საქართველოს მთავრობის ადმინისტრაციის უფროსი UNFPA-ს აღმოსავლეთ ევროპისა და ცენტრალური აზიის რეგიონულ დირექტორს შეხვდა
საქართველოს მთავრობის ადმინისტრაციის უფროსი ლევან ჟორჟოლიანი გაეროს მოსახლეობის ფონდის აღმოსავლეთ ევროპისა და ცენტრალური აზიის რეგიონულ დირექტორს, ფლორენს ბაუერს შეხვდა, - ინფორმაციას საქართველოს მთავრობა ავრცელებს.
უწყების ცნობით, მხარეებმა მიმდინარე და სამომავლო თანამშრომლობის საკითხები განიხილეს. აღინიშნა, რომ გაეროს სააგენტოების ერთობლივ ძალისხმევას მნიშვნელოვანი წვლილი შეაქვს საქართველოს მდგრად განვითარებასა და ინსტიტუციურ პროგრესში.
„შეხვედრისას, ხაზი გაესვა გაეროს მოსახლეობის ფონდის მნიშვნელოვან როლს ადამიანის უფლებების დაცვის სახელმწიფო პოლიტიკის დოკუმენტების შემუშავების პროცესში. მათ შორის, ყურადღება დაეთმო საქართველოს მთავრობის ძალისხმევას ქალთა უფლებების დაცვისა და გაძლიერების მიმართულებით.
საუბარი შეეხო ქვეყანაში დემოგრაფიული კუთხით არსებულ მდგომარეობას და აღნიშნული გამოწვევის დასაძლევად გადასადგმელ ნაბიჯებს, მათ შორის, შესაბამისი პოლიტიკის დოკუმენტების შემუშავებისა და საკანონმდებლო ცვლილებების განხორციელების ნაწილში.
აღინიშნა, რომ ქვეყანას მნიშვნელოვანი პროგრესი აქვს ადამიანის უფლებების სამოქმედო გეგმის განხორციელების კუთხით.
შეხვედრისას, კიდევ ერთხელ გაესვა ხაზი გაეროს მდგრადი განვითარების თანამშრომლობის ჩარჩოს (2026-2030) ფარგლებში არსებულ ნაყოფიერ პარტნიორობას და ითქვა, რომ დოკუმენტი განვითარების პროგრამების ეროვნულ პრიორიტეტებთან და მდგრადი განვითარების მიზნებთან შესაბამისობაში მოყვანაზეა ორიენტირებული“, - აღნიშნულია გავრცელებულ ინფორმაციაში.
სხვა სიახლეები
საქართველოს სახელმწიფო ინსტიტუტების ეფექტიან მუშაობას ადასტურებს ის გარემოებაც, რომ დღემდე საქართველოს ტერიტორიაზე ევროკავშირის სანქციების გვერდის ავლის არცერთი ფაქტი არ დაფიქსირებულა - საგარეო საქმეთა სამინისტრო
24.07.2026.16:24
საქართველოს სახელმწიფო ინსტიტუტების ეფექტიან მუშაობას ადასტურებს ის გარემოებაც, რომ დღემდე საქართველოს ტერიტორიაზე ევროკავშირის სანქციების გვერდის ავლის არცერთი ფაქტი არ დაფიქსირებულა, - ნათქვამია საგარეო უწყების მიერ გავრცელებულ განცხადებაში.
როგორც უწყების განცხადებაშია აღნიშნული, საქართველო სრულად ითვალისწინებს ევროკავშირის მიერ დაწესებულ სასანქციო რეჟიმს, ამ რეჟიმის კონტექსტს და იღებს ყველა ზომას, რათა საქართველოს ტერიტორია არ იქნეს გამოყენებული სანქციების გვერდის ავლისთვის.
„საქართველოს საგარეო საქმეთა სამინისტრო გამოხატავს წუხილს ევროკავშირის სანქციების 21-ე პაკეტში ყულევის ნავთობგადამამუშავებელი ქარხნის შეტანის შესახებ მიღებულ გადაწყვეტილებასთან დაკავშირებით.
საქართველო სრულად ითვალისწინებს ევროკავშირის მიერ დაწესებულ სასანქციო რეჟიმს, ამ რეჟიმის კონტექსტს და იღებს ყველა ზომას, რათა საქართველოს ტერიტორია არ იქნეს გამოყენებული სანქციების გვერდის ავლისთვის. ევროკავშირთან ამ მიმართულებით თანამშრომლობა ეფუძნება გამჭვირვალობისა და ღიაობის პრინციპებს. ამ თანამშრომლობის ფარგლებში, საქართველოს შესაბამისი უწყებები მუდმივად უზრუნველყოფენ ევროკავშირის ინსტიტუტებისთვის ყველა საჭირო ინფორმაციისა და განმარტების დროულად მიწოდებას.
საქართველოს სახელმწიფო ინსტიტუტების ეფექტიან მუშაობას ადასტურებს ის გარემოებაც, რომ დღემდე საქართველოს ტერიტორიაზე ევროკავშირის სანქციების გვერდის ავლის არცერთი ფაქტი არ დაფიქსირებულა.
ევროკავშირის სანქციების 21-ე პაკეტის მომზადების პროცესში, ქართულმა მხარემ ევროკომისიას წარუდგინა ამომწურავი ინფორმაცია და შესაბამისი დოკუმენტაცია, რომელიც ერთმნიშვნელოვნად ადასტურებს, რომ ყულევის ნავთობგადამამუშავებელი ქარხნის სანქციების ჩამონათვალში შეტანას არავითარი ფაქტობრივი და სამართლებრივი საფუძველი არა აქვს.
საქართველოს საგარეო საქმეთა სამინისტრო იმედოვნებს, რომ ევროკომისიის შესაბამისი სამსახურები და ევროკავშირის წევრი სახელმწიფოები გადაწყვეტილებით განსაზღვრული ექვსთვიანი პერიოდის განმავლობაში იხელმძღვანელებენ სამართლიანობის პრინციპით და გადახედავენ გადაწყვეტილებას.
საქართველო კვლავაც მზად არის ევროკავშირის ინსტიტუტებთან თანამშრომლობისა და მათთვის ყველა საჭირო ინფორმაციის გაზიარებისათვის“, - აცხადებს საქართველოს საგარეო საქმეთა სამინისტრო.
