2021 წლის შემდეგ საქართველო წარმატებულად დაბრუნდა საერთაშორისო კაპიტალის ბაზარზე, - ამის შესახებ Business Insider Georgia-ს​ თიბისი კაპიტალის დირექტორმა ოთარ შარიქაძემ განუცხადა.  მისი თქმით მოთხოვნამ 5.5-ჯერ გადააჭარბა გამოშვებული ობლიგაციების რაოდენობას, რაც საერთაშორისო ბაზარზე ქართული ფასიანი ქაღალდების მიმართ ინტერესის დადასტურებაა.

„მოხარული ვარ, რომ თიბისი კაპიტალი, როგორც N1 საინვესტიციო ბანკი საქართველოში, ამჯერადაც ჩართული იყო 500 მილიონი დოლარის სახელმწიფო ევროობლიგაციების ემისიაში. მნიშვნელოვანია, რომ ფასიან ქაღალდებზე მოთხოვნამ 5.5-ჯერ გადააჭარბა გამოშვებული ობლიგაციების რაოდენობას, რაც საერთაშორისო ბაზარზე ქართული ფასიანი ქაღალდების მიმართ ინტერესის დადასტურებაა. ეს პოზიტიური სიგნალია ადგილობრივი კერძო კომპანიებისთვისაც, რომლებსაც სურთ, ფინანსები საერთაშორისო ბაზარზე მოიზიდონ. ამაში კი თიბისი კაპიტალის, როგორც საერთაშორისო კაპიტალის ბაზრებზე ყველაზე აქტიური ქართული საინვესტიციო ბანკის, გამოცდილება მნიშვნელოვნად დაეხმარებათ“, - განმარტავს ოთარ შარიქაძე. 

შეგახსენებთ, რომ საქართველოს მთავრობამ წარმატებით განახორციელა 500 მილიონი აშშ დოლარის ოდენობის ევროობლიგაციების გამოშვება ლონდონის საფონდო ბირჟაზე - კუპონის განაკვეთი დაფიქსირდა 5.125% ოდენობით. ფინანსთა სამინისტროს ცნობით, მიმდინარე გამოშვებისას დაფიქსირებული კუპონი, ევროობლიგაციების ბაზრისთვის ყველაზე დაბალი განაკვეთია საქართველოს მსგავსი და ერთი საფეხურით მაღალი საკრედიტო რეიტინგის მქონე სუვერენული ევროობლიგაციებისთვის, ბოლო 4 წელიწადში.

ახლად გამოშვებული ევროობლიგაციებით განხორციელდა 2021 წლის ობლიგაციების რეფინანსირება. გარდა მოზიდული ფინანსური რესურსისა, ახალი ევროობლიგაციის გამოშვება, მნიშვნელოვანია ორი ფაქტორის გამო: ის განსაზღვრავს ქვეყნის რისკის დონეს, ზომავს საერთაშორისო ინვესტორების დაინტერესებასა და ნდობას ქვეყნისა და მისი ეკონომიკის მიმართ.