მესტიის მუნიციპალიტეტის სივრცის დაგეგმარების გეგმის პროექტის საჯარო განხილვა გაიმართა. მესტიის კულტურისა და ხელოვნების ცენტრში გამართულ შეხვედრაზე სააგენტოს წარმომადგენელმა მუნიციპალიტეტის სივრცის დაგეგმარების გეგმის პროექტი და მისი ძირითადი მიმართულებები დაინტერესებულ პირებს, პრეზენტაციის სახით წარუდგინა. მოხსენების დასრულების შემდეგ კი მათ კითხვებს უპასუხა.

მესტიის მუნიციპალიტეტის სივრცის დაგეგმარების გეგმა ეკონომიკის სამინისტროს სივრცითი და ქალაქთმშენებლობითი განვითარების სააგენტომ მესტიის მუნიციპალიტეტის მერიის მომართვის საფუძველზე შეიმუშავა. დოკუმენტის მიზანია მესტიაში უსაფრთხო, კომფორტული და თანამედროვე საცხოვრებელი გარემოს შექმნა, ბუნებისა და კულტურული მემკვიდრეობის დაცვა, ინფრასტრუქტურის გაუმჯობესება, ეკონომიკური განვითარების ხელშეწყობა და მუნიციპალიტეტის მდგრადი განვითარება.

შეხვედრას სივრცითი და ქალაქთმშენებლობითი განვითარების სააგენტოს უფროსი ზურაბ წიკლაური, მესტიის მუნიციპალიტეტის მერი კაპიტონ ჟორჟოლიანი და მესტიის მუნიციპალიტეტის საკრებულოს თავმჯდომარე მაიზერ ჯაფარიძე დაესწრნენ.

მესტიის მუნიციპალიტეტის სივრცის დაგეგმარების გეგმის პროექტის დოკუმენტაცია ხელმისაწვდომია ბმულზე: https://tinyurl.com/m43mzaax დოკუმენტაციის შესახებ წერილობითი შენიშვნები და მოსაზრებები მიიღება 28 ივლისამდე სსიპ - სივრცითი და ქალაქთმშენებლობითი განვითარების სააგენტოში, მისამართზე - ქ. თბილისი, დავით აღმაშენებლის გამზირი №154, ელ. ფოსტა: sajaro.gankhilvebi@suda.gov.ge mailto:sajaro.gankhilvebi@suda.gov.ge ან მესტიის მუნიციპალიტეტის მერიაში, მისამართზე - დაბა მესტია, სეტის მოედანი N1.