სოფელ გლდანიდან სარაჯიშვილის გამზირამდე ახალი მარშრუტი ამოქმედდა - შალვა ოგბაიძე
თბილისის საკრებულოს სატრანსპორტო საკითხთა კომისიის თავმჯდომარემ საკრებულოს სხდომაზე საზოგადოებრივ ტრანსპორტთან დაკავშირებული პოზიტიურ მიმართულებებზე ისაუბრა.
როგორც შალვა ოგბაიძემ აღნიშნა, დღესდღეობით, დედაქალაქში კვლავ არსებობს საზოგადოებრივი ტრანსპორტით დაუფარავი რამდენიმე ზონა.
მათ შორის, ერთ-ერთი, კერძოდ, სოფელი გლდანიდან სარაჯიშვილის გამზირამდე უკვე დაიფარა.
ახალი სამარშრუტო ხაზი N560 მოძრაობას დაიწყებს ალექსანდრე ყაზბეგისა და იმერეთის ქუჩების გადაკვეთის მიმდებარე ტერიტორიიდან, გაივლის ალექსანდრე ყაზბეგის, ქაქუცა ჩოლოყაშვილის, 26 მაისის, დავით აღმაშენებლის, მიხეილ გამკაძის, გელა ოჩიაურის, ბარბარე ერისთავი-ჯორჯაძის ქუჩებს, შემდეგ ელეფთერ ანდრონიკაშვილის I შესახვევიდან დაუკავშირდება დავით სარაჯიშვილის გამზირს და მოძრაობას დაასრულებს სარაჯიშვილის გამზირის N47-ის მიმდებარე ტერიტორიაზე.
მისივე თქმით, პროცესი გრძელდება და ამ ეტაპზე მოხდება ავჭალა 2-ისა და სოფელი გლდანის ერთ-ერთი ქუჩის, კულა გლდანელის ქუჩის მოსახლეობის სატრანსპორტო ჰაბთან დაკავშირება.
„ამავდროულად იგეგმება სამოცდაათი 18 მეტრიანი ავტობუსის ხაზზე გაშვებაც, რაც გამოიწვევს გარკვეული რაოდენობის 10 და 12 მეტრიანი ავტობუსების გამოთავისუფლებას, ეს კი საგრძნობლად შეამცირებს მოლოდინის დროს იმ ადგილებში, სადაც მგზავრთა ნაკადი საკმაოდ დიდია’’,-განაცხადა შალვა ოგბაიძემ.
საკრებულოს წევრმა ასევე სატრანსპორტო საკითხთა და ჯანდაცვისა და სოციალურ საკითხთა კომისიების შეხვედრის მნიშვნელობაზე ისაუბრა, სადაც კოლეგებმა უფასო და შეღავათიანი მგზავრობის თაობაზე მოისმინეს ინფორმაცია.
„ეს არის გამოხატული სოლიდარობა ჩვენი თანამოქალაქეების მიმართ. მაგალითად, ერთი დღის მანძილზე ავტობუსებს 585 ათასი მგზავრი გადაჰყავთ, საიდანაც დაახლოებით 45 % უფასო და შეღავათიანი მგზავრია. იგივე მდგომარეობაა მიკროავტობუსებითა და მეტროსადგურებით მოსარგებლეების შემთხვევაშიც’’-განაცხადა შალვა ოგბაიძემ. დასასრულს, ოგბაიძემ შესაბამისი სამსახურების ხელმძღვანელებს გაწეული საქმიანობისთვის მადლობა გადაუხადა.
დღის ტოპ 10 სიახლე
სხვა სიახლეები
თანამედროვე ტექნოლოგიური ინფრასტრუქტურა, ძლიერი უნივერსიტეტი და საერთაშორისო დაკავშირებადობა ქმნის უნიკალურ შესაძლებლობას, ქუთაისი გახდეს ქალაქი, სადაც ცოდნა გარდაიქმნება ინოვაციად, ინოვაცია - ბიზნესად, ბიზნესი კი - შექმნის ახალ სამუშაო ადგილებს და ხელს შეუწყობს ეკონომიკურ ზრდას l ირაკლი კობახიძე
24.07.2026.22:02
ქუთაისი ყოველთვის იყო განათლების, მეცნიერებისა და კულტურის ერთ-ერთი უმნიშვნელოვანესი კერა ჩვენს ქვეყანაში. დღეიდან კი, ტექნოლოგიური ჰაბის გახსნით, ქუთაისი ასევე ხდება საქართველოს ტექნოლოგიური განვითარების ერთ-ერთი მთავარი ცენტრი, - ამის შესახებ საქართველოს პრემიერ-მინისტრმა ირაკლი კობახიძემ ქუთაისის ტექნოლიგური ჰაბის გახსნის ღონისძიებაზე სიტყვით გამოსვლისას განაცხადა.
