კონკურენციისა და მომხმარებლის უფლებების დაცვის V საერთაშორისო კონფერენციის ფარგლებში eKalata.gov.ge-ის პრეზენტაცია გაიმართა
20 ნოემბერს, თბილისში, კონკურენციისა და მომხმარებლის უფლებების დაცვის V საერთაშორისო კონფერენციის ფარგლებში, საქართველოს კონკურენციისა და მომხმარებლის დაცვის სააგენტოს (GCCA) თავმჯდომარემ, ირაკლი ლექვინაძემ, მომხმარებლისთვის განკუთვნილი ციფრული პლატფორმის - eKalata.gov.ge-ის პრეზენტაცია გამართა.
პრეზენტაცია პანელური დისკუსიის - „კონკურენციისა და მომხმარებლის დაცვის ურთიერთკავშირი: ფასების გამჭვირვალობა და ინფორმირებული არჩევანი სასურსათო და საფინანსო ბაზრებზე" ფარგლებში გაიმართა.
ირაკლი ლექვინაძემ ყურადღება გაამახვილა პლატფორმის მნიშვნელობაზე მომხმარებლის ინფორმირებული არჩევანის ხელშეწყობის, ფასების გამჭვირვალობისა და ბაზარზე კონკურენტული გარემოს გაძლიერების მიმართულებით. პრეზენტაციის ფარგლებში, მიმოიხილა კონკურენციის პოლიტიკის განხორციელების შედეგები, მათ შორის, სასურსათო და ფარმაცევტულ ბაზრებზე ჩატარებული მონიტორინგისა და მომხმარებელთა ინტერესების დაცვის მიმართულებით განხორციელებული ღონისძიებები.
eKalata.gov.ge წარმოადგენს ციფრულ პლატფორმას, რომლის მიზანია მომხმარებლისთვის ბაზარზე არსებული შეთავაზებების შესახებ ინფორმაციის ხელმისაწვდომობის გაზრდა, მათი შედარების შესაძლებლობის უზრუნველყოფა და ინფორმირებული გადაწყვეტილების მიღების ხელშეწყობა.
„კონკურენციის ეფექტიანი პოლიტიკა გულისხმობს მომხმარებლის გამჭვირვალე ინფორმაციისა და სწორი არჩევანის შესაძლებლობის შექმნა. eKalata.gov.ge, სწორედ, ამ მიზანს ემსახურება - მომხმარებელს აძლევს შესაძლებლობას, უკეთ გაერკვეს ბაზარზე არსებულ შეთავაზებებში და გადაწყვეტილება ინფორმირებულად მიიღოს", - აღნიშნა ირაკლი ლექვინაძემ.
პანელური დისკუსიის ფარგლებში, გაიმართა საქართველოს ეროვნული ბანკის საბანკო ტარიფების შედარების პორტალის პრეზენტაცია, რომელიც ეროვნული ბანკის საგადახდო სისტემების დეპარტამენტის უფროსმა, ნატალია ჭყოიძემ წარადგინა. დისკუსიაში მონაწილეობდა საქართველოს პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილი, ხოლო პანელს მოდერაცია გაუწია Business Insider Georgia-სა და Economic Forum Georgia-ს დამფუძნებელმა, გიორგი აბაშიშვილმა.
შეგახსენებთ, რომ კონკურენციისა და მომხმარებლის უფლებების დაცვის V საერთაშორისო კონფერენცია 19-20 ნოემბერს, ხუთი მარეგულირებელი უწყების - GCCA-ს, საქართველოს ეროვნული ბანკის, სემეკის, დაზღვევის სახელმწიფო ზედამხედველობის სამსახურისა და კომუნიკაციების კომისიის ერთობლივი ორგანიზებით გაიმართა. წლევანდელი კონფერენცია საქართველოში კონკურენციისა და მომხმარებელთა უფლებების დაცვის პოლიტიკის 30 წლის იუბილეს მიეძღვნა და თბილისში 20-ზე მეტი ქვეყნის 40-ზე მეტ უცხოელ დელეგატს უმასპინძლა.
სხვა სიახლეები
თბილისის საკრებულოს სხდომა წუთიერი დუმილით გაიხსნა
20.11.2026.15:37
თბილისის საკრებულოს თავმჯდომარის, ზურაბ აბაშიძის, გადაწყვეტილებით, თბილისის საკრებულოში მიმდინარე სხდომა ქვემო ფონიჭალაში გაზის აფეთქების შედეგად დაღუპულთა ხსოვნის პატივსაცემად წუთიერი დუმილით გაიხსნა. საკრებულოს თავმჯდომარემ, ზურაბ აბაშიძემ და დეპუტატებმა გარდაცვლილთა ხსოვნას პატივი მიაგეს და სამძიმარი გამოთქვეს.
თბილისის საკრებულოს თავმჯდომარემ, ზურაბ აბაშიძემ, დაღუპულთა ოჯახებსა და ახლობლებს მიუსამძიმრა, დაშავებულებს კი მალე გამოჯანმრთელება უსურვა.
„ღრმა მწუხარებას გამოვთქვამ ფონიჭალაში მომხდარი ტრაგედიის გამო.
საცხოვრებელ კორპუსში მომხდარ აფეთქებას ადამიანების სიცოცხლე შეეწირა. დაღუპულთა ოჯახებსა და ახლობლებს ვუსამძიმრებ ამ უდიდეს დანაკლისს, დაშავებულებს კი გამოჯანმრთელებას ვუსურვებ“, - განაცხადა ზურაბ აბაშიძემ.
ასევე თბილისის საკრებულოს თავმჯდომარემ სამაშველო სამსახურის წარმომადგენლებს გაწეული თავდაუზოგავი შრომისთვის მადლობა გადაუხადა და განაცხადა, რომ მაშველებმა საკუთარი სიცოცხლის რისკის ფასად ბოლომდე იბრძოლეს, რათა ნანგრევებში მოყოლილი ადამიანები გადაერჩინათ.
„მადლობა სამძებრო-სამაშველო სამუშაოებში ჩართულ ყველა ადამიანს მათი გმირობისა და თავდაუზოგავი შრომისთვის“, - განაცხადა ზურაბ აბაშიძემ.