საბანკო ასოციაციის, კომერციული ბანკებისა და დეპოზიტების დაზღვევის სააგენტოს ჩართულობით, საქართველოში დეპოზიტების დაზღვევის ზღვარის გადახედვაზე მიდის მუშაობა
აპრილში საქართველოს საბანკო სისტემის ჯამური აქტივები 1.97%-ით გაიზარდა და 110 მილიარდ ლარს მიაღწია, ხოლო დოლარში პირველად გადააჭარბა 40 მილიარდი აშშ დოლარის ეკვივალენტს. ამის შესახებ საქართველოს საბანკო ასოციაციის ანალიტიკურმა დირექტორმა დავით რუსიამ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა. მისივე თქმით, ზრდას განაგრძობს საკრედიტო პორტფელიც, რასაც ეროვნული ბანკიც განსაკუთრებულ ყურადღებას უთმობს.
„საქართველოს საბანკო სისტემა დღითი დღე იმდენად მიმზიდველი და საინტერესო ხდება, რომ უცხოელი ინვესტორები, რა თქმა უნდა, ჩვენს შედეგებს უცხოურ ვალუტაში აფასებენ. საკრედიტო პორტფელი ასევე მზარდია, რაზედაც ეროვნული ბანკიც ამახვილებს ყურადღებას. საკრედიტო პორტფელი დაახლოებით 75 მილიარდი ლარია, რაც, აქტივებთან უკეთ შესადარებლად, დაახლოებით 68,5%-ს შეადგენს.
ეს ნიშნავს, რომ ძირითადი აქტივი, რომელსაც საბანკო სექტორისთვის შემოსავალი მოაქვს, მაინც კრედიტებია. მიუხედავად იმისა, რომ კაპიტალის ბაზრის განვითარების მიმართულებით დიდი რეფორმები ტარდება, საკრედიტო პორტფელი, ფულის დაბანდების თვალსაზრისით, დღესდღეობით მაინც უცილობელ ლიდერად რჩება“, - აღნიშნა საქართველოს საბანკო ასოციაციის ანალიტიკურმა დირექტორმა.
დავით რუსიას განცხადებით, საბანკო სისტემაში აქტივების ზრდა, სავარაუდოდ, მაისში კრედიტების ზრდაშიც აისახება. მისივე თქმით, 2022 წლიდან დეპოზიტების მოცულობა სისტემაში სტაბილურად იზრდება და ამჟამად მთლიანი საკრედიტო პორტფელის დაახლოებით 97%-ს შეადგენს.
„თუ მონაცემებს ცალკეულ ბანკებზე ჩავშლით, რა თქმა უნდა, ეს თანაფარდობა ზოგ ბანკში 51%-ს შეადგენს, ზოგში კი 87%-მდე ადის. თუმცა უნდა ვთქვათ, რომ საშუალოდ 68-71%-ის ფარგლებში ვიმყოფებით და ვფიქრობთ, რომ აქტივების ეს აპრილის ზრდა მაისის კრედიტების ზრდაში უკვე აისახება. 2022 წლიდან მოყოლებული, სისტემაში დეპოზიტების მოცულობაც იზრდება. ის პერიოდულად საკრედიტო პორტფელსაც კი უტოლდება, თუმცა დღესდღეობით მთლიანი საკრედიტო პორტფელის დაახლოებით 97%-ს შეადგენს.
ეს ნიშნავს, რომ საქართველოს საბანკო სისტემის მიმართ ნდობა და ინტერესი მაღალია. სადეპოზიტო პორტფელი მზარდია როგორც ადგილობრივი მოსახლეობის, ისე უცხოელების მხრიდან. ამას, რა თქმა უნდა, ხელი შეუწყო გატარებულმა რეფორმებმაც. საქართველოში არსებობს დეპოზიტების დაზღვევის სააგენტო, რომელიც თითოეულ ბანკში იურიდიული და ფიზიკური პირების დეპოზიტებს 50 000 ლარის ფარგლებში აზღვევს.
