მთავარიბიზნესიეკონომიკათეგეტა ბიზნესისთვის
ტურიზმიფინანსებიჯანდაცვასპორტი
ტექნოლოგიებიმსოფლიოპოლიტიკაგანათლება
სტარტაპებიWEEKENDბიზნეს მრჩეველისაზოგადოება
კიბერუსაფრთხოებამოსაზრებაფინანსებიპოდკასტები
ეკონომიკური ფორუმიInsider სიუჟეტიBusiness Insider Georgia X TVყველა ვიდეო
ყველა სიახლე
ბიზნეს მედია - Bank of Georgia
flag
AMD 7187.1
-0.0065
flag
AZN 1.5242
-0.0004
flag
CNY 38.826
-0.0067
flag
EUR 2.8423
-0.0124
flag
GBP 3.3968
-0.0191
flag
KZT 56.84
-0.0077
flag
TRY 0.0513
-0.0001
flag
USD 2.5926
-0.0007
news banner

გოგა გულორდავამ პარლამენტში ტელეკომ ბაზარზე კონკურენციის განვითარების მიზნით მიმდინარე კომპლექსურ კვლევაზე ისაუბრა

news image
mbc image

კომუნიკაციების კომისიის თავმჯდომარემ გოგა გულორდავამ საქართველოს პარლამენტის ეკონომიკური პოლიტიკისა და ადამიანის უფლებათა დაცვისა და სამოქალაქო ინტეგრაციის კომიტეტების ერთობლივ სხდომაზე ComCom-ის 2025 წლის საქმიანობის ანგარიში წარადგინა. ანგარიშის წარდგენისას მან ტელეკომ ბაზარზე კონკურენციის განვითარების მიზნით მიმდინარე კომპლექსური კვლევის 2025 წლის ეტაპი და კვლევით განსაზღვრული შემდგომი მიმართულებები მიმოიხილა.

ანგარიშის მიხედვით, 2025 წელს გაგრძელდა კომპლექსური კვლევის მეორე ეტაპი, რომელიც საკომუნიკაციო ფიზიკური ინფრასტრუქტურის ბაზრის ანალიზს მოიცავდა. კვლევის პირველადი შედეგების მიხედვით, საკომუნიკაციო/საკანალიზაციო არხებთან დაშვების საბითუმო ბაზარზე მნიშვნელოვანი საბაზრო ძალაუფლების მქონე ოპერატორი არსებობს. ანგარიშში ასევე აღნიშნულია, რომ ამ ბაზარზე მოქმედი მარეგულირებელი ჩარჩო კონკურენციის განვითარებისთვის საკმარისი არ არის და დამატებითი რეგულაციებია საჭირო.

„ფიზიკური ინფრასტრუქტურის ბაზრის კვლევა ორ ცალკეულ სეგმენტს - საკომუნიკაციო/საკანალიზაციო არხებზე დაშვებასა და ბოძებზე დაშვებას მოიცავდა. პირველადი შედეგების მიხედვით, საკომუნიკაციო/საკანალიზაციო არხებზე დაშვების ბაზარზე ერთ-ერთი ოპერატორი პოტენციურად გამოყენებადი ინფრასტრუქტურის დაახლოებით 70%-ს ფლობს. საკომუნიკაციო ბოძებზე დაშვების ბაზარი კი კონკურენტულად იქნა მიჩნეული, რადგან ელექტრო და გარე განათების ბოძებზე დაშვება „სატელეკომუნიკაციო ინფრასტრუქტურისა და სატელეკომუნიკაციო მიზნებისთვის გამოყენებადი ფიზიკური ინფრასტრუქტურის გაზიარების შესახებ“ საქართველოს კანონით უკვე რეგულირდება.

კვლევის ფარგლებში საკომუნიკაციო/საკანალიზაციო არხებზე დაშვების საბითუმო ბაზრებზე გამოვლენილ გამოწვევებს შორის დასახელებულია ბაზარზე შესვლის მაღალი ბარიერები, კონკურენციის ნაკლებობა, ინფრასტრუქტურის დომინანტი მესაკუთრის პოზიციის გაძლიერება და არსებული რეგულაციების ნაკლები ეფექტიანობა.“ - განაცხადა კომისიის თავმჯდომარემ.

გულორდავას თქმით, კვლევის ექსპერტებმა ბაზრის ეფექტიანი რეგულირების მიზნით ComCom-ს რეკომენდაციები მისცეს. რეკომენდებული მიდგომები მოიცავს გამჭვირვალობისა და დისკრიმინაციის აკრძალვის უზრუნველყოფას, დაშვების პროცედურის სტანდარტიზაციას და კომისიისთვის დაშვების პროცესის მონიტორინგისა და საფასო რეგულირების უფრო ეფექტიანი შესაძლებლობების შექმნას.

