საქართველოს მთავრობის მოწვევით, ჩინეთის სახალხო რესპუბლიკის ვიცე-პრეზიდენტი, ხან ჭენგი პარასკევიდან კვირის ჩათვლით ოფიციალური ვიზიტით საქართველოს ეწვია - ვიზიტის ფარგლებში მან შეხვედრები გამართა საქართველოს პრეზიდენტ მიხეილ ყაველაშვილსა და პრემიერ-მინისტრ ირაკლი კობახიძესთან, - წერს ჩინეთის სახელმწიფო საინფორმაციო სააგენტო Xinhua. 

მიხეილ ყაველაშვილთან შეხვედრისას ხან ჭენგმა მას ჩინეთის სახალხო რესპუბლიკის თავმჯდომარის, სი ძინპინის გულთბილი მოკითხვა და საუკეთესო სურვილები გადასცა. მან აღნიშნა, რომ საქართველო ჩინეთის პირველი სტრატეგიული პარტნიორია ამიერკავკასიაში და ასევე პირველი ქვეყანაა ევრაზიაში, რომელთანაც ჩინეთმა თავისუფალი ვაჭრობის შეთანხმება გააფორმა.

ხან ჭენგის თქმით, დიპლომატიური ურთიერთობების დამყარებიდან გასული 34 წლის განმავლობაში მხარეები თანმიმდევრულად იცავდნენ ურთიერთპატივისცემის, ურთიერთნდობისა და ორმხრივად მომგებიანი თანამშრომლობის პრინციპებს, რაც ორმხრივი ურთიერთობების ჯანსაღ და სტაბილურ განვითარებას უწყობს ხელს.

მან ხაზი გაუსვა, რომ ამ წლის ივნისში სი ძინპინმა და მიხეილ ყაველაშვილმა ერთობლივად გამოაცხადეს ჩინეთ-საქართველოს ურთიერთობების ყოველმხრივ სტრატეგიულ პარტნიორობამდე ამაღლების შესახებ, რამაც ორმხრივი კავშირების განვითარებაში ახალი ფურცელი გადაშალა და სხვადასხვა სფეროში თანამშრომლობას ახალი იმპულსი მიანიჭა. ჩინეთ-საქართველოს ურთიერთობების განმტკიცება და განვითარება ორი ხალხის ფუნდამენტურ ინტერესებსა და საერთო მისწრაფებებს ემსახურება.

ხან ჭენგმა აღნიშნა, რომ ჩინეთი მზადაა გააძლიეროს კომუნიკაცია და კოორდინაცია საქართველოსთან, ერთობლივად განახორციელოს ორი ქვეყნის ლიდერებს შორის მიღწეული მნიშვნელოვანი კონსენსუსი, შეინარჩუნოს მტკიცე ორმხრივი მხარდაჭერა, გააფართოოს ურთიერთსასარგებლო თანამშრომლობა, ხელი შეუწყოს ხალხთაშორისი კავშირების გაღრმავებას და წინ წასწიოს ჩინეთ-საქართველოს ურთიერთობების განვითარება.

თავის მხრივ, მიხეილ ყაველაშვილმა ხან ჭენგს სთხოვა სი ძინპინისთვის მისი გულწრფელი მოკითხვა და საუკეთესო სურვილები გადაეცა.

პრეზიდენტმა აღნიშნა, რომ საქართველო და ჩინეთი, როგორც ხანგრძლივი ისტორიის მქონე უძველესი ცივილიზაციები, პატივს სცემენ და ენდობიან ერთმანეთს, თანამშრომლობის კავშირები სულ უფრო მყარდება, ხოლო ხალხთაშორისი ურთიერთობები სულ უფრო ინტენსიური ხდება. მან დასძინა, რომ საქართველო დიდ სიამაყეს განიცდის ჩინეთთან თანამშრომლობით.

საქართველოს პრეზიდენტის თქმით, ქვეყანა მზადაა გააღრმავოს თანამშრომლობა ჩინეთთან ყველა სფეროში, რათა ორ ხალხს მეტი სარგებელი და კეთილდღეობა მოუტანოს.

ირაკლი კობახიძესთან შეხვედრისას ხან ჭენგმა განაცხადა, რომ ჩინეთი დიდ მნიშვნელობას ანიჭებს საქართველოსთან ურთიერთობების განვითარებას და მზადაა იყოს საქართველოს მეგობარი და პარტნიორი, რაც ურთიერთპატივისცემით, ურთიერთნდობითა და ორმხრივად მომგებიანი თანამშრომლობით გამოიხატება. მან ხაზი გაუსვა ურთიერთმხარდაჭერის ტრადიციის გაგრძელების აუცილებლობას.

