დღეიდან ქვეყნის მასშტაბით სეზონური გრიპის საწინააღმდეგო ვაქცინაცია დაიწყო
დღეიდან ქვეყნის მასშტაბით სეზონური გრიპის საწინააღმდეგო ვაქცინაცია დაიწყო. მომსახურების მისაღებად, მოქალაქეებს შეუძლიათ მიმართონ თავიანთ პოლიკლინიკას, ან იმ ახლომდებარე სამედიცინო დაწესებულებას, რომელიც იმუნიზაციის სახელმწიფო პროგრამაში მონაწილეობს.
ვაქცინაციის მსურველებმა თან უნდა იქონიონ პირადობის დამადასტურებელი დოკუმენტი, რათა სამედიცინო დაწესებულებამ შეძლოს მათი მონაცემების იდენტიფიცირება და აცრის ელექტრონულ სისტემაში აღრიცხვა.
ქვეყანამ 200 000 დოზა ფრანგული წარმოების, სამკომპონენტიანი , (SANOFI WINTHROP INDUSTRIE-ის Vaxigrip) სეზონური გრიპის საწინააღმდეგო ვაქცინა შეიძინა, რომელიც ერთ-ერთია ჯანმოს მიერ პრეკვალიფიცირებულ ვაქცინებს შორის.
გრიპის საწინააღმდეგო ვაქცინაცია რეკომენდებულია ყველა ადამიანისთვის 6 თვის ასაკიდან, თუმცა არსებობს ჯგუფები, რომელთათვისაც გრიპის მძიმე მიმდინარეობისა და გართულებების რისკი განსაკუთრებით მაღალია ესენი არიან: 60 წლის და უფროსი ასაკის პირები, ორსულები, 6 თვიდან 5 წლამდე ასაკის ბავშვები, ქრონიკული დაავადებების მქონე პირები, ონკოლოგიური პაციენტები, სამედიცინო პერსონალი, ასევე ხანდაზმულთა თავშესაფრებისა და პანსიონატების ბენეფიციარები და თანამშრომლები.
ვაქცინა ყველა მოქალაქისთვის უფასოა და სრულად ფინანსდება სახელმწიფოს მიერ. მომსახურება ხელმისაწვდომია როგორც თბილისში, ისე - რეგიონებში.
ვაქცინაციის სერვისის მიმწოდებელი სამედიცინო დაწესებულებებისა და პოლიკლინიკების შესახებ ინფორმაცია იხილეთ მითითებულ ბმულზე:
https://ncdc.ge/#/blog/blog-list/e71d1821-ae8b-46d7-b568-fb40f3ac2c6f
სხვა სიახლეები
სადაზღვევო სექტორს შეუძლია მნიშვნელოვანი წვლილი შეიტანოს ჯანდაცვის სისტემის ეფექტიანობისა და მდგრადობის გაუმჯობესებაში - მიხეილ ჯაფარიძე
13.11.2026.12:40
სადაზღვევო ინდუსტრიაში დაგროვილი ცოდნა, გამოცდილება და მონაცემები მნიშვნელოვანი რესურსია ჯანდაცვის სისტემის ეფექტიანობისა და მდგრადობის გასაძლიერებლად, - ამის შესახებ სადაზღვევო კომპანია „არდის“ გენერალურმა დირექტორმა მიხეილ ჯაფარიძემ საქართველოს ეკონომიკური ფორუმის 33-ე დისკუსიის „საქართველოს ჯანმრთელობის დაცვის პოლიტიკის ახალი შესაძლებლობები“ ფარგლებში განაცხადა.
მისი შეფასებით, სადაზღვევო კომპანიებს აქვთ შესაძლებლობა, ჯანდაცვის სისტემის განვითარებაში უფრო აქტიურად ჩაერთონ და არსებული გამოცდილება სისტემის ეფექტიანობისა და მდგრადობის გაუმჯობესებას მოახმარონ.
„საქართველოს ეკონომიკური ფორუმის ფარგლებში ძალიან კარგი დისკუსია გვქონდა იმაზე, თუ რა შეიძლება გაკეთდეს სადაზღვევო კომპანიების მხრიდან იმისათვის, რომ სისტემას მეტი ეფექტიანობა და მდგრადობა შევთავაზოთ. სადაზღვევო ინდუსტრიაში დაგროვილია ცოდნა, გამოცდილება და მონაცემები, რომლებიც შეიძლება სასარგებლო იყოს იმისათვის, რომ სისტემამ უფრო მდგრადად და ეფექტიანად იმუშაოს“, – განაცხადა მიხეილ ჯაფარიძემ.
მისი თქმით, მნიშვნელოვანია საქართველოს ეკონომიკური ფორუმის ფარგლებში დაწყებული დიალოგის გაგრძელება და განხილული საკითხების კონკრეტულ ნაბიჯებსა და შედეგებში ასახვა.
„მოხარული ვართ, რომ მონაწილეობა მივიღეთ ამ დისკუსიაში და რომ ასეთი ფორმატი არსებობს. ვფიქრობთ, შემდგომი დისკუსიებისთვის ძალიან მნიშვნელოვანია კონკრეტული ნაბიჯების გადადგმა, რომლებიც კონკრეტულ შედეგებამდე მიგვიყვანს“, – აღნიშნა მიხეილ ჯაფარიძემ.
ცნობისთვის, საქართველოს ეკონომიკური ფორუმის 33-ე დისკუსია „საქართველოს ჯანმრთელობის დაცვის პოლიტიკის ახალი შესაძლებლობები“ ჯანდაცვის მინისტრმა მიხეილ სარჯველაძემ გახსნა. ღონისძიებას მოდერატორობას უწევდა „ბიზნეს ინსაიდერი საქართველოსა“ და „საქართველოს ეკონომიკური ფორუმის“ დამფუძნებელი და ხელმძღვანელი გიორგი აბაშიშვილი.
დისკუსიაში მონაწილეობდნენ საქართველოს პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილი, სადაზღვევო კომპანია „გლობალ ბენეფიტს ჯორჯიას“ სამეთვალყურეო საბჭოს თავმჯდომარე ნინა კობახიძე და სადაზღვევო კომპანია „არდის“ გენერალური დირექტორი მიხეილ ჯაფარიძე.
საქართველოს ეკონომიკური ფორუმი ქვეყნის უმსხვილესი პლატფორმაა საჯარო-კერძო დიალოგისთვის.