„კომპლექსური კვლევის ფარგლებში შესწავლილია ფიქსირებული ინტერნეტ მომსახურების საცალო ბაზარზე იურიდიული პირი აბონენტებისთვის შეთავაზებული კორპორატიული პირობებიც. კვლევის ფარგლებში გამოიკვეთა იურიდიული პირებისგან ყველაზე მოთხოვნადი მომსახურებები, მათი შერჩევის მნიშვნელოვანი ფაქტორები და სირთულეები, რომლებსაც მომხმარებლები პროვაიდერის შერჩევის პროცესში აწყდებიან.“ - განაცხადა გოგა გულორდავამ.

ანგარიშის თანახმად, კვლევის ფარგლებში მიღებული ინფორმაციის საფუძველზე გამოვლენილი გამოწვევების გადაჭრის გზები კვლევის დასრულების შემდეგ შეფასდება. ComCom-ი იმსჯელებს ექსპერტების შეფასებებსა და რეკომენდაციებზე და, საჭიროების შემთხვევაში, შესაბამის გადაწყვეტილებებს მიიღებს.

„კვლევით განსაზღვრული რეგულაციის მიზანია, ბაზრის მცირე მოთამაშეებსა და ახალ კომპანიებს საქმიანობის განვითარების და ალტერნატიული საკომუნიკაციო შეთავაზებების შექმნის შესაძლებლობა მიეცეთ. ამასთან, ქსელის მფლობელ ოპერატორებს საკუთარი ქსელის შესაძლებლობების უკეთ ათვისებისა და დამატებითი შემოსავლის მიღების საშუალება უნდა ჰქონდეთ. საბოლოოდ ეს მომხმარებლებისთვის უფრო მრავალფეროვანი სატელეკომუნიკაციო მომსახურებების ხელმისაწვდომობასა და ეკონომიკის სხვადასხვა დარგის ციფრულ ტრანსფორმაციას შეუწყობს ხელს.“ - განაცხადა კომისიის თავმჯდომარემ.

ComCom-ის თავმჯდომარის თქმით, კომპანიებისთვის შეთავაზებული მაღალი ხარისხის მომსახურებების საცალო ბაზრის კვლევის შედეგებიდან გამომდინარე, 2026 წელს დაგეგმილია შესაბამისი საბითუმო ბაზრის - ფიქსირებულ ქსელზე მაღალი ხარისხის წვდომის - ანალიზი. კომპლექსური კვლევის მეორე ეტაპის ფარგლებში შესასწავლ ბაზრებთან დაკავშირებით ComCom-ი დაინტერესებულ მხარეებთან კონსულტაციებს გამართავს და კომპანიებისგან მიღებული უკუკავშირის განხილვის შემდეგ შესაბამის გადაწყვეტილებებს მიიღებს.

ამასთან, ანგარიშის წარდგენისას აღინიშნა, რომ კომპლექსური კვლევის ფარგლებში დაწყებულია კიდევ ორი საბითუმო ბაზრის შესწავლა: IP ტრანზიტის, ე.წ. გლობალური და ლოკალური ინტერნეტ კავშირის საბითუმო ბაზრისა და მაგისტრალური და დასახლებებს შორის არსებული, ე.წ. Backhaul გამოყოფილი არხების საბითუმო ბაზრის. ამ ბაზრების შესწავლა და შედეგების შესაბამისად მარეგულირებელი ჩარჩოს განახლება განსაკუთრებით მნიშვნელოვანია ფიქსირებული ქსელის მცირე და საშუალო ოპერატორებისთვის.

გულორდავას განცხადებით, კვლევის პირველი ეტაპის შედეგად მიღებული გადაწყვეტილებების აღსრულების ფარგლებში, ComCom-ი გეგმავს ფიქსირებულ და მობილურ ქსელზე დაშვების ტარიფების გაანგარიშებას. ასევე გაგრძელდება მუშაობა ფიქსირებულ და მობილურ ქსელზე დაშვების მსურველებსა და ქსელის ოპერატორებთან ოფერტების პირობებზე, რათა პირობები ორმხრივად სასარგებლო და დაშვება რეალურად განხორციელებადი იყოს.

banner image news banner
ნინო ჭანტურია ავტორი
LIVE
news banner

დღის ტოპ 10 სიახლე











სხვა სიახლეები

საზოგადოება
image 24-25 ნოემბერს დასავლეთ საქართველოს მიმართულებით ბუნებრივი გაზის უსაფრთხო და უწყვეტი ტრანსპორტირების უზრუნველსაყოფად, მაგისტრალურ გაზსადენზე მასშტაბური ტექნიკური სამუშაოები განხორციელდება - საქართველოს გაზის ტრანსპორტირების კომპანია

