GCCA-მა შპს „აიპლიუსს" დარღვევა დაუდასტურა
საქართველოს კონკურენციისა და მომხმარებლის დაცვის სააგენტომ შპს „აიპლიუსის" მიერ „მომხმარებლის უფლებების დაცვის შესახებ" საქართველოს კანონის დარღვევის ფაქტი დაადგინა.
განსახილველ შემთხვევაში, სააგენტოს მომართა ორმა განმცხადებელმა, რომელთა მოთხოვნაც შეეხებოდა „აიპლიუსის" მიერ, კანონით გათვალისწინებული საგარანტიო მომსახურებისა და ხელშეკრულების პირობებით გათვალისწინებული საქონლის გადაცემის ვალდებულების დარღვევის შემთხვევებს.
სააგენტოს განმარტებით, მოვაჭრე ვალდებულია, მომხმარებელს გადასცეს ისეთი საქონელი, რომელიც შეესაბამება ხელშეკრულებით გათვალისწინებულ პირობებს, მათ შორის, თვისებებს, ხარისხსა და ფუნქციურ მახასიათებლებს. განსახილველ შემთხვევაში კი, მოვაჭრის მიერ, სახელშეკრულებო ვალდებულება სათანადოდ არ შესრულდა და მის მიერ გადაცემული პროდუქტი ვერ აკმაყოფილებდა კანონის მე-16 მუხლით დადგენილ მოთხოვნებს.
გარდა ამისა, „მომხმარებლის უფლებების დაცვის შესახებ" საქართველოს კანონის მე-17 მუხლი მოვაჭრეს ავალდებულებს ნაკლის აღმოფხვრას. ნაკლის მქონე საქონლის ხელშეკრულების პირობებთან შესაბამისობაში მოყვანისას (შეკეთება/შეცვლა) კი მოვაჭრე ვალდებულია, განახორციელოს ყველა საჭირო ქმედება უსასყიდლოდ და გონივრულ ვადაში, ისე, რომ მომხმარებელს არ შეექმნას მნიშვნელოვანი შეფერხება იმ მიზნის გათვალისწინებით, რისთვისაც მან ეს საქონელი შეიძინა.
სააგენტოს გადაწყვეტილებით, მოვაჭრეს დაევალა, ერთი თვის ვადაში აღადგინოს მომხმარებელთა დარღვეული უფლებები და სავაჭრო პოლიტიკა სრულად შეუსაბამოს კანონის მოთხოვნებს.
სხვა სიახლეები
მზის პანელების შეძენისა და მონტაჟის მოტივით 40 000 ლარის თაღლითურად დაუფლების ფაქტზე პროკურატურამ ერთ პირს ბრალი წარუდგინა
13.11.2026.16:35
თბილისის პროკურატურის თაღლითობის სისხლის სამართლის საქმეებზე საპროცესო ხელმძღვანელობის სამმართველომ დიდი ოდენობით თანხის თაღლითურად დაუფლების ფაქტზე ერთ პირს ბრალდება წარუდგინა.
შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა იმ მოტივით, რომ შეიძენდა და დაამონტაჟებდა მზის პანელებს, დაზარალებულებს 40 000 ლარი ჩაარიცხინა, რომელიც მიისაკუთრა და ქვეყნის ფარგლები დატოვა.
ბრალდებულს ბრალდება საქართველოს სისხლის სამართლის კოდექსის 180-ე მუხლის მე-3 ნაწილის „ბ“ ქვეპუნქტით (თაღლითობა, ჩადენილი დიდი ოდენობით) დაუსწრებლად წარედგინა, რაც სასჯელის სახედ და ზომად 9 წლამდე თავისუფლების აღკვეთას ითვალისწინებს.
პროკურატურამ ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით, სასამართლოს უკვე მიმართა.