EBRD მხარს უჭერს ევროკავშირში უდიდესი მზის ელექტროსადგურის პროექტს
ევროპის რეკონსტრუქციისა და განვითარების ბანკი (EBRD), რომელიც რუმინეთის ენერგოუსაფრთხოებისა და მწვანე ტრანზიციის მხარდამჭერ უმსხვილეს ინსტიტუტებს შორისაა, ქვეყნის მზის ელექტროსადგურის პროექტის მშენებლობისა და ოპერირების დასაფინანსებლად 21.1 მილიონი ევროს ოდენობის უზრუნველყოფილ სესხს გასცემს. პროექტის დასაფინანსებლად გათვალისწინებული საფინანსო პაკეტის საერთო მოცულობა 561 მილიონ ევროს შეადგენს, ხოლო მზის ელექტროსადგურის საპროექტო სიმძლავრე 1.3 გიგავატი იქნება.
პროექტის დასრულების შემდეგ, პროექტი EBRD-ის მიერ დღემდე დაფინანსებული განახლებადი ენერგიის ყველაზე დიდი ობიექტი და ევროპის უდიდესი მზის ელექტროსადგური იქნება. პროექტი მნიშვნელოვან წვლილს შეიტანს რუმინეთის ენერგეტიკულ ტრანზიციაში, ენერგოუსაფრთხოებისა და ბიომრავალფეროვნების მიზნების მიღწევაში.
პროექტის განხორციელებას ბანკი 10-ზე მეტი კომერციული კრედიტორისგან შემდგარ კონსორციუმთან, ასევე საერთაშორისო საფინანსო კორპორაციასთან (IFC), შავი ზღვის ვაჭრობისა და განვითარების ბანკსა და ევროპის საინვესტიციო ბანკთან ერთად აფინანსებს.
დღის ტოპ 10 სიახლე
სხვა სიახლეები
დევნილთა საცხოვრებლით უზრუნველყოფის პროგრამას უმნიშვნელოვანესი ახალი ინსტრუმენტი დაემატება - მიხეილ სარჯველაძე
12.10.2026.15:26
„დევნილთა მიმართულებით უმნიშვნელოვანესი ახალი ინსტრუმენტი დაემატება ჩვენს შესაძლებლობებს და ვფიქრობ, რომ ეს ერთმნიშვნელოვნად ძალიან სწრაფ ტემპს შესძენს დევნილთა საცხოვრებლით უზრუნველყოფის პროგრამას, რომელსაც ახორციელებს სააგენტო“ – აღნიშნულის შესახებ ჯანდაცვის მინისტრმა მიხეილ სარჯველაძემ განაცხადა.
მინისტრმა მთავრობის ინიციატივაზე ისაუბრა, რომელიც დევნილ ოჯახებს ფულადი კომპენსაციის მიღების საშუალებას სთავაზობს.
სიახლე განკუთვნილია იმ დევნილი ოჯახებისთვის, რომელთაც წარსულში არ მიუღიათ საცხოვრისი ან შესაბამისი კომპენსაცია. მათ ექნებათ შესაძლებლობა, სურვილის შემთხვევაში, სახელმწიფოსგან ოჯახის ერთ წევრზე 10 000 ლარის ოდენობის კომპენსაცია მიიღონ.
„დაწყებულია მუშაობა და უახლოეს დღეებში რეალურად გვექნება შესაძლებლობა, რომ დავიწყოთ განაცხადების მიღებაც და შესაბამისად, რეაგირებაც, რაც შეიძლება სწრაფი ტემპით. ამ დროში, ამ წლის დარჩენილ პერიოდშია გათვალისწინებული 58 მილიონი და ეს მართლაც ძალიან სწრაფი ტემპით უამრავი ოჯახის არსებული პრობლემის გადაჭრის რეალური და ქმედითი მექანიზმი გახლავთ“ – განაცხადა მიხეილ სარჯველაძემ.
აღსანიშნავია, რომ ფულადი კომპენსაციების გაცემის პარალელურად გაგრძელდება საცხოვრებელი კორპუსების მშენებლობა და „სოფლად სახლის“ პროგრამა იმ დევნილი ოჯახებისთვის, რომლებიც ფულადი კომპენსაციის მიღებაზე არ შეიტანენ განაცხადს.
საქართველოს ტექნიკურ უნივერსიტეტში კიბერუსაფრთხოების ცნობიერების ამაღლების ღონისძიება გაიმართა
12.10.2026.14:31
საქართველოს ფინანსთა მინისტრი ლაშა ხუციშვილი ევროპასა და ცენტრალურ აზიაში მსოფლიო ბანკის ვიცე-პრეზიდენტს შეხვდა
12.10.2026.12:27
საქართველოს ფინანსთა მინისტრი ლაშა ხუციშვილი მსოფლიო ბანკის აღმასრულებელ დირექტორს შეხვდა
12.10.2026.12:09
