პატრიარქის გარდაცვალება ეროვნულ ტკივილთან ერთად ყველასთვის პირად ტკივილად აღიქმება, რამაც შეძლო ჩვენი ერის გაერთიანება - კონსტანტინე ზარნაძე
თბილისის საკრებულოს სხდომაზე, რომელიც სრულიად საქართველოს კათოლიკოს-პატრიარქის, უწმინდესის და უნეტარესის, ილია მეორის, ხსოვნის პატივსაცემად წუთიერი დუმილით დაიწყო, პატრიარქის ღვაწლის შესახებ საკუთარი მოსაზრება საკრებულოს გარემოს დაცვის კომისიის თავმჯდომარემ, კონსტანტინე ზარნაძემ, გამოთქვა. როგორც მან განაცხადა, ამ დიდმა ტკივილმა გააერთიანა საქართველო.
კონსტანტინე ზარნაძემ განსაკუთრებული მადლობა გადაუხადა მუსლიმი თემის წარმომადგენლებს, რომლებმაც უდიდესი მუსლიმური დღესასწაულების აღნიშვნაზე უარი თქვეს.
„ჩვენ დაგვტოვა ჩვენმა უწმინდესმა და უნეტარესმა ილია მეორემ. მე ვფიქრობ, მისი გარდაცვალება ეროვნულ ტკივილთან ერთად ყველასთვის პირად ტკივილად აღიქმება, რამაც შეძლო ჩვენი ერის გაერთიანება. ამ მძიმე დღეებმა კიდევ ერთხელ გვაჩვენა, თუ რამდენად ძლიერია ჩვენი ერი, როდესაც განსაცდელის წინაშე ვდგავართ. განსხვავებების მიუხედავად, ჩვენ შევძელით გაერთიანება რწმენით, სიყვარულით და ერთმანეთის პატივისცემით. სწორედ ამ ერთობაშია ჩვენი რეალური ძალა.
განსაკუთრებული მადლობა მინდა გადავუხადო ჩვენს თანამემამულე მუსლიმებს, რომლებმაც უარი თქვეს ნოვრუზ და რამაზან ბაირამის დღესასწაულების სადღესასწაულო გარემოში აღნიშვნაზე და შემოუერთდნენ საერთო გულისტკივილს, რომელსაც გასული დღეების განმავლობაში მთელი ერი ვატარებდით. ეს არის მაგალითი იმისა, თუ რას ნიშნავს ნამდვილი თანაცხოვრება და ურთიერთპატივისცემა. ასევე მინდა ამ ერთიანობის გამო მადლობა გადავუხადო ყველა სხვა კონფესიის წარმომადგენლებს, რომლებმაც გაიზიარეს ჩვენი ტკივილი და კიდევ ერთხელ დადასტურდა, რომ მრავალფეროვნება ჩვენი ძლიერი მხარეა“, - განაცხადა კონსტანტინე ზარნაძემ.
საკრებულოს გარემოს დაცვის კომისიის თავმჯდომარემ აღნიშნა, რომ პატრიარქის დანაბარები უნდა შევასრულოთ.
„მე ვფიქრობ, ჩვენი ვალია პატრიარქის დანაბარები, რომელიც მან თავისი სიცოცხლით და ქმედებებით გამოხატა, რომ ვყოფილიყავით ერთიანები, ძლიერები, გვქონოდა ერთმანეთის პატივისცემა, აღვასრულოთ. სწორედ მაშინ იქნება მისი სული ბედნიერი, მისი რეალური საქმე - გაკეთებული. დარწმუნებული ვარ, ამ დიდი ეპოქის დასასრულს ექნება ძალიან დადებითი გავლენა ჩვენი ქვეყნის განვითარებისთვის“, - განაცხადა კონსტანტინე ზარნაძემ.
ინფორმაციას საკრებულოს პრესსამსახური ავრცელებს.
