საქართველოს საბანკო ასოციაციის ანალიტიკური დირექტორის, დავით რუსიას განცხადებით, ბოლო წლების გლობალური გამოწვევების ფონზე ქართულმა საბანკო სისტემამ მაღალი მდგრადობა აჩვენა. მისი თქმით, როგორც პანდემიის პერიოდში, ისე ომის შემდგომ პერიოდში, როდესაც საქართველოში ათიათასობით უცხო ქვეყნის მოქალაქე გადმოვიდა საცხოვრებლად, საბანკო სექტორმა მომსახურების უწყვეტობა შეინარჩუნა და მოსახლეობისთვის ფინანსურ სერვისებზე წვდომა შეუფერხებლად უზრუნველყო.

„2022 წლიდან დღემდე, თითქოს გუშინ იყო, მაგრამ უკვე 2026 წელია  ანუ, ფაქტობრივად, ხუთწლიან პერიოდზე ვსაუბრობთ. ეს, პირველ რიგში, რა თქმა უნდა, პანდემიით გამოწვეული პრობლემების დაძლევის პერიოდი იყო.

რეალურად, არცერთი საბანკო დაწესებულება არ გაჩერებულა. მოსახლეობისთვის არც ფულადი სახსრებისა თუ კრედიტების მიწოდება შეფერხებულა და არც ფინანსური ანგარიშსწორება თუ დეპოზიტების მიღება. საზოგადოებას ფინანსურ სფეროში არანაირი შეფერხება არ უგრძვნია. ამ პროცესში, რა თქმა უნდა, კომერციულმა ბანკებმა უდიდესი ძალისხმევა გასწიეს.

ყველას გვახსოვს პირბადეები და დამცავი ბარიერები ფილიალებში. საბანკო სისტემამ საკმაოდ დიდი ფინანსური და მატერიალური რესურსი გამოყო, რათა პანდემიასთან ბრძოლაში საქართველოს მთავრობას დახმარებოდა. გარდა ამისა, უნდა აღინიშნოს, რომ ომის შემდგომ პერიოდში საქართველოში საცხოვრებლად დაახლოებით 100-დან 150 000-მდე ექსპატი თუ უცხო ქვეყნის მოქალაქე გადმოვიდა ოჯახებით.

ამ ადამიანების მომსახურება, მიღება, საბანკო ბარათების გაცემა, ანგარიშსწორების მოწესრიგება თუ რისკების შეფასება  - ეს ყველაფერი იმგვარად განხორციელდა, რომ როგორც შიდა, ისე გარე დამკვირვებლებში, აღფრთოვანების გარდა, სხვა რეაქცია არ გამოუწვევია“, - ამის შესახებ საქართველოს საბანკო ასოციაციის ანალიტიკურმა დირექტორმა დავით რუსიამ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

საქართველოს საბანკო ასოციაციის ანალიტიკური დირექტორის შეფასებით, ქვეყნის ფინანსური სტაბილურობის შენარჩუნებაში მნიშვნელოვან როლს ეროვნული ბანკის მკაცრი, თუმცა ეფექტური საბანკო ზედამხედველობა და რეზერვების მართვის პოლიტიკა ასრულებს. მისი თქმით, საქართველოს საერთაშორისო რეზერვების ნაწილი ოქროში და ჩინურ ფასიან ქაღალდებშია განთავსებული, ხოლო ეროვნული ბანკის მიერ რეზერვების აქტიური შევსება ლარის კურსის ზედმეტი გამყარებისგან ეკონომიკის დაცვას უწყობს ხელს. 

„უნდა აღინიშნოს, რომ ქვეყანაში გვაქვს გარკვეულწილად მკაცრი, თუმცა ეფექტური საბანკო ზედამხედველობა. ამას თავად ეროვნული ბანკიც აღიარებს. ჩვენ ხშირად მოვუწოდებთ მათ რეგულაციების გარკვეული შერბილებისკენ, თუმცა ისინი კვლავ იმ არგუმენტს იშველიებენ, რომ ჩვენი საერთაშორისო პარტნიორები ამ სიმკაცრეს იწონებენ და აქცენტს სწორედ მასზე აკეთებენ. გარდა ამისა, დღის წესრიგში დადგა რეზერვების დივერსიფიკაციის საკითხიც და საქართველოს საერთაშორისო რეზერვებიდან დაახლოებით 1 მილიარდი დოლარი ოქროშია დენომინირებული.

თუ ქალბატონ ნათიას (თურნავა) ერთ-ერთ მოხსენებას გავიხსენებთ, დაახლოებით 300 მილიონამდე ჩინურ ფასიან ქაღალდებშია დაბანდებული. დანარჩენი, რა თქმა უნდა, დოლარის რეზერვებშია, რომელიც კვლავინდებურად უალტერნატივოა. მიუხედავად იმისა, თუ რას ვსაუბრობთ ბაზარზე მიმდინარე გარკვეულ რყევებზე, დოლარი მაინც რჩება იმ ვალუტად, რომლისკენაც კრიზისის დროს ნებისმიერი ინვესტორი მიისწრაფვის - ჩვენგან დაწყებული, სხვა ნებისმიერი ქვეყნით დამთავრებული. მიგვაჩნია, რომ რეზერვებთან მიმართებაში საქართველოს ეროვნულ ბანკს დღეს გარკვეულწილად სწორი პოლიტიკა აქვს. დარწმუნებული ვარ, რეზერვების შევსების ასეთი აქტიური შესყიდვები რომ არა, ეს პროცესი ლარის კურსზე მყისიერად და ნეგატიურად აისახებოდა.

გამყარებული კურსი მოსახლეობისთვის შეიძლება პოზიტიური მაჩვენებელია, თუმცა ეკონომიკური თვალსაზრისით, ლარის ჭარბი გამყარება უარყოფითად აისახება როგორც ექსპორტზე, ისე იმპორტზე. კერძოდ, ამ დროს იმპორტი იაფდება, რაც ქვეყანაში უცხოური საქონლის მოცულობას ზრდის, ხოლო ადგილობრივი ექსპორტი ძვირდება და კონკურენტუნარიანობას კარგავს. სწორედ ამ პროცესში მკაფიოდ ჩანს ეროვნული ბანკის როლი, რომელიც დიდი სიფრთხილით ლავირებს გაცვლით კურსს, რეზერვების შევსებასა და ფინანსურ სტაბილურობას შორის“, - აღნიშნა საქართველოს საბანკო ასოციაციის ანალიტიკურმა დირექტორმა.