მესტიაში ელექტროენერგიის არამიზნობრივმა და უკონტროლო მოხმარებამ ენერგოსისტემის გადატვირთვა გამოიწვია, რის გამოც მოსახლეობა და ბიზნესები ხარისხიანი ელექტრომომარაგების პრობლემას აწყდებიან, - ამის შესახებ სემეკის თავმჯდომარემ გადაცემა „იმედის დილაში“ რუბრიკა Business Insider Georgia-ში სტუმრობისას ისაუბრა. დავით ნარმანიას თქმით, მუნიციპალიტეტში ერთი ოჯახის საშუალო მოხმარება ქვეყნის სხვა რეგიონებთან შედარებით 7-8-ჯერ მაღალია.

„დღეს რომ ავიღოთ მესტიის მუნიციპალიტეტში საშუალო მოხმარება, საშუალოდ ერთი ოჯახი 7-8-ჯერ უფრო მეტ ელექტროენერგიას მოიხმარს ვიდრე სხვა მუნიციპალიტეტებში, სადაც მრიცხველები აყენია და სადაც მოსახლეობა ჩვეულებრივ იხდის ელექტროენერგიის დადგენილ საფასურს. ეს არის სწორედ ერთ-ერთი მთავარი განმაპირობებელი ფაქტორი იმისა, რომ გადატვირთულია ხაზები, გადატვირთულია ქვესადგურები და ისევ მოსახლეობაზე და კომერციულ ობიექტებზე აისახება. ისინი ვერ ღებულობენ ხარისხიან ელექტროენერგიას, ძაბვა არის დაბალი, ხშირია ავარიები და გათიშვები და ხანდახან როცა ზამთარია, უხთოვლიანი პერიოდია, დღეების განმავლობაშიც არის ცალკეული მიმართულებებით ელექტროენერგია გათიშული. ჩვენ, როგორც მარეგულირებელი ვერ ვახდენთ კარგი გაგებით ზეწოლას ენერგო-პრო ჯორჯიაზე, რომ იქ ინვესტიცია ჩადოს და მოაწესრიგოს ქვესადგურები და ტრანსფორმატორები და ასე შემდეგ. იქ საიდანაც მას ამოღება არა აქვს, ვერ ვაიძულებთ რომ განახორციელოს ინვესტიცია. როცა ამოღება იქნება, როცა გადახდები წავა და ასე შემდეგ, მერე უკვე ჩვეულებრივ ინვესტიციაც განხორციელდება, ქვესადგურებიც მოწესრიგდება, გადამცემი ხაზებიც გაძლიერდება და ასე შემდეგ და ეს ყველაფერი აისახება ელექტროენერგიის ხარისხზე. მით უმეტეს როცა საკმაოდ დიდი რაოდენობით ტურისტი გყავს და ვერ ემსახურები ხარისხიანი ენერგიით, რა თქმა უნდა ეს საკუთრივ ტურიზმის, როგორც სექტორის განვითარებაზეც მოქმედებს. ამ თვალსაზრისითაც უნდა შევხედოთ ამ საკითხს“, - აღნიშნა დავით ნარმანიამ.