სომხეთის რესპუბლიკის პრემიერ-მინისტრის მოადგილესთან შეხვედრისას განსაკუთრებული აქცენტი გაკეთდა ეკონომიკის სექტორში - ტრანსპორტის, ტურიზმის, ისევე როგორც ენერგეტიკის მიმართულებით მჭიდრო თანამშრომლობის საკითხებზე - მარიამ ქვრივიშვილი
საქართველოსა და სომხეთს შორის სავაჭრო-ეკონომიკური ურთიერთობების და კავშირების შემდგომი გაღრმავების საკითხები განიხილეს საქართველოს ეკონომიკისა და მდგრადი განვითარების მინისტრმა მარიამ ქვრივიშვილმა და სომხეთის რესპუბლიკის პრემიერ-მინისტრის მოადგილე ტიგრან ხაჩატრიანმა. შეხვედრა მარიამ ქვრივიშვილის სომხეთში ვიზიტის ფარგლებში გაიმართა, მხარეებმა ქვეყნებს შორის სავაჭრო-ეკონომიკური ურთიერთობების არაერთი მიმართულებისა და პრიორიტეტული საკითხის შესახებ იმსჯელეს.
„ნაყოფიერი შეხვედრა შედგა სომხეთის რესპუბლიკის პრემიერ-მინისტრის მოადგილე ტიგრან ხაჩატრიანთან, ვისაუბრეთ ქვეყნებს შორის ურთიერთობების და კავშირების გაღრმავებაზე. ცხადია, განსაკუთრებული აქცენტი გაკეთდა ეკონომიკის სექტორში - ტრანსპორტის, ტურიზმის, ისევე როგორც ენერგეტიკის მიმართულებით მჭიდრო თანამშრომლობის საკითხებზე. ამასთან, ჩვენთვის პრიორიტეტს წარმოადგენს, რომ სომხეთთან არსებული ურთიერთობები მაქსიმალურად გამოვიყენოთ ქართული პროდუქციის სომხეთში ექსპორტის ხელშეწყობის მიზნით, რაც, რა თქმა უნდა, გააძლიერებს ქართველ მეწარმეებს", - განაცხადა ეკონომიკისა და მდგრადი განვითარების მინისტრმა მარიამ ქვრივიშვილმა.
ეკონომიკის მინისტრის ინფორმაციით, სომხეთის რესპუბლიკის პრემიერ-მინისტრის მოადგილესთან შეხვედრისას ხაზი გაესვა საქართველოს როლს და მის კონტრიბუციას რეგიონში მშვიდობის უზრუნველყოფის კუთხით, განსაკუთრებით იმ ჟესტის მიმართ, რომელიც საქართველოს მთავრობამ უზრუნველყო სიმბოლური ტარიფის დაწესებით აზერბაიჯანიდან სომხეთის მიმართულებით ნავთობპროდუქტების ტრანსპორტირების თვალსაზრისით. როგორც აღინიშნა, საქართველოს მთავრობის ამ გადაწყვეტილებას ორივე ქვეყნისთვის უდიდესი მნიშვნელობა ჰქონდა.
შეხვედრისას ასევე საუბარი შეეხო ენერგეტიკის სექტორში იმპორტის, ექსპორტის, ისევე როგორც ტრანზიტის მიმართულებით თანამშრომლობის გაღრმავების საკითხს. როგორც ეკონომიკისა და მდგრადი განვითარების მინისტრმა აღნიშნა, საქართველო განაგრძობს, იყოს ძალიან სანდო პარტნიორი, განსაკუთრებით როგორც დამაკავშირებელი, ტრანზიტული ქვეყანა სომხეთის რესპუბლიკასა და ევროკავშირის ქვეყნებს შორის.
„ამ მიმართულებით ჩვენ ძალიან ბევრი საერთო გეგმა გვაქვს, მათ შორის ვისაუბრეთ ინფრასტრუქტურის განვითარების საკითხზე, რაც უზრუნველყოფს ზოგადად ენერგეტიკის სექტორის გაძლიერებას ერთი მხრივ ელექტროენერგიის და მეორე მხრივ გაზმომარაგების თვალსაზრისით", - აღნიშნა მარიამ ქვრივიშვილმა.
სომხეთის რესპუბლიკის პრემიერ-მინისტრის მოადგილესთან შეხვედრაში მონაწილეობა მიიღეს ეკონომიკის მინისტრის მოადგილეებმა გენადი არველაძემ და თამარ იოსელიანმა, ასევე საქართველოს ელჩმა სომხეთის რესპუბლიკაში გიორგი შარვაშიძემ.
