცხადებით, ოქრო სტაბილურ აქტივად მიიჩნევა, თუმცა მისი მაღალი ვოლატილობა გარკვეულ კითხვებს აჩენს, მიუხედავად იმისა, რომ მისი ღირებულება წლიდან წლამდე ზრდას ინარჩუნებს.