საქართველოს მთავრობის ადმინისტრაციის უფროსმა ინტელექტუალური საკუთრების თემაზე საერთაშორისო კონფერენცია გახსნა
საქართველოს მთავრობის ადმინისტრაციის უფროსმა ლევან ჟორჟოლიანმა საერთაშორისო კონფერენცია, სახელწოდებით: „კვლევებიდან შედეგებამდე – პატენტების როლი ტექნოლოგიების გადაცემაში" გახსნა.
ლევან ჟორჟოლიანმა, სიტყვით გამოსვლისას, საქართველოს მთავრობასა და ევროპის საპატენტო ორგანიზაციას შორის არსებულ ნაყოფიერ თანამშრომლობას გაუსვა ხაზი და აღნიშნა, რომ ევროპის საპატენტო უწყებასთან პარტნიორობა წარმოადგენს მნიშვნელოვან საფუძველს საქართველოში სისტემის შემდგომი განვითარებისა და ევროპულ სტანდარტებთან კიდევ უფრო დაახლოებისთვის.
„საქართველოს მთავრობასა და ევროპის საპატენტო ორგანიზაციას შორის გაფორმებულია ევროპული პატენტების ვალიდაციის შეთანხმება, რომელიც წარმოადგენს არა მხოლოდ სამართლებრივ მექანიზმს ევროპული პატენტების საქართველოში ვალიდაციისათვის, არამედ თანამშრომლობის მნიშვნელოვან პლატფორმას საქართველოსა და ევროპის საპატენტო უწყებას შორის. 2025 წელს საქართველომ გამოხატა ინტერესი ევროპის საპატენტო კონვენციასთან მიერთების თაობაზე. კონვენციასთან მიერთება ევროპის საპატენტო ორგანიზაციაში გაწევრიანებასაც ნიშნავს, რაც თავის მხრივ გულისხმობს საქართველოს ევროპის საპატენტო სივრცეში სრულ ინტეგრაციას,"- აღნიშნა ლევან ჟორჟოლიანმა.
მისივე თქმით, პატენტი, წარმოადგენს არა მხოლოდ სამართლებრივ მექანიზმს, არამედ ეკონომიკური პოლიტიკის მნიშვნელოვან ინსტრუმენტს, რომელიც ქმნის პროგნოზირებად და სანდო გარემოს ინოვატორებისთვის, ბიზნესისთვის და ინვესტორებისთვის.
„საქართველოსთვის პრიორიტეტულია ძლიერი და კონკურენტუნარიანი ინოვაციური ეკოსისტემის ჩამოყალიბება, რაც მოითხოვს როგორც სამართლებრივი ჩარჩოს სრულყოფას, ასევე ინსტიტუციური შესაძლებლობების გაძლიერებას. ამ კონტექსტში, მნიშვნელოვანია არამხოლოდ ძლიერი სამართლებრივი ჩარჩოს არსებობა, რომლის შექმნისთვის არაერთი ნაბიჯი გადაიდგა ბოლო წლებში, არამედ საპატენტო სისტემის ინტეგრირება ინოვაციის, ბიზნესის განვითარებისა და ინვესტიციების მხარდაჭერის პროცესში,"- აღნიშნა საქართველოს მთავრობის ადმინისტრაციის უფროსმა.
კონფერენციაზე სიტყვით გამოვიდნენ საქართველოს განათლებისა და მეცნიერების მინისტრი გივი მიქანაძე, პარლამენტის თავმჯდომარის მოადგილე ნინო წილოსანი, „საქპატენტის" თავმჯდომარე სოსო გიორგაძე, ევროპის საპატენტო უწყების (EPO) პრეზიდენტო ანტონიო კამპინოსი და EPO-ის აკადემიის მთავარი დირექტორი ხავიერ სეუბა.
საერთაშორისო კონფერენციაში სახელმწიფო უწყებების, საერთაშორისო ორგანიზაციების, აკადემიური წრეებისა და ინოვაციებისა და ტექნოლოგიების სფეროს წარმომადგენლები მონაწილეობდნენ.
დღის ტოპ 10 სიახლე
სხვა სიახლეები
სინგაპურში ბიზნესის წარმომადგენლებთან გამართული შეხვედრა ხელს შეუწყობს საქართველოში ახალი ინვესტორების მოზიდვას, რაც ჩვენთვის ძალიან საინტერესო იქნება სხვადასხვა მიმართულებით, მათ შორის, ე.წ. ფინტექ-ის, საინფორმაციო ტექნოლოგიების, ხელოვნური ინტელექტის დანერგვის მიმართულებით - ირაკლი კობახიძე
23.07.2026.14:37
სინგაპურში ჩვენ გვქონდა შეხვედრა ბიზნესის წარმომადგენლებთან, სადაც ვისაუბრეთ ბიზნესებს შორის ურთიერთობებსა და საქართველოში ინვესტიციების მნიშვნელობაზე, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს სინგაპურში განუცხადა.
მისივე თქმით, საქართველოში დღეს წარმატებით ოპერირებს 30-მდე კომპანია სინგაპურიდან.
„დაახლოებით 30-მდე კომპანიაა სინგაპურიდან, რომელიც დღეს ოპერირებს საქართველოში და მათ აქვთ ძალიან წარმატებული გამოცდილება საქართველოში ბიზნესის კეთების. რა თქმა უნდა, ეს გამოცდილება გავუზიარეთ სხვა კომპანიებსაც და დარწმუნებულები ვართ, რომ ეს შეხვედრა ხელს შეუწყობს საქართველოში ახალი ინვესტორების მოზიდვას სინგაპურიდან, რაც იქნება ჩვენთვის ძალიან საინტერესო სხვადასხვა მიმართულებით, მათ შორის, ე.წ. ფინტექ-ის, საინფორმაციო ტექნოლოგიების მიმართულებით, ხელოვნური ინტელექტის დანერგვის კუთხით ძალიან საინტერესო იქნება სინგაპურთან თანამშრომლობა,"- აღნიშნა პრემიერმა.
