საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ორგანიზებით, 26 მაისს, საქართველოს დამოუკიდებლობის დღისადმი მიძღვნილი მასშტაბური ღონისძიება წელს ქალაქ ქუთაისში გაიმართება.

მიმდინარე წელს დამოუკიდებლობის დღის აღნიშვნა განსაკუთრებულ მნიშვნელობას იძენს, რადგან უკავშირდება საქართველოში ქრისტიანობის სახელმწიფო რელიგიად გამოცხადების 1700 წლის იუბილეს, რაც ქვეყნის მრავალსაუკუნოვანი ისტორიის, კულტურისა და სულიერი მემკვიდრეობის მნიშვნელოვანი გამოხატულებაა.

ღონისძიებას ადგილობრივი ხელისუფლების წარმომადგენლებთან ერთად ტურიზმის ეროვნული ადმინისტრაციის ხელმძღვანელის მოადგილე, მედეა ჯანიაშვილი დაესწრება.

ტურიზმის ეროვნული ადმინისტრაციის ორგანიზებით, ქუთაისში ადგილობრივებსა და ქალაქის სტუმრებს მრავალფეროვანი სადღესასწაულო პროგრამა დახვდებათ. ქალაქის ცენტრალურ მოედანზე დილის 11:00 საათიდან სპეციალურად მოწყობილ სივრცეებში თემატური, შემეცნებითი, საბავშვო გასართობი, სამეწარმეო და გასტრონომიული ზონები ამოქმედდება. დამთვალიერებლებს საშუალება ექნებათ ესტუმრონ საინფორმაციო და საგამოფენო სივრცეებს, სადაც წარმოდგენილი იქნება საქართველოს დამოუკიდებლობის ისტორია, იმერეთის ტურისტული პოტენციალი და სხვადასხვა თემატური ინსტალაციები.

პროგრამის ფარგლებში, მთელი დღის განმავლობაში (11:00-18:00 სთ) ბავშვებისთვის მოეწყობა მინი გოლფი, გიგანტური სამაგიდო თამაშები (X-O, შაშკი), ბოულინგი და სხვადასხვა აქტივობები. ქალაქის ქუჩებში მსვლელობას მოაწყობს მოსიარულე ორკესტრი და ოჩოფეხები, ჩატარდება სამეცნიერო ექსპერიმენტების შოუ და საგარეუბნო თეატრალური წარმოდგენები. 14:00 საათიდან გაიხსნება კვების ზონა და ბარი, სადაც წარმოდგენილი იქნება ადგილობრივი გასტრონომია.

ტრადიციულად, 17:10 საათზე, საქართველოს სხვა ქალაქებთან ერთად, ქუთაისის ცენტრალურ მოედანზეც ცოცხალი შესრულებით გაჟღერდება საქართველოს ეროვნული ჰიმნი.

დამოუკიდებლობის დღისადმი მიძღვნილ ღონისძიება გრანდიოზული გალა კონცერტით დასრულდება, რომელიც 19:00 საათზე დაიწყება.