6 მაისს მონეტარული პოლიტიკის კომიტეტის სხდომა გაიმართება. როგორც ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას საქართველოს საბანკო ასოციაციის ხელმძღვანელმა ალექსანდრე ძნელაძემ აღნიშნა, მაღალი ინფლაციის მიუხედავად, ეროვნული ბანკი მონეტარული პოლიტიკის განაკვეთს სავარაუდოდ, უცვლელად დატოვებს, რადგან მისი თქმით, მოქმედი განაკვეთი უკვე მკაცრ ნიშნულზეა, ეკონომიკური ზრდა კი ძლიერი რჩება.
„განსაკუთრებულს ვერაფერს დავამატებ, რადგან ჩემი პოზიცია „გალთ ენდ თაგარტის“ მოლოდინების იდენტურია. რეალურად, მიზნობრივ მაჩვენებელზე მაღალი ინფლაციის მოლოდინი არც ისე ხელსაყრელი პერსპექტივაა. ეროვნული ბანკის მზაობა, უფრო ფრთხილი იყოს გადაწყვეტილებებში, იძლევა იმის ვარაუდის საშუალებას, რომ ხვალ მონეტარული პოლიტიკის განაკვეთი, წესით, არ უნდა შეიცვალოს.
დღეს მონეტარული პოლიტიკის განაკვეთი არის მკაცრ ნიშნულზე. ანუ ეს არ არის მსუბუქი მონეტარული პოლიტიკის განაკვეთი. ეროვნულმა ბანკმა ერთდროულად მიიღო განაკვეთის შემცირების გადაწყვეტილება, რამაც მნიშვნელოვანი ბიძგი მისცა როგორც დაკრედიტების, ისე ეკონომიკური ზრდის ტემპის დაჩქარებას. როგორც ცნობილია, მკაცრი მონეტარული პოლიტიკა პირდაპირ კორელაციაშია ეკონომიკურ აქტივობასთან. დღეს გვაქვს მოცემულობა, როდესაც ინფლაცია მიზნობრივ მაჩვენებელზე მაღალია, თუმცა, მეორე მხრივ, ეკონომიკური ზრდის ტემპი საკმაოდ კარგ ნიშნულზე ნარჩუნდება. აქედან გამომდინარე, ეროვნული ბანკი არ იჩქარებს განაკვეთის კიდევ უფრო შემცირებით ეკონომიკის წახალისებას. წინასწარი განცხადებაც, რომ მზაობა უფრო ზრდისკენ არის, ვიდრე შემცირებისკენ, იძლევა იმის ვარაუდის საშუალებას, რომ 6 მაისს მონეტარული პოლიტიკის განაკვეთი უცვლელი დარჩება“, - განაცხადა ალექსანდრე ძნელაძემ.