ჩინეთის ვიცე-პრეზიდენტის თქმით, პეკინი მაღალ შეფასებას აძლევს საქართველოს მტკიცე ერთგულებას „ერთი ჩინეთის“ პრინციპისადმი და მის ხანგრძლივ მხარდაჭერას ჩინეთის პოზიციის მიმართ ტაივანის, სინძიანისა და სხვა საკითხებთან დაკავშირებით. მან დასძინა, რომ ჩინეთი, ისევე როგორც ყოველთვის, მხარს დაუჭერს საქართველოს სუვერენიტეტის, უსაფრთხოებისა და განვითარების ინტერესების დაცვაში.

მისი თქმით, მხარეებმა ხელი უნდა შეუწყონ საერთაშორისო სამართლიანობას, შეინარჩუნონ მჭიდრო კოორდინაცია მრავალმხრივ ფორმატებში, განახორციელონ ჭეშმარიტი მულტილატერალიზმი, დაიცვან თავისუფალი ვაჭრობა და უზრუნველყონ ორი ქვეყნისა და გლობალური სამხრეთის ერების საერთო ინტერესები.

თავის მხრივ, ირაკლი კობახიძემ აღნიშნა, რომ საქართველო მაღალ შეფასებას აძლევს ჩინეთთან პარტნიორობასა და მეგობრობას, ყოველთვის დაიცავს „ერთი ჩინეთის“ პრინციპს და მხარს დაუჭერს ჩინეთს სუვერენიტეტისა და ტერიტორიული მთლიანობის დაცვაში. მან მადლობა გადაუხადა ჩინეთს საქართველოს სუვერენიტეტისა და დამოუკიდებლობის პატივისცემისთვის, ასევე იმ ღირებული მხარდაჭერისთვის, რომელსაც პეკინი წლების განმავლობაში უწევს საქართველოს.

საქართველოს პრემიერ-მინისტრმა ხაზგასმით აღნიშნა, რომ საქართველო მზადაა ითანამშრომლოს ჩინეთთან ორი ქვეყნის ლიდერებს შორის მიღწეული კონსენსუსის შესასრულებლად, კიდევ უფრო გააღრმავოს პოლიტიკური ურთიერთნდობა, განაახლოს სავაჭრო პარტნიორობა, ხელი შეუწყოს „სარტყლისა და გზის“ ინიციატივის ფარგლებში თანამშრომლობას და განამტკიცოს კავშირები კულტურის, განათლების, მეცნიერების, სპორტის, ჯანდაცვის, სოფლის მეურნეობის, გარემოს დაცვისა და ტურიზმის მიმართულებით.

მან დასძინა, რომ საქართველო ახალისებს ჩინურ საწარმოებს ქვეყანაში ინვესტიციების განხორციელებისა და საქმიანობისკენ და მათთვის საიმედო ბიზნესგარემოს უზრუნველყოფს.

კობახიძის თქმით, რთული საერთაშორისო ვითარების ფონზე, ჩინეთი ერთგულია მშვიდობისა და განვითარების ხელშეწყობისადმი და მნიშვნელოვან როლს ასრულებს გლობალურ ასპარეზზე. მან აღნიშნა, რომ საქართველოს სურს ისწავლოს ჩინეთისგან, ყურადღება გაამახვილოს განვითარებასა და პროგრესზე და ხელი ხელს ჩაკიდებული ითანამშრომლოს გლობალური მშვიდობისა და კეთილდღეობის შეიტანად.

საქართველოში ყოფნისას, ხან ჭენგი ირაკლი კობახიძესთან ერთად დაესწრო ჩინეთისა და საქართველოს ბიზნესწრეების მიერ ორგანიზებულ მიღებას და სიტყვით გამოვიდა. ჩინეთის ვიცე-პრეზიდენტმა განაცხადა, რომ ჩინეთი უცვლელად ადგას ღიაობისა და მაღალი ხარისხის განვითარების გზას, რაც ფართო საბაზრო შესაძლებლობებს ქმნის ყველა ქვეყნის, მათ შორის საქართველოს საწარმოებისთვის.

მან იმედი გამოთქვა, რომ ორი ქვეყნის ბიზნესსექტორი გააგრძელებს მნიშვნელოვანი ხიდის როლის შესრულებას, ხელიდან არ გაუშვებს შესაძლებლობებს და გააღრმავებს თანამშრომლობას, რაც წვლილს შეიტანს ჩინეთ-საქართველოს ყოველმხრივი სტრატეგიული პარტნიორობის განვითარებაში.