ხშირად ამბობენ, რომ ევროკავშირს უნდა დავუახლოვდეთ. შევახსენოთ მომხმარებელს, რომ ევროკავშირში ეს ზღვარი დაახლოებით 100 000 ევროა და, ალბათ, ეს არის ის ნიშნული, რომლისკენაც მივისწრაფვით. თუმცა, ამ ეტაპზე ჯერჯერობით მიღწეულია გაჟღერებული 50 000 ლარი. საბანკო ასოციაციის, ბანკებისა და დეპოზიტების დაზღვევის სააგენტოს ჩართულობით, დღეს უკვე ვმუშაობთ ახალი ზღვრის შემუშავებაზე. ვნახოთ, რა ზღვარი იქნება ეს, რა ეტაპებისგან შედგება და როგორ მივაღწევთ მას“, - აღნიშნა დავით რუსიამ.
დღის ტოპ 10 სიახლე
სხვა სიახლეები
დღეს ყველაზე მძაფრი კონკურენცია სადეპოზიტო ბაზარზე, განსაკუთრებით კი ლარის რესურსის მოზიდვაზეა - დავით რუსია
03.06.2026.10:50
საქართველოს საბანკო ასოციაციის ანალიტიკური დირექტორის, დავით რუსიას განცხადებით, საბანკო სექტორში ყველაზე მაღალი კონკურენცია დღეს სადეპოზიტო ბაზარზე, განსაკუთრებით კი ლარის რესურსზეა. მისი თქმით, მოქალაქეებსა და კომპანიებს, რომლებსაც დანაზოგის შესაძლებლობა აქვთ, შეუძლიათ ისარგებლონ ბანკების შეთავაზებებით და თანხები როგორც ლარში, ისე უცხოურ ვალუტაში განათავსონ. დავით რუსიას ინფორმაციით, ამჟამად სადეპოზიტო პორტფელის დაახლოებით 54% ლარშია განთავსებული.
„პოტენციურ დეპოზიტარს შეუძლია თანხა რამდენიმე ბანკში გადაანაწილოს. დღესდღეობით ყველაზე მძაფრი კონკურენცია მაინც სადეპოზიტო ბაზარზეა, განსაკუთრებით - ლარის რესურსზე. ამიტომაც, თუ იურიდიულ ან ფიზიკურ პირებს აქვთ გარკვეული თავისუფალი სახსრები, რომელთა დაზოგვაც შეუძლიათ, მოვუწოდებ, ისარგებლონ საბანკო სისტემის შემოთავაზებებით და განათავსონ ისინი როგორც ლარში, ისე უცხოურ ვალუტაში. რეალურად, სადეპოზიტო პორტფელის დაახლოებით 54% დღეს ლარშია. დოლარში 34%-ია, ხოლო ევროში დაახლოებით 10%-ის ფარგლებში. თუმცა აპრილმა საკმაოდ საინტერესო ტენდენცია გამოკვეთა - დეპოზიტების მოცულობა დირჰამებში გაიზარდა - ბანკებმა მომხმარებელს დეპოზიტების დირჰამებში განთავსებაც შესთავაზეს.
სასწაული მაჩვენებელი არ არის, მაგრამ თვითონ პროცენტული ზრდის მაჩვენებელი 300-350%-ს უტოლდება, ეს ნიშნავს, რომ გარკვეულმა ინვესტორთა ჯგუფმა ჩათვალა რომ საქართველოში ამ თანხების დაბანდება შესაძლებელი იყო. ვიცით, რომ საქართველოს ეროვნული ბანკი და ქართული საბანკო სექტორი ცდილობს, რომ გარკვეულ ჰაბად გადააქციოს საქართველო. ამას, რა თქმა უნდა, წინ დიდი შრომა უძღოდა, თუმცა კიდევ ძალიან ბევრი სამუშაოა ჩასატარებელი. კაპიტალი ყოველთვის ისეთი დიდი ბაზრებისკენ მიისწრაფვის, როგორიც, ვთქვათ, ამერიკის შეერთებული შტატებია, მით უმეტეს, რომ მათი ხელისუფლებაც მოუწოდებს ინვესტორებს: „მოდით ჩვენთან, ჩვენთან დაცული იქნებით“. ამიტომ, თუ კაპიტალის გარკვეული ნაწილი ჩვენთანაც დარჩება და მთლად ოკეანის გაღმა არ წავა, ეს ძალიან მისასალმებელი იქნება“, - აღნიშნა საქართველოს საბანკო ასოციაციის ანალიტიკურმა დირექტორმა.
