ისტორიული კონკა ძალიან მალე განახლებული სახით დაბრუნდება - ამის შესახებ, იუსტიციის სახლის თავმჯდომარემ ვახტანგ ჟვანიამ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„ჩვენ ორი ქორწინების სახლის მშენებლობის შესახებ დავაანონსეთ და ვისაუბრეთ თქვენთან ერთად. ეს ორივე პროექტი არის გამორჩეული ნიშანი იმისა და შედეგი იმისა, თუ როგორ შეიძლება იუსტიციის სახლმა მუნიციპალიტეტთან ერთად თანამშრომლობით დაიწყოს გამორჩეული პროექტი.

ამას იმიტომ ვუსვამ ხაზს, რომ, როგორც მესტია, ისე ბათუმი, არის შედეგი იმისა, რომ ჩვენ, შესაბამის მუნიციპალიტეტებთან და ქალაქის მერებთან ერთად, ჩამოვაყალიბეთ კონკრეტული კონცეფცია, გამოიყო ლოკაცია მშენებლობისთვის და ახლა უკვე მიმდინარეობს მზადების პროცესი.

იგივე შემიძლია ვთქვა თბილისთან მიმართებით და მადლობა მინდა გადავუხადო თბილისის მერიას, თბილისის განვითარების ფონდს, რომელთან ერთადაც უკვე დაიწყო კონკის რეაბილიტაცია. კონკა არის ისტორიული შენობა, ამიტომ ჩვენი მთავარი მიზანი იყო, რომ ის არქიტექტურული ძირითადი ნიუანსები სრულად შეგვენარჩუნებინა. ამიტომ ჩვენ მივიღებთ განახლებულ კონკას ძალიან მალე და ეს განსაკუთრებული შენობა ისევ დაიბრუნებს თავის მნიშვნელობას. დარწმუნებული ვარ, ძალიან ბევრი ქორწინება შედგება კონკის ქორწინების სახლში.

იგივე შემიძლია გითხრათ სიღნაღთან მიმართებით. თქვენ ასევე იცით, რომ სიღნაღშიც ისტორიულ შენობაშია განთავსებული ქორწინების სახლი. აქაც პროექტი მომზადებულია, საზოგადოებას ეს პროექტი წარვუდგინეთ, ასევე ყველა საექსპერტო დასკვნა მომზადებულია და ძალიან მალე დაიწყება რეაბილიტაციის პროცესი.

იგივე შემიძლია გითხრათ უზნაძის ქორწინების სახლთან მიმართებითაც. აქაც გვინდა, რომ ძალიან მალე დავიწყოთ რეაბილიტაციის პროცესი.

ყველა ეს აქტივობა, რომელზეც ჩვენ ახლა ვსაუბრობთ და რომელიც ქორწინების სახლებს და სივრცეებს შეეხება, ბუნებრივია, ორიენტირებულია იმაზე, რომ ადამიანებისთვის, არ აქვს მნიშვნელობა, ეს იქნება საქართველოს მოქალაქე თუ ჩვენი სტუმარი, ყველასთვის ეს განსაკუთრებული დღე იყოს გამორჩეულად ლამაზი.

ამ მიმართულებით მივდივართ ჩვენც და გვინდა, რომ, პირველ რიგში, რა თქმა უნდა, ინფრასტრუქტურა გვქონდეს სრულად მზად ამ ყველაფრისთვის. რა თქმა უნდა, ეს ისტორიული დღე თითოეული ადამიანისთვის ყოველთვის დასამახსოვრებელი უნდა იყოს“, - აცხადებს ვახტანგ ჟვანია.