ეკონომიკური პოლიტიკის კომიტეტმა „წყალმომხმარებელთა ორგანიზაციების შესახებ" კანონში ცვლილებას მხარი დაუჭირა

პოლიტიკა

ფართოვდება სანდო უცხოური ბანკის შემოსვლის შესაძლებლობა - გამარტივებული ლიცენზირების შესაძლებლობა აღარ იქნება მიბმული მხოლოდ განვითარებული ქვეყნების ვიწრო ჩამონათვალზე | შოთა ბერეკაშვილი

09.11.2026.15:33

საქართველოს პარლამენტის საფინანსო-საბიუჯეტო კომიტეტმა „კომერციული ბანკების საქმიანობის შესახებ“ კანონში ცვლილება, თანმდევ პროექტთან ერთად, პირველი მოსმენით განიხილა და მხარი დაუჭირა.

მომხსენებლის, ეკონომიკური პოლიტიკის კომიტეტის თავმჯდომარის, შოთა ბერეკაშვილის განცხადებით, კანონპროექტით იხვეწება საბანკო საქმიანობის ლიცენზირების პროცედურები.

„ლიცენზირებისას მცირდება დოკუმენტაციის წარდგენის ტვირთი. ყველა მცირე აქციონერის შესახებ დეტალური დოკუმენტაციის ნაცვლად, მოთხოვნა მნიშვნელოვანი წილის მფლობელზე იქნება კონცენტრირებული. ამავე დროს, ეროვნულ ბანკს კვლავ ექნება სრული ინფორმაცია მფლობელებისა და ჯგუფის სტრუქტურის შესახებ. ასევე, ფართოვდება სანდო უცხოური ბანკის შემოსვლის შესაძლებლობა. გამარტივებული ლიცენზირების შესაძლებლობა აღარ იქნება მიბმული მხოლოდ განვითარებული ქვეყნების ვიწრო ჩამონათვალზე. სანდო ქვეყნის ნუსხას ან მათი განსაზღვრის პრინციპებს, მისაღები რეიტინგის დონეს, ეროვნული ბანკი საერთაშორისო სარეიტინგო ორგანიზაციებზე დაყრდნობით განსაზღვრავს“, - აღნიშნა შოთა ბერეკაშვილმა.

მისი თქმით, ზუსტდება მნიშვნელოვანი წილის ცნება და მფლობელის გამჭვირვალობის მოთხოვნები, უფრო მოქნილი ხდება ადმინისტრატორების პარალელური პოზიციების დათვლის წესი. ცვლილება ეხება მნიშვნელოვანი წილის განმარტებასაც.

ეკონომიკური პოლიტიკის კომიტეტის თავმჯდომარის განცხადებით, ცვლილება შედის ასევე „მიკრობანკების საქმიანობის შესახებ“ კანონში. მისი განმარტებით, ცვლილების მიზანი მიკრობანკების მარეგულირებელი ჩარჩოს კომერციული ბანკების რეგულაციებთან დაახლოება და საქმიანობის შესაძლებლობების გაფართოებაა.

„ეს ცვლილება მიკრობანკებს საშუალებას მისცემს, უფრო აქტიურად გაუწიონ კონკურენცია სხვა ფინანსურ ინსტიტუტებს და მომხმარებლებს მეტი კონკურენტული პროდუქტი შესთავაზონ“, - განაცხადა შოთა ბერეკაშვილმა.