საქართველოს ინფრასტრუქტურის მინისტრმა რევაზ სოხაძემ საქართველოს მოქალაქეებს დამოუკიდებლობის დღე მიულოცა.

როგორც მინისტრმა მედიასთან საუბრისას აღნიშნა, 26 მაისი არის დღე, რომელიც თითოეული მოქალაქისთვის განსაკუთრებულ ემოციას უკავშირდება და ქვეყნის დამოუკიდებლობის გაძლიერება ყოველდღიური შრომით გრძელდება.

„ვულოცავ მთელ საქართველოს დამოუკიდებლობის დღეს. ძალიან კარგად მახსოვს ის დღე, როდესაც საქართველომ დამოუკიდებლობა მოიპოვა. ეს იყო განსაკუთრებული ემოცია, რომელიც, რამდენი წელიც არ უნდა გავიდეს, ადამიანს არასდროს უნელდება. თუმცა, დამოუკიდებლობა არ არის ერთჯერადი აქტი - პირიქით, ამით იწყება ახალი ეტაპი და თითოეული დღე ჩვენი ქვეყნისთვის დამოუკიდებლობის განმტკიცებისა და გაძლიერების დღეა. ჩემი წარმოდგენით, სამშობლოს სიყვარული სწორედ ეს არის - როდესაც ყოველდღიური შრომით კიდევ უფრო აძლიერებ შენს ქვეყანას. ვფიქრობ, ბოლო წლებში ჩვენი ქვეყნის წინსვლა, ეკონომიკური გაძლიერება და თითოეული ახალი ინფრასტრუქტურული პროექტი არის წინ გადადგმული ნაბიჯი დამოუკიდებლობისა და სუვერენიტეტის გამყარებისკენ,“ — განაცხადა რევაზ სოხაძემ.

მინისტრის თქმით, საქართველოს მთავრობა და ინფრასტრუქტურის სამინისტრო ყველაფერს აკეთებენ იმისთვის, რომ ქვეყნის დამოუკიდებლობას საფრთხე არასდროს დაემუქროს და საქართველო კიდევ უფრო გაძლიერდეს.

რევაზ სოხაძემ ასევე ისაუბრა ახალციხეში დაგეგმილ ღონისძიებებზე, სადაც ინფრასტრუქტურის სამინისტრო დამოუკიდებლობის დღისადმი მიძღვნილ ღონისძიებაზეა წარმოდგენილი.

„იცით, რომ საქართველოს მთავრობის ადმინისტრაციის ორგანიზებით, დამოუკიდებლობის დღის ღონისძიებები მთელი ქვეყნის მასშტაბით იმართება. სხვადასხვა სამინისტრო რეგიონებშია წარმოდგენილი, ხოლო ინფრასტრუქტურის სამინისტრო წელს ახალციხეში, ისტორიული ციხესიმაგრის ტერიტორიაზე მასპინძლობს მოსახლეობას. ძალიან ბევრი საინტერესო აქტივობაა დაგეგმილი. ჩვენი სამინისტროს სპეციფიკიდან გამომდინარე, გადავწყვიტეთ, განსაკუთრებული ყურადღება მოძრაობის უსაფრთხოების წესებზე გაგვემახვილებინა. ბავშვებისთვის ამ მიმართულებით იქნება საინტერესო, შემეცნებითი ატრაქციონები. ასევე, ყურადღება დაეთმობა შრომის უსაფრთხოების თემასაც. იმედი გვაქვს, დღევანდელი დღე ახალციხელებისთვის და ქალაქის სტუმრებისთვის სასიამოვნოდ ჩაივლის - ისინი გაერთობიან და, ამავდროულად, ბავშვები გართობასთან ერთად შემეცნებით პროგრამაშიც მიიღებენ მონაწილეობას,“- აღნიშნა მინისტრმა.

რევაზ სოხაძის განცხადებით, დამოუკიდებლობის განმტკიცებისთვის განსაკუთრებით მნიშვნელოვანია ერთობა.

„მინდა, ამ დღეს საქართველოს ყველა მოქალაქე ერთად ვზეიმობდეთ ჩვენი ქვეყნის დამოუკიდებლობას. ერთობა და ერთიანობა არის ის ძალა, რომელიც ჩვენს ქვეყანას აძლიერებს,“ - განაცხადა ინფრასტრუქტურის მინისტრმა.