კარგია, რომ შრომის ბაზრის კვლევის შესაბამისად იქნება გამოცხადებული კვოტები - ტექნიკური უნივერსიტეტის რექტორი
აუცილებელია, ამას ჩვენ ძალიან დიდი ხანია ველოდებოდით, - განაცხადა ტექნიკური უნივერსიტეტის რექტორმა დავით გურგენიძემ, შრომის ბაზრის კვლევასთან დაკავშირებით, რომლის შედეგებიც დღეს პრემიერ-მინისტრმა უმაღლესი სასწავლებლების რექტორებს და ბიზნესის წარმომადგენლებს გააცნო.
დავით გურგენიძის თქმით, კარგია, რომ კვლევის შედეგების მიხედვით განისაზღვრება სასწავლებლებში შესაბამისი კვოტები.
„კვლევები აუცილებელი იყო, შედეგები სახეზე გვაქვს. მინდა გითხრათ ტექნიკური უნივერსიტეტის მაგალითზე, ეს არის წინ გადადგმული ნაბიჯი. კარგია, რომ მთავრობამ ეს გააკეთა და ამ კვლევების შესაბამისად იქნება უკვე გამოცხადებული კვოტები“, - განაცხადა დავით გურგენიძემ.
პრემიერ - მინისტრმა შრომის ბაზრის კვლევის კონკრეტული დეტალები განმარტა. კვლევის მიზანია განისაზღვროს უნივერსიტეტებში სპეციალობების მიხედვით კვოტების გადანაწილება. კვლევა ეკონომიკის სამინისტრომ განათლების სამინისტროსთან ერთად ჩაატარა. პროცესში ჩართული იყო ბიზნესასოციაციაც. გამოიკითხა 12 500 საწარმო; ასევე, ჩატარდა კვლევა საჯარო სექტორში სამუშაო ძალის მოთხოვნილებაზე. როგორც პრემიერ მინისტრმა აღნიშნა, კვლევის შედეგები შემაშფოთებელია. შრომის ბაზარზე არსებულ მოთხოვნილებასა და სტუდენტების ჩარიცხვას შორის მკვეთრი დისბალანსია.
სხვა სიახლეები
საქართველოს სახელმწიფო ინსტიტუტების ეფექტიან მუშაობას ადასტურებს ის გარემოებაც, რომ დღემდე საქართველოს ტერიტორიაზე ევროკავშირის სანქციების გვერდის ავლის არცერთი ფაქტი არ დაფიქსირებულა - საგარეო საქმეთა სამინისტრო
24.07.2026.16:24
საქართველოს სახელმწიფო ინსტიტუტების ეფექტიან მუშაობას ადასტურებს ის გარემოებაც, რომ დღემდე საქართველოს ტერიტორიაზე ევროკავშირის სანქციების გვერდის ავლის არცერთი ფაქტი არ დაფიქსირებულა, - ნათქვამია საგარეო უწყების მიერ გავრცელებულ განცხადებაში.
როგორც უწყების განცხადებაშია აღნიშნული, საქართველო სრულად ითვალისწინებს ევროკავშირის მიერ დაწესებულ სასანქციო რეჟიმს, ამ რეჟიმის კონტექსტს და იღებს ყველა ზომას, რათა საქართველოს ტერიტორია არ იქნეს გამოყენებული სანქციების გვერდის ავლისთვის.
„საქართველოს საგარეო საქმეთა სამინისტრო გამოხატავს წუხილს ევროკავშირის სანქციების 21-ე პაკეტში ყულევის ნავთობგადამამუშავებელი ქარხნის შეტანის შესახებ მიღებულ გადაწყვეტილებასთან დაკავშირებით.
საქართველო სრულად ითვალისწინებს ევროკავშირის მიერ დაწესებულ სასანქციო რეჟიმს, ამ რეჟიმის კონტექსტს და იღებს ყველა ზომას, რათა საქართველოს ტერიტორია არ იქნეს გამოყენებული სანქციების გვერდის ავლისთვის. ევროკავშირთან ამ მიმართულებით თანამშრომლობა ეფუძნება გამჭვირვალობისა და ღიაობის პრინციპებს. ამ თანამშრომლობის ფარგლებში, საქართველოს შესაბამისი უწყებები მუდმივად უზრუნველყოფენ ევროკავშირის ინსტიტუტებისთვის ყველა საჭირო ინფორმაციისა და განმარტების დროულად მიწოდებას.
საქართველოს სახელმწიფო ინსტიტუტების ეფექტიან მუშაობას ადასტურებს ის გარემოებაც, რომ დღემდე საქართველოს ტერიტორიაზე ევროკავშირის სანქციების გვერდის ავლის არცერთი ფაქტი არ დაფიქსირებულა.
ევროკავშირის სანქციების 21-ე პაკეტის მომზადების პროცესში, ქართულმა მხარემ ევროკომისიას წარუდგინა ამომწურავი ინფორმაცია და შესაბამისი დოკუმენტაცია, რომელიც ერთმნიშვნელოვნად ადასტურებს, რომ ყულევის ნავთობგადამამუშავებელი ქარხნის სანქციების ჩამონათვალში შეტანას არავითარი ფაქტობრივი და სამართლებრივი საფუძველი არა აქვს.
საქართველოს საგარეო საქმეთა სამინისტრო იმედოვნებს, რომ ევროკომისიის შესაბამისი სამსახურები და ევროკავშირის წევრი სახელმწიფოები გადაწყვეტილებით განსაზღვრული ექვსთვიანი პერიოდის განმავლობაში იხელმძღვანელებენ სამართლიანობის პრინციპით და გადახედავენ გადაწყვეტილებას.
საქართველო კვლავაც მზად არის ევროკავშირის ინსტიტუტებთან თანამშრომლობისა და მათთვის ყველა საჭირო ინფორმაციის გაზიარებისათვის“, - აცხადებს საქართველოს საგარეო საქმეთა სამინისტრო.
