საქართველოში განათლების სისტემისთვის ახალი საკანონმდებლო ჩარჩო მზადდება. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას  საქართველოს განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ განაცხადა, მუშავდება განათლებისა და მეცნიერების ახალი კანონი, რომელიც დღეს მოქმედ რამდენიმე ნორმატიულ აქტს გააერთიანებს და ერთიანი კოდექსის ტიპის დოკუმენტი გახდება.

„კონცეფციაშიც გვქონდა მითითებული და პრემიერმა პირდაპირ განაცხადა და ეს არის იურიდიული თვალსაზრისით უმნიშვნელოვანესი. დამოუკიდებელი საქართველოს ისტორიაში მსგავსი ტიპის ნორმატიული აქტი არ გვქონია. სამწუხარო გახლავთ ის, რომ დაახლოებით 7-8 ნორმატიული აქტი არეგულირებს დღეს განათლების სისტემას და ამ სისტემის დიდი ნაწილი არის მოძველებული. მათ შორის მაგალითად მეცნიერების და ტექნოლოგიების განვითარების შესახებ კანონი 1994 წელს არის მიღებული. ანუ აქ არის ტერმინოლოგიური პრობლემები. ამავე დროს თქვენ იცით, რომ ძალიან ბევრი ცვლილებები შედის წლის განმავლობაში კანონმდებლობაში და არის გარკვეული ტიპის ქაოსი სამართლებრივი საკანონმდებლო თვალსაზრისით. შესაბამისად, მივიღეთ გადაწყვეტილება, რომ არა მექანიკური გაერთიანება მოხდეს ამ კანონებისა, არამედ შინაარსობრივი თვალსაზრისით გადამუშავდეს და იქცეს ერთ კანონად, დაახლოებით კოდექსის დონის კანონად. ეს იქნება განათლებისა და მეცნიერების შესახებ კანონი. თქვენ იცით, რომ მთავრობის დავალებით და უშუალოდ მინისტრის გადაწყვეტილებით ვხელმძღვანელობ მე ამ სამუშაო ჯგუფს, რომელიც საკმაოდ დიდი მასშტაბისა არის - დაახლოებით არის 40-მდე წევრი. სამინისტროსთან ერთად არიან აკადემიური სექტორის წარმომადგენლები, უნივერსიტეტის რექტორები, მეცნიერებათა აკადემია - პრაქტიკულად ყველა სექტორია ჩართული. ამავე დროს დღეს გვქონდა პირველი შეხვედრა ქვეჯგუფებთან, რომლებიც ჩვენი ამოცანა არის, რომ არა უბრალოდ გადაბმა მოხდეს ამ კანონისა, არამედ პარალელურ რეჟიმში მოხდეს იმისათვის, რომ დროში უფრო შევამოკლოთ. ამიტომ ქვეჯგუფები დაიწყებენ ხვალვე თანაბარი პერიოდით მუშაობას. მთავარი იდეა გახლავთ ის, რომ მოხდეს ისეთი დონის ნორმატიული აქტის შექმნა, როცა არაიურისტს შეეძლება განათლების სისტემის სურვილის გაგების შემთხვევაში დაიწყოს ბაღიდან და მეცნიერებამდე თავიდან ბოლომდე აღიქვას, როგორია საქართველოში საგანმანათლებლო მოდელი“, - აღნიშნა ზვიად გაბისონიამ.