„დღეს ხელი მოეწერა ხელშეკრულებას ძალიან მნიშვნელოვანი პროექტის განხორციელებისთვის. საუბარია ბათუმი-სარფის საავტომობილო გზის ახალი მონაკვეთის მშენებლობაზე. ეს არის პროექტი, რომელსაც განსაკუთრებული მნიშვნელობა აქვს როგორც ქვეყნის სატრანზიტო ფუნქციის გაძლიერების, ისე აჭარის რეგიონის შემდგომი განვითარებისა და ტურისტული პოტენციალის სრულყოფილად ათვისების თვალსაზრისით“, — ამის შესახებ საქართველოს ინფრასტრუქტურის მინისტრმა რევაზ სოხაძემ განაცხადა.

საქართველოს აღმოსავლეთ-დასავლეთის მაგისტრალის ერთ-ერთი მნიშვნელოვანი მონაკვეთის — ბათუმი-სარფის 11.3 კილომეტრიანი ახალი საავტომობილო გზის მშენებლობის შესახებ ხელშეკრულებას ხელი მოეწერა. ხელმოწერის ცერემონია საქართველოს ინფრასტრუქტურის სამინისტროში გაიმართა.

მინისტრის განცხადებით, პროექტის ერთ-ერთი უმნიშვნელოვანესი ნაწილია 7.6 კილომეტრის სიგრძის გვირაბი, რომელიც ქვეშეთი-კობის გვირაბის შემდეგ საქართველოში სიგრძით მეორე იქნება.

„გამარჯვებულ კომპანიას ქვეშეთი-კობის გვირაბის გაჭრის გამოცდილებაც აქვს. ეს ჩვენთვის მნიშვნელოვანი ფაქტორია, რადგან საუბარია რთულ და მასშტაბურ საინჟინრო პროექტზე. ჩვენი მხრიდან განსაკუთრებული ყურადღება დაეთმობა როგორც სამუშაოების ხარისხს, ისე განსაზღვრული ვადების დაცვას”, — აღნიშნა რევაზ სოხაძემ.

მინისტრის თქმით, ახალი გზა მნიშვნელოვნად განტვირთავს გონიო-კვარიათის მიმართულებას, სადაც ადგილობრივ და ტურისტულ მოძრაობასთან ერთად ინტენსიური სატრანზიტო ნაკადიც გადაადგილდება.

„ახალი გზის მშენებლობის შედეგად გონიო-კვარიათის მიმართულება მნიშვნელოვნად განიტვირთება. ეს მოგვცემს შესაძლებლობას, ადგილობრივ ხელისუფლებასთან ერთად, ეტაპობრივად მოვაწესრიგოთ აღნიშნული ტერიტორია და კიდევ უფრო განვავითაროთ მისი ტურისტული პოტენციალი. ჩვენი მიზანია, ეს მიმართულება იყოს კომფორტული და უსაფრთხო როგორც ადგილობრივი მოსახლეობისთვის, ისე დამსვენებლებისა და ტურისტებისთვის”, — განაცხადა მინისტრმა.

ბათუმი-სარფის საავტომობილო გზის მშენებლობისთვის კონტრაქტით ოთხწლიანი ვადაა განსაზღვრული. რევაზ სოხაძის განცხადებით, სამინისტროსა და საავტომობილო გზების დეპარტამენტის მხრიდან პროექტის მიმდინარეობაზე მუდმივი მონიტორინგი განხორციელდება. აქტიური სამშენებლო სამუშაოების დაწყება მიმდინარე წელს იგეგმება.

მინისტრის თქმით, ბათუმი-სარფის პროექტი ქვეყანაში მიმდინარე აღმოსავლეთ-დასავლეთის მაგისტრალის ფართომასშტაბიანი განვითარების ნაწილია. ამავე პროცესის ფარგლებში სატენდერო პროცედურები მიმდინარეობს რუსთავი-წითელი ხიდის მიმართულებითაც.

„საქართველოს უნიკალური გეოგრაფიული მდებარეობა გვაძლევს შესაძლებლობას, ვიყოთ ევროპისა და აზიის დამაკავშირებელი მნიშვნელოვანი სივრცე, თუმცა მხოლოდ გეოგრაფიული მდებარეობა საკმარისი არ არის. აუცილებელია თანამედროვე ინფრასტრუქტურის განვითარება, რომელიც ჩვენს ქვეყანაში გადაადგილებას გახდის უფრო სწრაფს, კომფორტულსა და უსაფრთხოს. საქართველომ დაამტკიცა, რომ არის საიმედო და უსაფრთხო სატრანზიტო დერეფანი და ჩვენი ამოცანაა, თანამედროვე ინფრასტრუქტურის განვითარებით ქვეყნის ეს შესაძლებლობები კიდევ უფრო გავაძლიეროთ”, — აღნიშნა რევაზ სოხაძემ.