დღის ტოპ 10 სიახლე
სხვა სიახლეები
თანამედროვე ტექნოლოგიური ინფრასტრუქტურა, ძლიერი უნივერსიტეტი და საერთაშორისო დაკავშირებადობა ქმნის უნიკალურ შესაძლებლობას, ქუთაისი გახდეს ქალაქი, სადაც ცოდნა გარდაიქმნება ინოვაციად, ინოვაცია - ბიზნესად, ბიზნესი კი - შექმნის ახალ სამუშაო ადგილებს და ხელს შეუწყობს ეკონომიკურ ზრდას l ირაკლი კობახიძე
24.07.2026.22:02
ქუთაისი ყოველთვის იყო განათლების, მეცნიერებისა და კულტურის ერთ-ერთი უმნიშვნელოვანესი კერა ჩვენს ქვეყანაში. დღეიდან კი, ტექნოლოგიური ჰაბის გახსნით, ქუთაისი ასევე ხდება საქართველოს ტექნოლოგიური განვითარების ერთ-ერთი მთავარი ცენტრი, - ამის შესახებ საქართველოს პრემიერ-მინისტრმა ირაკლი კობახიძემ ქუთაისის ტექნოლიგური ჰაბის გახსნის ღონისძიებაზე სიტყვით გამოსვლისას განაცხადა.
როგორც მთავრობის მეთაურმა აღნიშნა, თანამედროვე ტექნოლოგიური ეკოსისტემისთვის არანაკლებ მნიშვნელოვანია არა მხოლოდ ციფრული, არამედ ფიზიკური დაკავშირებადობა.
„აქ იფუნქციონირებს საქართველოს ყველაზე დიდი ტექნოპარკი, ინტერაქციული სამეცნიერო და ტექნოლოგიური მუზეუმი, TUMO-ს საერთაშორისო ტექნოლოგიური სკოლა, ხელოვნური ინტელექტის გამოთვლითი ცენტრი, სტარტაპებისთვის განკუთვნილი სივრცეები და თანამედროვე ლაბორატორიები - რობოტიკის, ელექტრონიკის, დრონების, ხელოვნური ინტელექტის, ვირტუალური რეალობისა და სხვა მიმართულებებით.
ამ ეკოსისტემის განუყოფელი ნაწილი გახდება ქუთაისის საერთაშორისო უნივერსიტეტი, ვინაიდან ძლიერი ტექნოლოგიური ჰაბი ძლიერი უნივერსიტეტის, კვლევითი გარემოსა და კვალიფიციური ადამიანური რესურსის გარეშე ბუნებრივია, ვერ განვითარდება. ქუთაისის საერთაშორისო უნივერსიტეტი კი ქმნის სწორედ იმ აკადემიურ და სამეცნიერო საფუძველს, რომელიც ჰაბს მისცემს შესაძლებლობას, გახდეს არა მხოლოდ სასწავლო და სამუშაო სივრცე, არამედ კვლევის, ახალი ცოდნისა და მაღალტექნოლოგიური პროდუქტების შექმნის ცენტრი.
თანამედროვე ტექნოლოგიური ეკოსისტემისთვის არანაკლებ მნიშვნელოვანია არა მხოლოდ ციფრული, არამედ ფიზიკური დაკავშირებადობა. ქუთაისის საერთაშორისო აეროპორტი ქუთაისის ტექნოლოგიურ ჰაბს ხელს შეუწყობს, არა მხოლოდ ეროვნულ, არამედ რეგიონული მნიშვნელობის ტექნოლოგიურ ცენტრად ჩამოყალიბდეს.
თანამედროვე ტექნოლოგიური ინფრასტრუქტურა, ძლიერი უნივერსიტეტი და საერთაშორისო დაკავშირებადობა ქმნის უნიკალურ შესაძლებლობას, ქუთაისი გახდეს ქალაქი, სადაც ცოდნა გარდაიქმნება ინოვაციად, ინოვაცია - ბიზნესად, ბიზნესი კი - შექმნის ახალ სამუშაო ადგილებს და ხელს შეუწყობს ეკონომიკურ ზრდას.
მინდა, მადლობა გადავუხადო ყველას, ვინც ჩართული იყო ამ პროექტის წარმატებით განხორციელებაში. პირველ რიგში, მადლობა ეკუთვნის ეკონომიკის სამინისტროს, საქართველოს ეკონომიკის მინისტრ მარიამ ქვრივიშვილს. მადლობა მინისტრის მოადგილეებს, მადლობა ჯიტას, ინოვაციების და ტექნოლოგიების სააგენტოს. კიდევ ერთხელ დიდი მადლობა თითოეულ იმ ადამიანს, რომელიც ჩართული იყო ამ ძალიან მნიშვნელოვანი პროექტის წარმატებით განხორციელებაში. მინდა, მოგილოცოთ დღევანდელი დღე და ყველას მინდა წარმატებები გისურვოთ", - განაცხადა ირაკლი კობახიძემ.