დღის ტოპ 10 სიახლე
სხვა სიახლეები
თანამედროვე ტექნოლოგიური ინფრასტრუქტურა, ძლიერი უნივერსიტეტი და საერთაშორისო დაკავშირებადობა ქმნის უნიკალურ შესაძლებლობას, ქუთაისი გახდეს ქალაქი, სადაც ცოდნა გარდაიქმნება ინოვაციად, ინოვაცია - ბიზნესად, ბიზნესი კი - შექმნის ახალ სამუშაო ადგილებს და ხელს შეუწყობს ეკონომიკურ ზრდას l ირაკლი კობახიძე
24.07.2026.22:02
ქუთაისი ყოველთვის იყო განათლების, მეცნიერებისა და კულტურის ერთ-ერთი უმნიშვნელოვანესი კერა ჩვენს ქვეყანაში. დღეიდან კი, ტექნოლოგიური ჰაბის გახსნით, ქუთაისი ასევე ხდება საქართველოს ტექნოლოგიური განვითარების ერთ-ერთი მთავარი ცენტრი, - ამის შესახებ საქართველოს პრემიერ-მინისტრმა ირაკლი კობახიძემ ქუთაისის ტექნოლიგური ჰაბის გახსნის ღონისძიებაზე სიტყვით გამოსვლისას განაცხადა.
როგორც მთავრობის მეთაურმა აღნიშნა, თანამედროვე ტექნოლოგიური ეკოსისტემისთვის არანაკლებ მნიშვნელოვანია არა მხოლოდ ციფრული, არამედ ფიზიკური დაკავშირებადობა.
„აქ იფუნქციონირებს საქართველოს ყველაზე დიდი ტექნოპარკი, ინტერაქციული სამეცნიერო და ტექნოლოგიური მუზეუმი, TUMO-ს საერთაშორისო ტექნოლოგიური სკოლა, ხელოვნური ინტელექტის გამოთვლითი ცენტრი, სტარტაპებისთვის განკუთვნილი სივრცეები და თანამედროვე ლაბორატორიები - რობოტიკის, ელექტრონიკის, დრონების, ხელოვნური ინტელექტის, ვირტუალური რეალობისა და სხვა მიმართულებებით.
ამ ეკოსისტემის განუყოფელი ნაწილი გახდება ქუთაისის საერთაშორისო უნივერსიტეტი, ვინაიდან ძლიერი ტექნოლოგიური ჰაბი ძლიერი უნივერსიტეტის, კვლევითი გარემოსა და კვალიფიციური ადამიანური რესურსის გარეშე ბუნებრივია, ვერ განვითარდება. ქუთაისის საერთაშორისო უნივერსიტეტი კი ქმნის სწორედ იმ აკადემიურ და სამეცნიერო საფუძველს, რომელიც ჰაბს მისცემს შესაძლებლობას, გახდეს არა მხოლოდ სასწავლო და სამუშაო სივრცე, არამედ კვლევის, ახალი ცოდნისა და მაღალტექნოლოგიური პროდუქტების შექმნის ცენტრი.
თანამედროვე ტექნოლოგიური ეკოსისტემისთვის არანაკლებ მნიშვნელოვანია არა მხოლოდ ციფრული, არამედ ფიზიკური დაკავშირებადობა. ქუთაისის საერთაშორისო აეროპორტი ქუთაისის ტექნოლოგიურ ჰაბს ხელს შეუწყობს, არა მხოლოდ ეროვნულ, არამედ რეგიონული მნიშვნელობის ტექნოლოგიურ ცენტრად ჩამოყალიბდეს.
თანამედროვე ტექნოლოგიური ინფრასტრუქტურა, ძლიერი უნივერსიტეტი და საერთაშორისო დაკავშირებადობა ქმნის უნიკალურ შესაძლებლობას, ქუთაისი გახდეს ქალაქი, სადაც ცოდნა გარდაიქმნება ინოვაციად, ინოვაცია - ბიზნესად, ბიზნესი კი - შექმნის ახალ სამუშაო ადგილებს და ხელს შეუწყობს ეკონომიკურ ზრდას.
მინდა, მადლობა გადავუხადო ყველას, ვინც ჩართული იყო ამ პროექტის წარმატებით განხორციელებაში. პირველ რიგში, მადლობა ეკუთვნის ეკონომიკის სამინისტროს, საქართველოს ეკონომიკის მინისტრ მარიამ ქვრივიშვილს. მადლობა მინისტრის მოადგილეებს, მადლობა ჯიტას, ინოვაციების და ტექნოლოგიების სააგენტოს. კიდევ ერთხელ დიდი მადლობა თითოეულ იმ ადამიანს, რომელიც ჩართული იყო ამ ძალიან მნიშვნელოვანი პროექტის წარმატებით განხორციელებაში. მინდა, მოგილოცოთ დღევანდელი დღე და ყველას მინდა წარმატებები გისურვოთ", - განაცხადა ირაკლი კობახიძემ.