როგორც მთავრობის მეთაურმა აღნიშნა, თანამედროვე ტექნოლოგიური ეკოსისტემისთვის არანაკლებ მნიშვნელოვანია არა მხოლოდ ციფრული, არამედ ფიზიკური დაკავშირებადობა.
„აქ იფუნქციონირებს საქართველოს ყველაზე დიდი ტექნოპარკი, ინტერაქციული სამეცნიერო და ტექნოლოგიური მუზეუმი, TUMO-ს საერთაშორისო ტექნოლოგიური სკოლა, ხელოვნური ინტელექტის გამოთვლითი ცენტრი, სტარტაპებისთვის განკუთვნილი სივრცეები და თანამედროვე ლაბორატორიები - რობოტიკის, ელექტრონიკის, დრონების, ხელოვნური ინტელექტის, ვირტუალური რეალობისა და სხვა მიმართულებებით.
ამ ეკოსისტემის განუყოფელი ნაწილი გახდება ქუთაისის საერთაშორისო უნივერსიტეტი, ვინაიდან ძლიერი ტექნოლოგიური ჰაბი ძლიერი უნივერსიტეტის, კვლევითი გარემოსა და კვალიფიციური ადამიანური რესურსის გარეშე ბუნებრივია, ვერ განვითარდება. ქუთაისის საერთაშორისო უნივერსიტეტი კი ქმნის სწორედ იმ აკადემიურ და სამეცნიერო საფუძველს, რომელიც ჰაბს მისცემს შესაძლებლობას, გახდეს არა მხოლოდ სასწავლო და სამუშაო სივრცე, არამედ კვლევის, ახალი ცოდნისა და მაღალტექნოლოგიური პროდუქტების შექმნის ცენტრი.
თანამედროვე ტექნოლოგიური ეკოსისტემისთვის არანაკლებ მნიშვნელოვანია არა მხოლოდ ციფრული, არამედ ფიზიკური დაკავშირებადობა. ქუთაისის საერთაშორისო აეროპორტი ქუთაისის ტექნოლოგიურ ჰაბს ხელს შეუწყობს, არა მხოლოდ ეროვნულ, არამედ რეგიონული მნიშვნელობის ტექნოლოგიურ ცენტრად ჩამოყალიბდეს.
თანამედროვე ტექნოლოგიური ინფრასტრუქტურა, ძლიერი უნივერსიტეტი და საერთაშორისო დაკავშირებადობა ქმნის უნიკალურ შესაძლებლობას, ქუთაისი გახდეს ქალაქი, სადაც ცოდნა გარდაიქმნება ინოვაციად, ინოვაცია - ბიზნესად, ბიზნესი კი - შექმნის ახალ სამუშაო ადგილებს და ხელს შეუწყობს ეკონომიკურ ზრდას.
მინდა, მადლობა გადავუხადო ყველას, ვინც ჩართული იყო ამ პროექტის წარმატებით განხორციელებაში. პირველ რიგში, მადლობა ეკუთვნის ეკონომიკის სამინისტროს, საქართველოს ეკონომიკის მინისტრ მარიამ ქვრივიშვილს. მადლობა მინისტრის მოადგილეებს, მადლობა ჯიტას, ინოვაციების და ტექნოლოგიების სააგენტოს. კიდევ ერთხელ დიდი მადლობა თითოეულ იმ ადამიანს, რომელიც ჩართული იყო ამ ძალიან მნიშვნელოვანი პროექტის წარმატებით განხორციელებაში. მინდა, მოგილოცოთ დღევანდელი დღე და ყველას მინდა წარმატებები გისურვოთ", - განაცხადა ირაკლი კობახიძემ.
