ნათია თურნავა ცენტრალური და აღმოსავლეთ ევროპის საბანკო ზედამხედველების (BSCEE) ჯგუფის 2027 წლის თავმჯდომარედ აირჩიეს
საქართველოს ეროვნული ბანკის პრეზიდენტი ნათია თურნავა ცენტრალური და აღმოსავლეთ ევროპის საბანკო ზედამხედველების (Group of Banking Supervisors from Central and Eastern Europe - BSCEE) ჯგუფის 2027 წლის თავმჯდომარე გახდა. სებ-ის პრეზიდენტი ამ პოზიციაზე მიმდინარე წლის 27-30 მაისს მოლდოვაში გამართულ ჯგუფის 38-ე წლიურ კონფერენციაზე ერთხმად აირჩიეს.
BSCEE-ის თავმჯდომარის პოზიციას ნათია თურნავა ოფიციალურად 2026 წლის 16 დეკემბრიდან 2027 წლის 15 დეკემბრამდე პერიოდში დაიკავებს.
აღსანიშნავია, რომ საქართველოს ეროვნული ბანკი მომავალ წელს BSCEE-ის 39-ე ყოველწლიურ კონფერენციას მესამედ უმასპინძლებს, რაც ორგანიზაციაში ქვეყნის აქტიურ ჩართულობაზე მეტყველებს.
ორგანიზაციის მთავარი მიზანია წევრ ქვეყნებს შორის საბანკო ზედამხედველობის სფეროში თანამშრომლობის გაძლიერება, გამოცდილების გაზიარება და ფინანსური სტაბილურობის ხელშეწყობა.
საქართველოს ეროვნული ბანკი BSCEE-ში 2013 წლიდან გაწევრიანდა. ჯგუფი აერთიანებს 24 ქვეყნის - ავსტრიის, ჩეხეთის, ხორვატიის, თურქეთის, სომხეთის, უნგრეთის, პოლონეთის, ლატვიის, ლიეტუვის, ესტონეთის, ყაზახეთის და სხვა ქვეყნების - 25 საბანკო ზედამხედველობის ორგანოს.
BSCEE-ის წესების თანახმად, თავმჯდომარე ქვეყანა წევრი სახელმწიფოებიდან ყოველწლიურად როტაციის პრინციპით აირჩევა. საქართველო ამ პოზიციას ორჯერ - 2018 და 2022 წლებში იკავებდა.
დღის ტოპ 10 სიახლე
სხვა სიახლეები
საქართველოს ინფრასტრუქტურის სამინისტროს გაერთიანებული წყალმომარაგების კომპანია ქალაქ დუშეთსა და დაბა ჟინვალში წყალმომარაგების სისტემის მასშტაბურ პროექტს ახორციელებს
24.07.2026.13:15
საქართველოს ინფრასტრუქტურის სამინისტროს გაერთიანებული წყალმომარაგების კომპანია ქალაქ დუშეთსა და დაბა ჟინვალში წყალმომარაგების სისტემის მასშტაბურ პროექტს ახორციელებს.
პროექტის ფარგლებში რეაბილიტაცია ჩაუტარდება ჟინვალისა და სანახშირის სათავე ნაგებობებსა და რეზერვუარებს. ამასთან, მოეწყობა ახალი სათავე ნაგებობა, სატუმბი სადგური, წყალდენი და წყალმომარაგების ქსელი.
ამჟამად ქალაქ დუშეთის ნაწილს, სანახშირის სათავე ნაგებობაზე წყლის დებიტის შემცირების გამო, წყალმომარაგება შეზღუდული გრაფიკით მიეწოდება. დაბა ჟინვალში კი გაზაფხული-ზაფხულის პერიოდში წყლის ამღვრევა სატუმბი სადგურის მუშაობას აფერხებს, რაც წყალმომარაგების შეფერხებებს იწვევს.
პროექტის დასრულების შემდეგ არსებული პრობლემები სრულად აღმოიფხვრება და ქალაქ დუშეთისა და დაბა ჟინვალის 8 000-მდე ოჯახი სტაბილური, უწყვეტი, 24-საათიანი წყალმომარაგებით იქნება უზრუნველყოფილი.
პროექტი სახელმწიფო ბიუჯეტიდან ფინანსდება და მისი ღირებულება 36 მილიონ ლარზე მეტია.
თბილისის საერთაშორისო აეროპორტს უშუქობის გამო არასდროს ექმნება პრობლემა, შესაბამისად რეისებიც არ შეფერხებულა - TAV GEORGIA
24.07.2026.12:21
ახალი სასწავლო წლიდან ჩვენ გვექნება საგაკვეთილო პროცესში მობილურებით სარგებლობის შეზღუდვის კომპონენტი - გივი მიქანაძე
24.07.2026.12:20
ხევი-ვერტყვიჭალა-შორაპანის გზის 4.3 კმ-იანი მონაკვეთის პერიოდული შეკეთება მიმდინარეობს
24.07.2026.10:46
გორის მუნიციპალიტეტის სოფელ ერგნეთში ინციდენტების პრევენციისა და მათზე რეაგირების მექანიზმის (IPRM) 133-ე შეხვედრა ჩატარდა
23.07.2026.18:10
