პროექტი „მე ვარ ჩემი სკოლის საარჩევნო ამბასადორი“ პილოტირების რეჟიმში წარმატებით განხორციელდა - ამის შესახებ, ცენტრალური საარჩევნო კომისიის თავმჯდომარემ გიორგი კალანდარიშვილმა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„ზოგადად, არჩევნები არ არის ერთი დღე. ხშირად არის ხოლმე გარკვეული პერცეფციები იმის თაობაზე, რომ თითქოს არჩევნები მხოლოდ არის კენჭისყრის დღე, მაგრამ რეალურად, როდესაც არჩევნები სრულდება, ბრიტანელებს აქვთ ასეთი გამონათქვამი: არჩევნები რომ სრულდება, ანუ კენჭისყრა რომ სრულდება, მეორე დღეს იწყება შემდეგი არჩევნებისთვის მზადება.

სწორედაც ჩვენ, ჩვენი მაღალი პასუხისმგებლობიდან, ჩვენი მაღალი ანგარიშვალდებულებიდან გამომდინარე, არასაარჩევნო პერიოდს ვიყენებთ მაქსიმალურად რაციონალურად იმისთვის, რომ საარჩევნო გარემოს გაუმჯობესებისა და განვითარების ხელშეწყობის მიზნით განვახორციელოთ ისეთი პროგრამები, რომელიც, ერთის მხრივ, უზრუნველყოფს ცნობიერების ამაღლებას საარჩევნო საკითხებთან დაკავშირებით და ამის მეშვეობით მეტი ადამიანის დაინტერესებას ერთი სამოქალაქო უფლებამოსილების განხორციელებასთან დაკავშირებით, რასაც ჰქვია არჩევნებში პასიური მონაწილეობა, და მეორე, არის ამის მეშვეობით ასევე ახალგაზრდების მეტად დაინტერესება საარჩევნო პროცესებში ჩართულობასთან დაკავშირებით, ისევე როგორც მათი მხრიდან ინფორმირებული არჩევანის გაკეთებასთან დაკავშირებით.

შესაბამისად, ამ მიზნით ჩვენ თვითონვე მაქსიმალურად ვტვირთავთ არასაარჩევნო პერიოდში ჩვენს თავს და ეს გამოხატული არის რით? - პირველ რიგში, 20-მდე უნივერსიტეტთან გაფორმებული მემორანდუმით, რომლის ფარგლებშიც ჩვენ აბსოლუტურად უსასყიდლოდ ვასწავლით საარჩევნო სამართლის კურსს ერთი სემესტრის განმავლობაში. მინდა აღვნიშნო, რომ დინამიკას თუ შევხედავთ, როდესაც 2010 წელს დავიწყეთ ეს პროექტი და დღეს რა გვაქვს, საგრძნობლად გაზრდილი არის დაინტერესებულ პირთა რაოდენობა ამ პროექტში ჩართვასთან დაკავშირებით.

გვაქვს დამამთავრებელი კლასის ახალგაზრდებისთვის, მოსწავლეებისთვის, სამოქალაქო განათლების ფარგლებში და განათლების სამინისტროსთან ჩვენ მჭიდროდ ვთანამშრომლობთ ამ პროექტის ფარგლებში, ისევე როგორც სხვა პროექტების ფარგლებში, რათა მაქსიმალურად მთელი ქვეყნის მასშტაბით ყოველწლიურად გავზარდოთ სკოლების რაოდენობა, სადაც ამ პროექტს შევიტანთ.
წელს, სხვათა შორის, სიახლის სახით, ჩვენი სწავლების ცენტრის მეშვეობით ჩვენ უზრუნველვყავით ახალი ინოვაციური პროექტის - „მე ვარ ჩემი სკოლის საარჩევნო ამბასადორის“ შემოტანა, რომელიც ძალიან წარმატებით, პილოტირების რეჟიმში, განხორციელდა და მე იმედს გამოვთქვამ, რომ შემდგომ სასწავლო პროცესებში ჩვენ გვექნება ამ პროექტის მეტად გაფართოების და გავრცელების შესაძლებლობა.

ამასთანავე, გვაქვს არაერთი უშუალოდ ცესკოს და ცესკოს სწავლების ცენტრის მიერ ორგანიზებული სხვადასხვა პროექტები, დაწყებული საზაფხულო ბანაკებით, ადმინისტრატორის კურსებით გაგრძელებული და ა.შ., რომლის ფარგლებშიც ჩვენ მაქსიმალურად ვცდილობთ, რომ მთელი წლის განმავლობაში მეტ ახალგაზრდას შევხვდეთ, მეტ დაინტერესებულ სამიზნე ჯგუფს შევხვდეთ და პროცესი იყოს სრულად ინკლუზიური.

ამასთანავე, ის შეხვედრები, რომელიც თქვენ აღნიშნეთ, რომ პირადად მე და ცესკოს სხვა სპიკერები და წარმომადგენლები არიან აქტიურად ჩართულები, ეს არის ახალგაზრდობის სააგენტოსთან გაფორმებული მემორანდუმის ფარგლებში პროექტი. ეს უკვე ამ საზაფხულო პროექტის ფარგლებში, ანაკლიის ბანაკის ციკლიდან, ყვარლის, ახლა დმანისი ემატება ამ ყველაფერს, სადაც ათასობით ახალგაზრდას ვხვდებით და ვუზიარებთ მათ ინფორმაციას ყველა იმ აქტუალური და მნიშვნელოვანი საარჩევნო საკითხების შესახებ, რომელიც დგას თანამედროვე არჩევნების დღის წესრიგში.

მაგრამ, ამასთანავე, ყველაზე მნიშვნელოვანი არის ის, რომ ამ შეხვედრების ფარგლებში, ამ უშუალო კომუნიკაციისა და ღია კომუნიკაციის ფარგლებში, ჩვენ გვაქვს შესაძლებლობა, რომ მათთვის საინტერესო საკითხებზე ვისაუბროთ, ანუ ის კითხვები, რომელიც საზოგადოებაში არის დაგროვებული არჩევნებთან დაკავშირებით, ის წუხილები, მათ შორის, დიდი სიამოვნებით ვისმენთ რეკომენდაციებისა და უკუკავშირს მათი მხრიდან.

მინდა აღვნიშნო, რომ ფაქტობრივად არ არსებობს შეხვედრა ახალგაზრდებთან, რომელიც მაღალი ინტერაქციით არ გამოირჩევა, მაღალი ჩართულობით არ გამოირჩევა და არ იყოს ორმხრივად სასარგებლო. მაღალი ჩართულობა არის ერთ-ერთი მთავარი ინდიკატორი იმისა, რომ ეს შეხვედრები არის სწორ დროს, სწორ სამიზნე ჯგუფებთან და, რა თქმა უნდა, ეს როგორც მათთვის არის ხელშემწყობი თვალსაწიერის გაფართოების თვალსაზრისით და ცნობიერების ამაღლების თვალსაზრისით, ისევე როგორც ჩვენთვისაც უკუკავშირის მიღების მხრივ“, - აცხადებს გიორგი კალანდარიშვილი.