საქართველოს ინოვაციებისა და ტექნოლოგიების სააგენტოს (GITA) თავმჯდომარის, ავთანდილ კასრაძე განცხადებით, რეგიონების ინტეგრაცია ინოვაციურ ეკოსისტემაში სააგენტოს ერთ-ერთი მთავარი პრიორიტეტია, რის ფარგლებში უკვე 10 ტექნოლოგიური პარკი ფუნქციონირებს და აქტიური შეხვედრები იმართება ქვეყნის 65 მუნიციპალიტეტში. მისი თქმით, დამატებით ხორციელდება საგრანტო პროგრამები სპეციალურად რეგიონებისთვის, რაც ადგილობრივ ინოვატორებს საშუალებას აძლევს საკუთარი იდეები რეალურ პროექტებად და ტექნოლოგიურ ბიზნესებად გარდაქმნან.

„ჩვენთვის რეგიონული მიმართულება, რეგიონალური გაფართოება და რეგიონების ინტეგრირება ერთიან ინოვაციურ ეკოსისტემაში მნიშვნელოვან პრიორიტეტს წარმოადგენს. ჩვენ უკვე 10 ლოკაციაზე გვაქვს უშუალოდ ჩვენი ტექნოლოგიური პარკი განთავსებული, თუმცა გარდა ამისა მუდმივად ვაკეთებთ სხვადასხვა ტიპის ღონისძიებებს. ახლა მიდის პროცესი მაგალითად, როდესაც ინოვაციებს ტექნოლოგიების სააგენტო 65 მუნიციპალიტეტში ჩადის და შეხვედრები აქვს თითოეულ მუნიციპალიტეტში საქართველოს მოსახლეობასთან, სკოლებში, სხვადასხვა დაწესებულებაში, რომ ჩვენ მათ მივაწვდინოთ ინფორმაცია, რომ რამხელა შესაძლებლობა აქვს დღეს ადამიანს, კრეატიულ მოაზროვნეს, ინოვატორს, რომ მათი იდეები არ დარჩეს იდეებად და განახორციელონ კონკრეტული პროექტები.

გარდა ამისა გვაქვს კონკრეტული საგრანტო დაფინანსება ექსკლუზიურად რეგიონის მოსახლეობისთვის, სადაც ქალაქი თბილისი უბრალოდ ვერ მონაწილეობს, აკრძალულია. ახლა მაგალითად შემდეგ კვირას იქნება სტარტაპების შერჩევა და დაჯილდოება იმერეთში, გურიაში და აჭარაში. სამ თვეში იქნება სხვა სამ ასე ვთქვათ კუთხეში და ყველა კუთხეში ჩვენ ჩავდივართ, ვატარებთ როგორც სხვადასხვა შემეცნებით პროგრამებს, ასევე დაფინანსების მექანიზმები ჩაგვაქვს, ფულიც ჩაგვაქვს რეგიონებში, რომ მათი იდეები განხორციელდეს და მათ შეძლონ უკვე მერე ტექნოლოგიურ კომპანიებად გარდაქმნა“, - აღნიშნავს კასრაძე.