საქართველოს საპენსიო ფონდის პორტფელმა 2026 წელი პოზიტიური დინამიკით დაიწყო, აქციების ბაზრებზე გაუმჯობესებული მოლოდინების ფონზე ფონდი ლიდერ პოზიციებს ინარჩუნებს, ხოლო 2025 წელს მიღებულმა დაახლოებით 1.4 მლრდ ლარის კონტრიბუციებმა და 800 მლნ ლარის მოგებამ აქტივების მოცულობა მნიშვნელოვნად გაზარდა. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას საქართველოს საპენსიო ფონდის მთავარი საინვესტიციო ოფიცრის მოვალეობის შემსრულებელმა  ანა ნაჭყებიამ განაცხადა ფონდი 2026 წელსაც ძლიერი კონტრიბუციების მოლოდინშია.

„ჩვენთვის 2026 წელიც საკმაოდ პოზიტიურად დაიწყო. გვქონდა დინამიკური პორტფელი წელსაც, ორი თვის მონაცემებითაც ინარჩუნებს ლიდერობას და ამას აქციების ბაზარი უწყობს პირველ რიგში ხელს. აქციების ბაზარზე ზოგადად ბევრი საუბარი იყო რომ რამდენად იყო ეს ხელოვნური ინტელექტის კომპანიების ფასები ადეკვატური, ხომ არ უნდა ველოდოთ ეკონომიკურ კრიზისს ამერიკაში, ევროპაში, თუმცა ამ ეტაპზე მოლოდინები ზოგადად ფინანსურ ბაზრებზე გაუმჯობესებულია, ეს შიში რეცესიის აღარ არის და მოლოდინი აქციების ბაზრების მიმართ საკმაოდ სტაბილური და პოზიტიურია. თუმცა არ გამორიცხავს ეს ვოლატილობას წლის განმავლობაში, რომელსაც ყოველდღიურად ვხედავთ ხოლმე. რაც შეეხება საქართველოში, ჩვენ საკმაოდ მაღალი ტემპით ვიზრდებით, რაც პირდაპირ დაკავშირებულია ეკონომიკურ აქტივობასთან.

მაგალითად, მხოლოდ 2025 წელს ერთის მხრივ 800 მილიონი ლარის მოგება დავწერეთ, თუმცა მეორეს მხრივ დაახლოებით 1.4 მილიარდი ლარის კონტრიბუციები მივიღეთ მონაწილეებისგან. ეს რიცხვი დაახლოებით 20%-ით არის გაზრდილი წინა წლის მონაცემთან შედარებით, რაც ნიშნავს რომ იმ კომპანიების რაოდენობა, იმ ადამიანების რაოდენობა რომლებიც ჩვენთან კონტრიბუციებს აკეთებდნენ ან მათი ხელფასი გაიზარდა და ხელფასების ზრდის მიმართულებითაც პოზიტიური ტენდენცია გვქონდა, ან თვითონ რაოდენობა გაიზარდა იმ კომპანიების რომლებიც ჩვენი სქემის წევრი გახდნენ და  ამან პირდაპირ გავლენა იქონია ჩვენი აქტივების მოცულობაზე.

2026 წელსაც მოლოდინი საკმაოდ პოზიტიური გვაქვს და ჩვენ კონტრიბუციების ჭრილშიც ველოდებით რომ კიდევ ერთი საკმაოდ ძლიერი წელი გვექნება, რაც ნიშნავს რომ უნდა გავაქტიურდეთ როგორც ადგილობრივ ისე საერთაშორისო ბაზრებზე ინვესტირების მიმართულებით და აქაც ვმუშაობთ ფინანსური ბაზრების წარმომადგენლებთან, როგორც ეროვნულ ბანკთან, ეკონომიკის სამინისტროსთან ადგილობრივ წარმომადგენლებთან და ვმუშაობთ დივერსიფიკაციის პროდუქტებზე რათა შევძლოთ კიდევ უფრო საინტერესო, უსაფრთხო აქტივებში ინვესტიცია განვახორციელოთ“, - განაცხადა საქართველოს საპენსიო ფონდის მთავარი საინვესტიციო ოფიცრის მოვალეობის შემსრულებელმა.