მომხმარებელთა უფლებების დაცვის კანონმდებლობა და ინსტიტუცია ჩამოყალიბდა ერთგვარ მნიშვნელოვან კერად, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას დამსაქმებელთა ასოციაციის იურიდიული კომიტეტის ხელმძღვანელმა და BV Consulting-ის მმართველმა პარტნიორმა ვახტანგ შურღაიამ განაცხადა.

„ბოლო რამდენიმე წელია, სტატისტიკა ფაქტობრივად ერთი და იმავეს აჩვენებს. ყველა წინა პერიოდთან შედარებით, განაცხადების რაოდენობა გაზრდილია, ფაქტობრივად, ორმაგდება ხოლმე.

ეს მიუთითებს, ერთის მხრივ, რომ მომხმარებელთა უფლებების დაცვის კანონმდებლობა და ინსტიტუცია ჩამოყალიბდა ერთგვარ მნიშვნელოვან კერად, სადაც მომხმარებელს, თითოეულ ჩვენთაგანს, შეუძლია თავისი პრეტენზიის წაყენება ბიზნესისთვის, შესაბამისად, და მიიღოს დასაბუთებული და სწორი პასუხი.
ეს იქცა არამხოლოდ რეპუტაციულ, არამედ უკვე ფინანსურ რისკადაც კომპანიებისთვის. აქედან გამომდინარე, კომპანიები ხშირად ცვლიან პოზიციას, პირობით ვალდებულებებს იღებენ, რათა გამოასწორონ და, შესაბამისად, არ დაარღვიონ უფლებები და ეს მნიშვნელოვანი წინ გადადგმული ნაბიჯია.

თითოეულ ჩვენთაგანს ეხება ეს. ონლაინ ვაჭრობაში იქნება თუ ფიზიკურად ვაჭრობაში, თუ ნებისმიერ სხვა მომსახურების მიღების დროს, მნიშვნელოვანია, რომ ჩვენ ვიღებდეთ იმ მომსახურებას. ბიზნესიც ასე უყურებს.

ახლა მიდის უფრო კონკურენცია - ვის უკეთესი მომსახურება აქვს, ვის უკეთესი პროდუქტი აქვს და, შესაბამისად, ეს ერთობლიობაში არამხოლოდ პროდუქტი, არამედ პროდუქტის მიწოდების გზებიც მნიშვნელოვანია ამ ეტაპზე.

ნებისმიერ ვაჭრობას, ნებისმიერ მომსახურებას ეხება. შესაბამისად, თუ სადმე თქვენი ინტერესი დაზარალდა, შეგიძლიათ მიმართოთ“, - აცხადებს ვახტანგ შურღაია.