2036 წლისთვის საქართველო მიზნად ისახავს გახდეს სრულად თვითკმარი ელექტროენერგიის თვალსაზრისით და სუფთა ენერგიის საიმედო ექსპორტიორი რეგიონსა და ევროპაში - ინგა ფხალაძე
"ენერგეტიკული უსაფრთხოება საქართველოს უმთავრეს პრიორიტეტად რჩება. როგორც საიმედო სატრანზიტო პარტნიორი შავი ზღვისა და სამხრეთ კავკასიის რეგიონში, საქართველო კონსტრუქციულ როლს ასრულებს ენერგეტიკული ნაკადების სტაბილურობისა და დივერსიფიკაციის უზრუნველყოფისთვის," - განაცხადა ეკონომიკისა და მდგრადი განვითარების მინისტრის მოადგილე ინგა ფხალაძემ აიდერის საერთაშორისო ენერგეტიკულ ფორუმზე სიტყვით გამოსვლისას, რომელიც თურქეთის ქალაქ რიზეში გაიმართა.
მინისტრის მოადგილემ ყურადღება გაამახვილა რეგიონული მნიშვნელობის ენერგეტიკულ ინფრასტრუქტურულ პროექტებზე, რომელთა მეშვეობითაც საქართველო და სამხრეთ კავკასიის ენერგეტიკული სისტემა ევროკავშირის ელექტროენერგიის ქსელს დაუკავშირდება. ინგა ფხალაძემ ფორუმის მონაწილეებს შავი ზღვის წყალქვეშა კაბელისა და მწვანე ენერგეტიკული დერეფნის განვითარების მიმდინარეობა გააცნო. მინისტრის მოადგილის თქმით, ეს პროექტები არა მხოლოდ ინფრასტრუქტურული ინვესტიციებია, არამედ ენერგიის დივერსიფიკაციის, დეკარბონიზაციისა და გრძელვადიანი რეგიონული მდგრადობის მიმართ საერთო ერთგულებას ასახავენ.
ინგა ფხალაძემ ასევე აქცენტი გააკეთა საქართველოს საინვესტიციო კლიმატსა და მთავრობის გრძელვადიან ენერგეტიკულ ხედვაზე, მეტი ყურადღება დაუთმოს ქვეყანაში განახლებადი ენერგიის წყაროების ათვისებას. „ჩვენს ქვეყანას გააჩნია აუთვისებელი პოტენციალი ჰიდრო, ქარისა და მზის ენერგიის მიმართულებით. მზად ვართ შევქმნათ გამჭვირვალე და ინვესტორზე ორიენტირებული ჩარჩო, რომელიც მხარს დაუჭერს მდგრად პროექტებს გარემოსდაცვითი და სოციალური სტანდარტების სრული დაცვით," - აღნიშნა მინისტრის მოადგილემ.
„2036 წლისთვის საქართველო მიზნად ისახავს გახდეს სრულად თვითკმარი ელექტროენერგიის თვალსაზრისით და სუფთა ენერგიის საიმედო ექსპორტიორი რეგიონსა და ევროპაში. გვაქვს ამბიციური გეგმა, გავზარდოთ ჯამური დადგმული სიმძლავრე ორნახევარჯერ, რაც გულისხმობს სტრატეგიული ჰესების განვითარებას სისტემის მოქნილობისა და საიმედოობისთვის, ასევე, ქარისა და მზის ფართომასშტაბიან პროექტებს ენერგეტიკის შემდგომი დივერსიფიკაციისთვის," - განაცხადა ინგა ფხალაძემ. თავის გამოსვლაში, მინისტრის მოადგილემ ასევე ისაუბრა ქვეყანაში მიმდინარე ენერგეტიკულ დარგის რეფორმასა და სექტორში ახალი ტექნოლოგიების დანერგვის შესაძლებლობასა და სხვა პრიორიტეტულ საკითხებზე.
აიდერის ენერგეტიკულ ფორუმზე ინგა ფხალაძემ ასევე გამართა ორმხრივი შეხვედრები თურქეთისა და აზერბაიჯანის სამთავრობო და კერძო ენერგეტიკული კომპანიების წარმომადგენლებთან.
დღის ტოპ 10 სიახლე
სხვა სიახლეები
ეროვნული ბანკის აღმასრულებელი დირექტორი ბექა დოჭვირი, ივანე ჯავახიშვილის 150 წლის იუბილესადმი მიძღვნილი კვირეულის ფარგლებში, თსუ-ში გამართულ ღონისძიებას დაესწრო
30.04.2026.17:13
ეროვნული ბანკის აღმასრულებელი დირექტორი ბექა დოჭვირი, ივანე ჯავახიშვილის 150 წლის იუბილესადმი მიძღვნილი კვირეულის ფარგლებში, თსუ-ში გამართულ ღონისძიებას დაესწრო.
ღონისძიებაზე ბექა დოჭვირმა დიდი ქართველი მეცნიერისა და საზოგადო მოღვაწის, თბილისის სახელმწიფო უნივერსიტეტი - ს დამაარსებლის, ივანე ჯავახიშვილის 150 წლის იუბილესთან დაკავშირებით სებ-ის საკოლექციო მონეტის გამოშვება ოფიციალურად დააანონსა.
„გვჯერა, რომ ახალი საკოლექციო მონეტის გამოშვება ივანე ჯავახიშვილის მდიდარი მემკვიდრეობის წარმოჩენასა და პოპულარიზაციაში მცირე წვლილს შეიტანს. ეს მონეტა იქცევა იმ ინტელექტუალური და სამეცნიერო პროგრესის სიმბოლოდ, რომელსაც ივანე ჯავახიშვილმა ჩაუყარა საფუძველი“, - აღნიშნა ბექა დოჭვირმა.
მისივე განმარტებით, ეროვნული ბანკი ლარის შემოღებიდან დღემდე არაერთ საკოლექციო მონეტას გამოსცემს, რაც ქვეყნის ისტორიის მნიშვნელოვან მოვლენებსა და თარიღებს ასახავს, მათ შორის - სახელმწიფოებრიობის 3 000 წლის იუბილეს, დამოუკიდებლობის აღდგენის 100 წლისთავს, პირველი ქართული კონსტიტუციის 100 წელს, „საქართველოს მეფეების“ სერიას, თბილისის სახელმწიფო უნივერსიტეტის 100 წლის იუბილესა და ლარის მიმოქცევაში შესვლის 30 წელს.
ბექა დოჭვირის თქმით, ასეთი პროექტები ეროვნული ვალუტის პოპულარიზაციას უწყობს ხელს.
ღონისძიება თსუ-ის რექტორმა, აკადემიკოსმა ჯაბა სამუშიამ გახსნა, რომელმაც დამსწრე საზოგადოებას სიტყვით მიმართა და იუბილეს მნიშვნელობაზე ისაუბრა. მან ივანე ჯავახიშვილის მიერ ქართული მეცნიერებისა და უმაღლესი განათლების განვითარებაში შეტანილ ფუნდამენტურ წვლილზე გაამახვილა ყურადღება.
