გუდავაძე-პატარკაციშვილის ფონდისა და „გორგიას“ პარტნიორობის ფარგლებში შექმნილი დეკორატიული მებაღეობის პროფესიული საგანმანათლებლო პროგრამის პირველი ნაკადის სასწავლო პროცესი 2026 წლის 29 ივნისს ოფიციალურად დაიწყო.

პროგრამა, რომელიც „გორგია აკადემიაში“ ხორციელდება, მონაწილეებს აძლევს შესაძლებლობას, 100%-იანი დაფინანსებით დაეუფლონ დეკორატიული მებაღეობის თანამედროვე სტანდარტებს. სასწავლო კურსი 9 კვირის განმავლობაში გაგრძელდება და მოიცავს როგორც თეორიულ, ისე პრაქტიკულ სწავლებას.

პროგრამის ფარგლებში სტუდენტები სწავლობენ დეკორატიული მცენარეების სისტემატიკასა და კლასიფიკაციას, შრომის უსაფრთხოების ნორმების დაცვით სამუშაო გარემოს ორგანიზებას, ასევე შიდა და გარე სივრცეებში დეკორატიული მცენარეების დარგვასა და მოვლას.

სწავლის მნიშვნელოვანი ნაწილი პრაქტიკულ გამოცდილებას ეთმობა. აგვისტოს ბოლომდე დაგეგმილია გასვლითი აქტივობები „გორგია აკადემიის“ პარტნიორ კომპანიებსა და სანერგეებში, სადაც მოსწავლეები ადგილზე გაეცნობიან სამებაღეო ინდუსტრიის თანამედროვე პრაქტიკას, პროფესიონალების სამუშაო პროცესს.

პროგრამა მიზნად ისახავს დეკორატიული მებაღეობის სფეროში კონკურენტული კადრების მომზადებას, რომლებიც თანამედროვე მოთხოვნების შესაბამისად შეძლებენ სხვადასხვა ტიპისა და სირთულის სამუშაოების შესრულებას როგორც შიდა, ისე გარე სივრცეებში.

აღნიშნული ინიციატივა გუდავაძე-პატარკაციშვილის ფონდისა და „გორგიას“ თანამშრომლობის შედეგია და წარმოადგენს განათლებისა და ბიზნესის წარმატებული პარტნიორობის მაგალითს, რომელიც საქართველოში პროფესიული განათლების განვითარებასა და დასაქმების შესაძლებლობების ზრდას უწყობს ხელს.

გპფ ერთ-ერთი პირველი კერძო ფონდია საქართველოში, რომელიც 2017 წლიდან საგანმანათლებლო პროექტებს აფინანსებს. ფონდის ფილანთროპია 6,5 მილიონ ლარს აღემატება, ხოლო მისი ჩართულობით საქართველოში უკვე 65-ზე მეტი საგანმანათლებლო პროექტი განხორციელდა.

„გორგია“ ამიერკავკასიაში ყველაზე დიდი ჰიპერმარკეტების ქსელია, რომელმაც 2024 წელს „გორგია აკადემია“ შექმნა. მას უკვე 300-ზე მეტი კურსდამთავრებული ჰყავს. აკადემიაში ხელმისაწვდომია 7 სასწავლო კურსი, საქართველოში სამ ქალაქში: თბილისში, ბათუმში და ზუგდიდში. კურსდამთავრებულს გადაეცემათ საერთაშორისოდ აღიარებული სერტიფიკატები.