საქართველოს სახელმწიფო საგარეო ვალის მოცულობამ 2026 წლის მაისის მდგომარეობით 9 121 109 ათასი დოლარი შეადგინა, რაც ეროვნულ ვალუტაში დაახლოებით 24 346 976 ათასი ლარია. აღნიშნული მაჩვენებლები საქართველოს ფინანსთა სამინისტროს ოფიციალურ ვებგვერდზეა განთავსებული.

სამინისტროს მიერ გამოქვეყნებული სტატისტიკის მიხედვით, წლიურ ჭრილში ქვეყნის საგარეო ვალდებულებები გაზრდილია, ხოლო თვიურ ჭრილში კლება ფიქსირდება. კერძოდ, 2026 წლის მაისში, 2025 წლის ანალოგიურ პერიოდთან შედარებით, სახელმწიფო საგარეო ვალის მოცულობა 1.76%-ითაა გაზრდილი (2025 წლის მაისში ეს მაჩვენებელი 8 962 995 ათას დოლარს, ანუ 24 499 451 ათას ლარს შეადგენდა).

რაც შეეხება წინა თვესთან შედარებას, 2026 წლის აპრილთან მონაცემებთან მიმართებით 1.03%-იანი კლებაა — მიმდინარე წლის აპრილში სახელმწიფო საგარეო ვალი 9 215 736 ათას დოლარს უტოლდებოდა.

გამოქვეყნებული დოკუმენტაციის თანახმად, საგარეო ვალის ძირითადი ნაწილი მთავრობაზე მოდის. 2026 წლის მაისის მდგომარეობით, უშუალოდ მთავრობის საგარეო ვალი 8 831 733 ათასი დოლარია (23 574 544 ათასი ლარი). ამავე პერიოდის მონაცემებით, მრავალმხრივი კრედიტორების წინაშე დავალიანება 6 777 553 ათას დოლარს (18 091 323 ათას ლარს) შეადგენს.

საქართველოს სახელმწიფოს ყველაზე მსხვილი კრედიტორები არიან: აზიის განვითარების ბანკი (ADB), აზიის ინფრასტრუქტურის საინვესტიციო ბანკი (AIIB), ევროპის საინვესტიციო ბანკი (EIB), რეკონსტრუქციის და განვითარების განვითარების საერთაშორისო ბანკი (IBRD).