ჯანდაცვის სისტემის განვითარებისა და მოქალაქეებისთვის ხარისხიან სამედიცინო მომსახურებაზე ხელმისაწვდომობის გაზრდის მიმართულებით სახელმწიფოსა და კერძო სადაზღვევო სექტორს შორის თანამშრომლობის მნიშვნელოვანი შესაძლებლობები არსებობს, - ამის შესახებ სადაზღვევო კომპანია „გლობალ ბენეფიტს ჯორჯიას“ სამეთვალყურეო საბჭოს თავმჯდომარემ ნინა კობახიძემ საქართველოს ეკონომიკური ფორუმის 33-ე დისკუსიის „საქართველოს ჯანმრთელობის დაცვის პოლიტიკის ახალი შესაძლებლობები“ ფარგლებში განაცხადა.

მისი შეფასებით, ჯანდაცვის პოლიტიკის განვითარების პროცესში სადაზღვევო ინდუსტრიის როლი განსაკუთრებით მნიშვნელოვანია, რადგან საყოველთაო ჯანდაცვის სისტემასა და კერძო დაზღვევას შორის თანამშრომლობის არაერთი მიმართულება არსებობს.

„ძალიან საინტერესო ფორმატი იყო, ისევე როგორც სხვა თემები, დღესაც მნიშვნელოვანი საკითხი განვიხილეთ – ჯანდაცვის პოლიტიკის განვითარების ახალი შესაძლებლობები, სადაც სადაზღვევო ინდუსტრია ერთ-ერთ მნიშვნელოვან მოთამაშედ იქნა წარმოჩენილი. საყოველთაო ჯანდაცვისა და სადაზღვევო ინდუსტრიის განვითარების მიმართულებით არსებობს მთელი რიგი გადაკვეთის წერტილები, სადაც სახელმწიფომ და სადაზღვევო ინდუსტრიამ ერთობლივად უნდა იზრუნონ მოქალაქეებისთვის უფრო ხელმისაწვდომი და ხარისხიანი ჯანდაცვის შეთავაზებაზე“, – განაცხადა ნინა კობახიძემ.

მისი თქმით, ფორუმის ფარგლებში არაერთი ინიციატივა გაჟღერდა, მათ შორის სადაზღვევო სექტორის როლის გაძლიერების მიმართულებით. ერთ-ერთი მნიშვნელოვანი საკითხი დაავადებათა პრევენციისა და ჯანმრთელობის მართვის პროცესში კერძო სადაზღვევო კომპანიების უფრო აქტიური ჩართულობაა.

„ჩვენი მხრიდან გაჟღერდა ინიციატივა, რომ სახელმწიფომ სადაზღვევო ინდუსტრია დაავადებათა პრევენციისა და ჯანმრთელობის მართვის მნიშვნელოვან რგოლად განიხილოს. საჭიროა როლების გადანაწილებაზე შეთანხმება, რათა მხოლოდ უკვე დამდგარი დაავადებების მკურნალობის დაფინანსებაზე არ ვიყოთ კონცენტრირებული და მოქალაქეებისთვის პრევენციული ჯანდაცვა უფრო ხელმისაწვდომი და საინტერესო გავხადოთ“, – აღნიშნა მან.

ნინა კობახიძის განმარტებით, მსგავსი მიდგომა, ერთი მხრივ, სადაზღვევო ინდუსტრიის განვითარებასა და ფინანსურ მდგრადობას შეუწყობს ხელს, მეორე მხრივ კი, სახელმწიფოს შესაძლებლობას მისცემს, მოქალაქეებს უფრო მრავალფეროვანი სამედიცინო მომსახურება შესთავაზოს.

მისივე ინფორმაციით, ფორუმზე განხილული ინიციატივების შემდგომი განვითარებისა და სახელმწიფო უწყებებთან კომუნიკაციის მიზნით უახლოეს დღეებში თანამშრომლობის ახალი ფორმატების გამართვა იგეგმება.

„ეს, ერთი მხრივ, ინდუსტრიის განვითარებისა და მდგრადობის უზრუნველყოფას ემსახურება, მეორე მხრივ კი, სახელმწიფო შეძლებს მოქალაქეებისთვის უფრო მეტი სამედიცინო მომსახურების შეთავაზებას. უახლოეს დღეებში უკვე დაიგეგმა ახალი ფორმატები, სადაც ჩვენი ინიციატივების სახელმწიფო სტრუქტურებამდე მიტანას შევძლებთ. ნამდვილად მისასალმებელია, როდესაც სახელმწიფო კერძო სადაზღვევო სექტორის როლს ხედავს ჯანდაცვის სისტემის განვითარების პროცესში“, - განაცხადა ნინა კობახიძემ.

ცნობისთვის, საქართველოს ეკონომიკური ფორუმის 33-ე დისკუსია „საქართველოს ჯანმრთელობის დაცვის პოლიტიკის ახალი შესაძლებლობები“ ჯანდაცვის მინისტრმა მიხეილ სარჯველაძემ გახსნა. ღონისძიებას მოდერატორობას უწევდა „ბიზნეს ინსაიდერი საქართველოსა“ და „საქართველოს ეკონომიკური ფორუმის“ დამფუძნებელი და ხელმძღვანელი გიორგი აბაშიშვილი.

დისკუსიაში მონაწილეობდნენ საქართველოს პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილი, სადაზღვევო კომპანია „გლობალ ბენეფიტს ჯორჯიას“ სამეთვალყურეო საბჭოს თავმჯდომარე ნინა კობახიძე და სადაზღვევო კომპანია „არდის“ გენერალური დირექტორი მიხეილ ჯაფარიძე.

საქართველოს ეკონომიკური ფორუმი ქვეყნის უმსხვილესი პლატფორმაა საჯარო-კერძო დიალოგისთვის.