ევროპა ამ კონფლიქტის მიმართ მეტად მგრძნობიარეა, ვიდრე ამერიკა, - აცხადებს Galt & Taggart-ის კვლევების დეპარტამენტის ანალიტიკოსი მარიამ ნატროშვილი, რომელიც ტელეკომპანია „მაესტროს“ ეთერში გადაცემა Business Insider Georgia-ს სტუმარი იყო.
მარიამ ნატროშვილის განცხადებით, ევროპულ საფონდო ბირჟებზე გასულ კვირას პოზიტიური დინამიკა შენარჩუნდა, რაც გეოპოლიტიკური ფაქტორების დროებით შემსუბუქებას უკავშირდებოდა. „გასულ კვირას თუ შევხედავთ, ისევ და ისევ გეოპოლიტიკური სიტუაციიდან გამომდინარე, სანამ დაიძაბებოდა სიტუაცია ჰორმუზის სრუტის ჭრილში, ევროპაშიც საკმაოდ კარგი და პოზიტიური კვირა დასრულდა ბირჟების კუთხით. განსაკუთრებით წამყვანმა ინდექსმა თითქმის 2%-იანი ზრდა გვაჩვენა, ასევე ლიდერობდა გერმანია 3.77%-იანი ზრდით და არცთუ ისე ცუდი შედეგები ჰქონდათ საფრანგეთსაც და იტალიასაც. ამის განმაპირობებელი იყო ირანის მიერ ჰორმუზის სრუტის გახსნასთან დაკავშირებით გაკეთებული განცხადება. ამჟამად ევროპულ სურათს განსაზღვრავს სამი სხვადასხვა ფაქტორი: უპირველესად, ეს არის ენერგეტიკა, ვგულისხმობ ნავთობის ფასებს, რომლებიც 2025 წლის დეკემბრის შემდეგ 84%-ით არის გაზრდილი“, - ამბობს მარიამ ნატროშვილი.

Galt & Taggart-ის კვლევების დეპარტამენტის ანალიტიკოსის შეფასებით, ევროპულ ბაზრებზე მთავარი გავლენა ენერგეტიკულმა ფაქტორებმა და მონეტარულმა პოლიტიკამ იქონია. მისი თქმით, ნავთობის ფასის ერთ ბარელზე 104 დოლარამდე ზრდამ კორპორატიულ მარჟებზე ზეწოლა გააძლიერა, ხოლო ევროპის ცენტრალური ბანკი ინფლაციასა და შენელებულ ეკონომიკურ ზრდას შორის ბალანსის დაცვას ცდილობს.
„ნავთობის ფასმა ერთ ბარელზე 104 დოლარსაც კი მიაღწია. ამას, რასაკვირველია, მყისიერი რეაგირება მოჰყვა, რაც ნავთობის ფასებზე და შესაბამისად უკვე კორპორატიულ მარჟებზეც აისახა. მეორე საკითხი, რაც მნიშვნელოვანია, ეს არის ევროპის ცენტრალური ბანკი, რომელიც მზარდ ინფლაციასა და შენელებულ ეკონომიკურ ზრდას შორის არის მოქცეული და ასევე უნდა აღვნიშნო საერთაშორისო სავალუტო ფონდის გადაწყვეტილება, რომლებმაც განაცხადეს, რომ 2026 წლის ევროზონის ზრდის მაჩვენებელი 2.1%-დან 1.1%-მდე შემცირდა. ფაქტობრივად შეიძლება ჩავთვალოთ, რომ საზოგადოებას აფრთხილებენ პოტენციური ენერგეტიკული კრიზისის შესახებ“, - განმარტავს მარიამ ნატროშვილი.

მისივე თქმით, ჰორმუზის სრუტეში ვითარების გამწვავება და ნავთობტანკერების დაკავება საერთაშორისო ბაზრებზე არასტაბილურობას ზრდის.

„ვითარებაზე დამატებით გავლენას ახდენს რამდენიმე დღის წინ ჰორმუზის სრუტის გარშემო დაძაბულობის მორიგი ტალღა. მას შემდეგ, რაც ამერიკის შეერთებული შტატების სამხედროებმა ირანის მინიმუმ სამი ნავთობტანკერი დააკავეს, ირანმაც თავის მხრივ ორი სატვირთო გემი შეაჩერა, რაც რეგიონში სიტუაციას ისევ არასტაბილურს ხდის“, - ამბობს მარიამ ნატროშვილი.