ნათია თურნავამ სომხეთში გამართულ საერთაშორისო კონფერენციაში მიიღო მონაწილეობა
საქართველოს ეროვნული ბანკის პრეზიდენტმა ნათია თურნავამ სომხეთის ცენტრალური ბანკისა და „ბრეტონ ვუდსის ახალი კომიტეტის" (RBWC) ორგანიზებით გამართულ საერთაშორისო კონფერენციაში მიიღო მონაწილეობა.
კონფერენციის ფარგლებში ნათია თურნავა სიტყვით გამოვიდა პანელურ დისკუსიაზე - „ცენტრალური ბანკების წინაშე არსებული გამოწვევები მზარდად ფრაგმენტირებულ საერთაშორისო მონეტარულ სისტემაში". დისკუსიის მონაწილეებმა იმსჯელეს ცენტრალური ბანკების დამოუკიდებლობაზე, ინფლაციის მართვასთან დაკავშირებულ გამოწვევებზე, ასევე გეოპოლიტიკური რისკებისა და მზარდი გლობალური გაურკვევლობის გავლენაზე მონეტარულ პოლიტიკაზე.
როგორც სიტყვით გამოსვლისას სებ-ის პრეზიდენტმა აღნიშნა, საქართველომ ბოლო წლებში შეძლო როგორც მაღალი ეკონომიკური ზრდის, ისე ფასების სტაბილურობის შენარჩუნება.
„ბოლო წლების განმავლობაში საქართველომ შეძლო ფასების სტაბილურობისა და მაღალი ეკონომიკური ზრდის შენარჩუნება. ამ შედეგს საფუძვლად დაედო როგორც ეროვნული ბანკის ფრთხილი და წინმსწრები მონეტარული პოლიტიკა, ისე პასუხისმგებლიანი ფისკალური პოლიტიკა. სწორედ ასეთი კოორდინაცია ქმნის მაკროეკონომიკური სტაბილურობის, მდგრადი ეკონომიკური ზრდისა და ინვესტორთა ნდობის განმტკიცების საფუძველს", - აღნიშნა ეროვნული ბანკის პრეზიდენტმა.
ამასთან ნათია თურნავამ ხაზი გაუსვა, საქართველოს ეროვნულმა ბანკის მიერ მონეტარული პოლიტიკის განხორციელების პროცესში სცენარებზე დაფუძნებული მიდგომის დანერგვას, რაც ზრდის გადაწყვეტილებების პროგნოზირებადობასა და გამჭვირვალობას და რისკების უკეთ შეფასების შესაძლებლობას იძლევა.
დისკუსიის ფარგლებში ყურადღება გამახვილდა ინფლაციის თანამედროვე გამოწვევებზე. აღინიშნა, რომ ცენტრალურ ბანკებს სულ უფრო ხშირად უწევთ ისეთი შოკების პირობებში მუშაობა, რომლებიც ერთდროულად მოქმედებს როგორც მოთხოვნის, ისე მიწოდების მხარეზე.
„ბრეტონ ვუდსის ახალი კომიტეტის" საერთაშორისო კონფერენციაში მონაწილეობდნენ ცენტრალური ბანკების ხელმძღვანელები, საერთაშორისო სავალუტო ფონდის, მსოფლიო ბანკისა და სხვა საერთაშორისო ფინანსური ინსტიტუტების წარმომადგენლები, ასევე მსოფლიოს წამყვანი უნივერსიტეტებისა და კვლევითი ცენტრების ექსპერტები.
დღის ტოპ 10 სიახლე
სხვა სიახლეები
საგადახდო სისტემების დანერგვის წარმატებული გამოცდილების გასაზიარებლად საქართველოს ეროვნულ ბანკს სომხეთის ცენტრალური ბანკის დელეგაცია ეწვია
04.06.2026.12:10
საქართველოს ეროვნული ბანკის მიერ განხორციელებული საგადახდო ინფრასტრუქტურის მოდერნიზაციის პროექტის გამოცდილების გაზიარებისა და თანამედროვე საგადახდო სისტემების დანერგვასთან დაკავშირებული საკითხების განხილვის მიზნით, სებ-ს სომხეთის ცენტრალური ბანკის დელეგაცია ეწვია.
ორდღიანი სამუშაო შეხვედრების ფარგლებში საქართველოს ეროვნული ბანკის წარმომადგენლებმა კოლეგებს გააცნეს დროის რეალურ რეჟიმში ანგარიშსწორების (RTGS) და კლირინგის (ACH) სისტემების განახლების პროექტის განხორციელების გამოცდილება, რომელიც მიმდინარე წლის მაისში წარმატებით დასრულდა. განსაკუთრებული ყურადღება დაეთმო პროექტის დაგეგმვისა და მართვის პროცესს, სისტემის არქიტექტურას, ოპერაციულ და ფუნქციურ მოდელს, სისტემის მონაწილე ბანკებთან და ფინანსთა სამინისტროს სახაზინო სამსახურთან კოორდინაციას, ტესტირების ეტაპებსა და სისტემის რეალურ გარემოში გაშვების პროცესს.
შეხვედრების ფარგლებში მხარეებმა განიხილეს საგადახდო სისტემების განვითარების სამომავლო მიმართულებები. მათ შორის, მყისიერი გადახდების სისტემის (IPS) დანერგვა, 24/7 რეჟიმში ოპერირების უზრუნველყოფა, ISO 20022 სტანდარტის გამოყენება და განვითარების სხვა შესაძლებლობები.
საქართველოს ეროვნული ბანკის წარმომადგენლებმა სტუმრებს გაუზიარეს პროექტის განხორციელების პროცესში მიღებული გამოცდილება, ძირითადი გამოწვევები და მათ გადასაჭრელად გამოყენებული მიდგომები. ასევე წარადგინეს მნიშვნელოვანი მაგალითები და რეკომენდაციები, რომლებიც შეიძლება სასარგებლო იყოს მსგავსი მასშტაბის ინფრასტრუქტურული პროექტების დაგეგმვისა და განხორციელებისას.
ვიზიტი საქართველოსა და სომხეთის ცენტრალურ ბანკებს შორის არსებული თანამშრომლობის ფარგლებში განხორციელდა და მიზნად ისახავდა ცოდნისა და საუკეთესო პრაქტიკის გაზიარებას, რაც ხელს შეუწყობს რეგიონში თანამედროვე, უსაფრთხო და ეფექტიანი საგადახდო სისტემების განვითარებას.
