26 მაისს, GITA - ს ტექნოლოგიური პავილიონი ქუთაისში, ცენტრალურ მოედანზე იქნება წარმოდგენილი
ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს პავილიონი 26 მაისს ქუთაისში, ცენტრალურ მოედანზე იქნება წარმოდგენილი. სააგენტო წელსაც განსაკუთრებული, ტექნოლოგიური და ინოვაციური სტენდით დახვდება სტუმრებს. დაგეგმილი აქტივობები მრავალფეროვანია და მოიცავს 3D მოდელირების ვორქშოფს, რომლის ფარგლებშიც 26 მაისის თემატიკაზე შეიქმნება 3D მოდელები და ადგილზევე იქნება ნაჩვენები ბეჭდვის პროცესი, ჩატარდება ასევე ვორქშოფი თემაზე 3D მოდელირება და ბეჭდვა. ვორქშოფის მონაწილეები მიიღებენ 3D პრინტერზე დაბეჭდილ 26 მაისის თემატიკის სუვენირებს.
GITA - ს სივრცეში საბავშვო აქტივობებიც დაგხვდებათ. Snap circuits და lego spike ვორქშოფში მონაწილეებს შესაძლებლობა ექნებათ, ნახონ სხვადასხვა ფუნქციის მქონე რობოტები და ჩაერთონ აწყობის პროცესში, დაათვალიერონ რობოტების გამოფენა (DJI რობოტი, MasterPI რობოტი) და თავად შეაფასონ მათი შესაძლებლობები. მონაწილეები გაეცნობიან ასევე ზოგად ინფორმაციას რობოტების მუშაობისა და პროგრამირების შესახებ.
GITA-ს პავილიონში წარმოდგენილი იქნება ასევე ასაწყობი ფაზლი 26 მაისის თემატიკაზე, დაინტერესებული პირები კი შეძლებენ მონაწილეობა მიიღონ დრონების ვორქშოფშიც, რომლის შემდგომაც დრონების სიმულატორის მეშვეობით შესაძლებლობა ექნებათ ისწავლონ და გატესტონ დრონის მართვა.
მთელი დღის განმავლობაში ღონისძიების სტუმრებს შესაძლებლობა ექნებათ, მონაწილეობა მიიღონ VR სათვალეების ვორქშოფში, სადაც, პრაქტიკულ ნაწილთან ერთად, განხილული იქნება VR ტექნოლოგიების გამოყენება ისეთ სფეროებში, როგორიცაა მედიცინა, ინჟინერია და ა.შ. 3D სკანირების ვორქშოფში კი დაინტერესებული პირები მოისმენენ პრეზენტაციას 3D სკანირების, როგორც ტექნოლოგიის ინოვაციურ გამოყენებაზე სხვადასხვა ინდუსტრიაში. მოხალისეები სადემონსტრაციოდ დასკანერების პროცესშიც მიიღებენ მონაწილეობას.
პავილიონში ჩატარდება ინდუსტრიული რობოტი ხელი NYIRIO და UNITRI რობოტების ვორქშოფი და ასევე მოეწყობა საინფორმაციო სივრცე/Touch screen (Android System), სადაც წარმოდგენილი იქნება ინფორმაცია ქუთაისის ტექნოლოგიური ჰაბის შესახებ, რომელიც უახლოეს მომავალში საზეიმოდ გაიხსნება.
სხვა სიახლეები
„საქართველოს ფოსტა “დამოუკიდებლობის დღეს ქალაქ თელავში აღნიშნავს და მოსახლეობას მრავალფეროვან აქტივობებსა და ინტერაქციულ სივრცეებს სთავაზობს
25.05.2026.12:50
2026 წელს, საქართველოს დამოუკიდებლობის დღეს, „საქართველოს ფოსტა“ თელავში აღნიშნავს და მოსახლეობას მრავალფეროვან აქტივობებსა და ინტერაქციულ სივრცეებს სთავაზობს. კომპანიის პავილიონში სტუმრებს შესაძლებლობა აქვთ გაეცნონ ფოსტისა და საფოსტო მარკების ისტორიას, დაათვალიერონ თემატური ექსპოზიციები და ჩაერთონ სხვადასხვა ინტერაქციულ აქტივობაში.
მთელი დღის განმავლობაში „საქართველოს ფოსტა“ სტუმრებს მრავალფეროვან, შემეცნებით და გასართობ აქტივობებს შესთავაზებს. აღნიშნულ სივრცეში მოქალაქეებს დახვდებათ ქრისტიანობის სახელმწიფო რელიგიად გამოცხადებიდან 1700 წლის საიუბილეო სივრცე, 26 მაისის თემატური ინსტალაციები, საფოსტო საქმიანობასთან დაკავშირებული ისტორიული საგამოფენო კონსტრუქციები, კალიგრაფისტის კუთხე, საბავშვო გასართობი სივრცე და ასევე, საფოსტო სამოსში გამოწყობილი „ფოსტალიონები “.
აღსანიშნავია, რომ ადგილზე მობრძანებულ სტუმრებს ასევე დახვდებათ სპეციალურად მოწყობილი სივრცეები, სადაც შეძლებენ უცხო ადამიანებს წერილობით გაუზიარონ თავიანთი ფიქრები და ასევე, მათთვის სასურველ ადრესატებს გაუგზავნონ წერილები ღია ბარათების მეშვეობით.
„საქართველოს ფოსტა“ ყველა მოქალაქეს ულოცავს დამოუკიდებლობის დღეს - 26 მაისი ჩვენი ქვეყნის თავისუფლების, ერთიანობისა და ეროვნული სიამაყის დღეა, ეს თარიღი გვახსენებს იმ ღირებულებებს, რომლებიც გვაერთიანებს და გვაძლიერებს!