ჩვენი ამოცანაა და სებ-თან ერთად მაქსიმუმს ვაკეთებთ, რომ კიდევ უფრო პროაქტიულობით მონაწილეებს ავიხსნათ, თუ კონკრეტული საინვესტიციო პორტფელი რისგან შედგება, რა არის სავარაუდო მოგება, საინვესტიციო რისკი როგორაა დათვლილი და ასე შემდეგ, - აღნიშნა საპენსიო სააგენტოს უფროსმა საინვესტიციო ოფიცერმა გოგა მელიქიძემ. 

როგორც ცნობილია, 2024 წლის 3 იანვრიდან იმ მონაწილეების აქტივები, რომლებსაც 2023 წლის 7 სექტემბრამდე არ აურჩევიათ სასურველი საინვესტიციო პორტფელი, ავტომატურად გადანაწილდებიან კონსერვატიულ ანუ დაბალრისკიან პორტფელში. 3 იანვრიდან კი აღნიშნულ მონაწილეებს საშუალება ექნებათ თავად შეარჩიონ მათთვის სასურველი პორტფელი და შემდგომში ხელმეორედ არჩევანის გაკეთება 12 თვეში ერთხელ იქნება შესაძლებელი.

„2023 წელი იყო ერთ-ერთი კარგი წელი საინვესტიციო მოგების თვალსაზრისით, ანუ მთელს საინვესტიციო პერიოდზე რაც ფონდი არსებობს 835 მლნ ლარის საინვესტიციო მოგება მოვიტანეთ, რაც ძალიან კარგი შედეგია. მარტო 2023 წელს მოგება იყო 400 მლნ ლარზე მეტი, იმიტომ, რომ თანხაც მეტი იყო, რისი ინვესტირებაც დავიწყეთ და ბაზარმაც ძალიან კარგი ზრდა აჩვენა.

ძირითადი ფაქტორი რის გამოც 2023 წელს კარგი მოგება დავწერეთ იყო აქციების ბაზარი, ამ ბაზარს ერთ-ერთი კარგი წელი ჰქონდა. საკმაოდ კმაყოფილები ვართ არსებული შედეგებით. რაც შეეხება 2024 წლის დასაწყისს თქვენ იცით, რომ 2023 წლის 6 აგვისტოს კანონმა გადაანაწილა მონაწილეები ასაკობრივად და შემდეგ კანონმა მიიღო გადაწყვეტილება, რომ ყველა მონაწილე დააბრუნოს ისევ ნაკლებ რისკიან, კონსერვატიულ პორტფელში და 2024 წლის 3-4 იანვარს ამას საპენსიო სააგენტო გააკეთებს და მონაწილეებს დააბრუნებს კონსერვატიულ პორტფელში და შემდეგ მონაწილეებს ექნებათ შესაძლებლობა, რომ ყოველგვარი ვადის და დათქმის გარეშე აირჩიონ ის საინვესტიციო პორტფელი, რომელსაც თვითონ ჩათვლიან საჭიროდ. ჩვენი ამოცანა, როგორც საპენსიო სააგენტოსი არის ის, რომ მაქსიმალურად მივაწოდოთ ინფორმაციას მონაწილეებს ძირითადი საინვესტიციო პორტფელების შესახებ. მონაწილეების დანაზოგები იმართება ფასიან ქაღალდებში და არამხოლოდ დეპოზიტებში“, აღნიშნა გოგა მელიქიძემ.

საპენსიო სააგენტოს უფროსი საინვესტიციო ოფიცერი ფიქრობს, რომ ყველაზე კარგი პორტფელის არჩევის ფაქტორი არის საინვესტიციო მოგება.

„გადაწყვეტილების მიღების შემდეგ არის 12 თვიანი პერიოდი და 12 თვის გასვლის შემდეგ მონაწილეს შეუძლია შეცვალოს საინვესტიციო პორტფელი ან დარჩეს იგივე პორტფელში. ანუ არაფერი მის, მონაწილის პროცესში არ იცვლება. ყველაზე კარგი პორტფელის არჩევის ფაქტორი არის საინვესტიციო მოგება. მონაწილეებს შეეძლებათ, მარტივად დაინახონ რომელი საინვესტიციო პორტფელი რა მოგებას წერს“, ამბობს გოგა მელიქიძე.