22.11.2026.12:50

საქართველოს გაზის ტრანსპორტირების კომპანია განცხადებას ავრცლეებს, რომელსაც Business Insider Georgia უცვლელად გთავაზობთ: ,,24-25 ნოემბერს დასავლეთ საქართველოს მიმართულებით ბუნებრივი გაზის უსაფრთხო და უწყვეტი ტრანსპორტირების უზრუნველსაყოფად, მაგისტრალურ გაზსადენზე მასშტაბური ტექნიკური სამუშაოები განხორციელდება.
საგურამო-ქუთაისის მაგისტრალური გაზსადენის 33.8 - 54.0 კმ-ებს შორის მონაკვეთზე დაგეგმილია ახლადაშენებული 20 კილომეტრიანი მილსადენის მოქმედ მაგისტრალურ მილსადენში მიერთების ( შეჭრის) სამუშაოები, რის გამოც 2026 წლის 24 ნოემბრის 04:00 საათიდან 25 ნოემბრის 10:00 საათამდე, ბუნებრივი აირის მიწოდება შეუწყდებათ აღმოსავლეთ საქართველოს შემდეგი მუნიციპალიტეტებისა და მათ შემადგენლობაში შემავალი სოფლების მომხმარებლებს: კასპის, გორის, ქარელის, ხაშურისა და ბორჯომის მუნიციპალიტეტებს, ასევე დაბა ბაკურიანის მომხმარებლებს.
ამასთან, ბუნებრივი გაზის მიწოდება შეუწყდებათ დასავლეთ საქართველოს მიმართულებით მდებარე ყველა მუნიციპალიტეტის ქალაქებისა და სოფლების მომხმარებლებს, კერძოდ: საჩხერის, ჭიათურის, ხარაგაულის, ზესტაფონის, ამბროლაურის, ქუთაისის, წყალტუბოს, ბაღდათის, სამტრედიის, აბაშის, სენაკის, ხობის, ზუგდიდის, წალენჯიხის, ფოთის, ლანჩხუთის, ჩოხატაურისა და ოზურგეთის მუნიციპალიტეტებს, აგრეთვე აჭარის რეგიონს.
გარდა ამისა, საზოგადოების წინასწარი ინფორმირების მიზნით აღვნიშნავთ, რომ 2026 წლის ბოლომდე დაგეგმილია აღმოსავლეთ-დასავლეთის მაგისტრალური გაზსადენის ქობულეთის განშტოების ახლადაშენებული 25-კილომეტრიანი მონაკვეთის მოქმედ ქსელთან მიერთების მასშტაბური სამუშაოები, რაც აუცილებელ ტექნიკურ ღონისძიებებს საჭიროებს. აღნიშნული სამუშაოები აჭარის რეგიონში უწყვეტ გაზმომარაგებას უზრუნველყოფს.
სამუშაოების დასრულება ხელს შეუწყობს დასავლეთ საქართველოს მიმართულებით ბუნებრივი გაზის უსაფრთხო და სტაბილურ მიწოდებას, გაზსადენის ინფრასტრუქტურის კიდევ უფრო გაუმჯობესებას, რის შედეგადაც მაგისტრალურ მილსადენზე ავარიული გათიშვების რისკები ფაქტობრივად განულდება. მილსადენები, საქართველოს ნავთობისა და გაზის კორპორაციამ თანამედროვე ტექნოლოგიებისა და სტანდარტების დაცვით ააშენა. პროექტები გაზის სატრანსპორტო ინფრასტრუქტურის განახლებისა და მოდერნიზაციის მნიშვნელოვანი ნაწილია. მათი მიზანი ქსელის საიმედოობისა და უსაფრთხოების გაზრდა და მეტი დასახლების გაზიფიცირების ხელშეწყობაა.
მსგავსი მასშტაბისა და ტექნიკური სირთულის პროექტების განხორციელება მხოლოდ სამშენებლო სამუშაოების შესრულებას არ გულისხმობს. პროცესს წინ უძღვის კომპლექსური ტექნიკური მომზადება, საინჟინრო გადაწყვეტების დამუშავება და შესაბამისი საპროექტო და ტექნიკური დოკუმენტაციის მომზადება, ასევე სხვადასხვა საორგანიზაციო და უსაფრთხოების საკითხის უზრუნველყოფა. შესაბამისად, სამუშაოების თარიღი განისაზღვრა აუცილებელი ტექნიკური და მოსამზადებელი პროცესების გათვალისწინებით. ამასთან, გადაწყვეტილების მიღებისას მნიშვნელოვანი ფაქტორი იყო 24 ნოემბრის მეტეოროლოგიური პირობებიც, რათა გაზმომარაგების დროებითი შეზღუდვის პერიოდში მოსახლეობისთვის შესაძლო დისკომფორტი მაქსიმალურად შემცირდეს.
სამუშაოების დასრულების შემდეგ, 25 ნოემბრის 10:00 საათიდან, ბუნებრივი გაზის მიწოდება ეტაპობრივად აღუდგებათ გათიშული გაზგამანაწილებელი სადგურების მომხმარებლებს.
ბოდიშს გიხდით შექმნილი დროებითი დისკომფორტისთვის", - აღნიშნულია განცხადებაში. 

საქართველოს ეკონომიკური ფორუმი

Powered by Business Insider Georgia

ვრცლად
economic forum

სიახლეების გამოწერა