Galt & Taggart-ის კვლევების დეპარტამენტის ანალიტიკოსის, მარიამ ნატროშვილის განცხადებით, კომპანიის კვლევითი გუნდი გლობალურ და რეგიონულ ფინანსურ ბაზრებს უწყვეტ რეჟიმში აკვირდება. როგორც ტელეკომპანია „მაესტროს“ ეთერში გადაცემა Business Insider Georgia-ს სტუმრობისას მარიამ ნატროშვილმა განაცხადა, ანალიზი მოიცავს როგორც საფონდო ბირჟებსა და ფიქსირებული შემოსავლის მქონე ინსტრუმენტებს აშშ-სა და ევროპაში, ისე ობლიგაციების ბაზრებს რეგიონში.

„ჩვენი გუნდი მუდმივ რეჟიმში ფარავს საფონდო ბირჟების მდგომარეობას გლობალურად. გარდა ამისა, ვფარავთ ფიქსირებული შემოსავლის მქონე ობლიგაციებს ამერიკის შეერთებულ შტატებსა და ევროპაში. ასევე იფარება რეგიონალური ობლიგაციების ბაზარიც - საქართველოს, თურქეთის, უზბეკეთის, ყაზახეთის, აზერბაიჯანისა და სომხეთის მიმართულებით, როგორც კერძო კომპანიებს, ასევე საჯარო ობლიგაციებსაც.

გარდა ამისა, უნდა აღინიშნოს ისიც, რომ წამყვანი ცენტრალური ბანკების პროცესებსაც მუდმივ რეჟიმში ვაკვირდებით და ამის შესახებ გვაქვს ანალიტიკაც, რაზეც მოგვიანებით ვისაუბრებთ. და ასევე მნიშვნელოვანია ისიც, რრომ ვალუტის დინამიკა რეგიონში მუდმივად კონტროლირებადია Galt & Taggart-ის გუნდის მხრიდან და ინდივიდუალური ობლიგაციების ფასებიც ასობით ინსტრუმენტზე ლარში, დოლარსა და ევროში იფარება.
გარდა ფიქსირებული შემოსავლებისა, აუცილებლად უნდა აღვნიშნო ის კვარტალური კვლევები, რომლებსაც ვაკეთებთ უშუალოდ ბაზრების შესახებ - ზოგადად რას უნდა ველოდეთ ბაზრებზე, ძირითადი სიგნალები, ხელოვნური ინტელექტის ინფრასტრუქტურის ციკლს, ბაზრის მოწინავე კომპანიებს მსხვილი კაპიტალიზაციის მქონე კომპანიების მიღმა, და აზიის ეკონომიკების განსხვავებულ ტრაექტორიებს. ჩვენ ასევე ვაკეთებთ ჰეჯ ფონდების ანალიტიკას, რომელიც აკონტროლებს ხუთი ძირითადი ინსტიტუციური ინვესტორის, მათ შორის Berkshire Hathaway-ის, Millennium Management-ის და Pershing Square-ის კვარტალურ პოზიციონირებას - რაც ჩვენს კლიენტებს წარმოდგენას აძლევს იმის შესახებ, თუ როგორ ნაწილდება გლობალური კაპიტალი.

გარდა ამისა, მინდა აღვნიშნო ისიც, რომ აღნიშნული კვლევები ხელმისაწვდომია ჩვენს ვებ-გვერდზე მუდმივ რეჟიმში საჯაროდ ნებისმიერი დაინტერესებული პირისთვის და ვთვლით, რომ ნებისმიერი მიმართულებით ეს კვლევები მიზნად ისახავს კლიენტს მისცეს ანალიტიკური საფუძველი, თუნდაც ნებისმიერი გადაწყვეტილების მიღების შესახებ - იქნება ეს ზოგადად კაპიტალის გამოყენების შესახებ მიღებული გადაწყვეტილება, თუ უბრალოდ იმის გაგება, თუ რა მდგომარეობაა გლობალურ კაპიტალის ბაზრებზე. საქართველოს მსგავსი ბაზრისთვის კვლევითი დაფარვის ასეთი ხარისხი სწორედ ის არის, რაშიც Galt & Taggart-ის გუნდი დიდ ინვესტიციას დებს “, - განმარტა მარიამ ნატროშვილმა.