გარემოს დაცვისა და სოფლის მეურნეობის მინისტრმა დავით სონღულაშვილმა, ერევანში, ბიოლოგიური მრავალფეროვნების შესახებ კონვენციის მხარეთა კონფერენციის მე-17 შეხვედრის (CBD COP17) ფარგლებში, სომხეთის რესპუბლიკის გარემოს დაცვის მინისტრ ჰამბარძუმ მატევოსიანთან შეხვედრა გამართა.

მხარეებმა საქართველოსა და სომხეთს შორის გარემოსდაცვითი თანამშრომლობის პრიორიტეტები, ბიომრავალფეროვნების დაცვის, ტრანსსასაზღვრო წყლების მონიტორინგის და კლიმატის ცვლილებასთან ადაპტაციის საკითხები განიხილეს.

„საქართველოსა და სომხეთს შორის ისტორიული მეგობრობა და სტრატეგიული პარტნიორობა მყარ საფუძველს ქმნის გარემოსდაცვით სფეროში თანამშრომლობის კიდევ უფრო გასაძლიერებლად. ჩვენს ქვეყნებს საერთო გამოწვევები აქვთ ბიომრავალფეროვნების დაცვის, წყლის რესურსების მართვისა და კლიმატის ცვლილებასთან ადაპტაციის მიმართულებით“, - განაცხადა დავით სონღულაშვილმა.

შეხვედრაზე მხარეებმა ყურადღება გაამახვილეს საქართველოს, სომხეთისა და აზერბაიჯანის მონაწილეობით რეგიონული გეოპარკების ერთობლივი სისტემის შექმნის ინიციატივაზე, რომლის განხორციელებაზეც საქართველო გაეროს განვითარების პროგრამასა (UNDP) და შესაბამის პარტნიორებთან ერთად მუშაობს.

ასევე აღინიშნა 2025 წლის დეკემბერში საქართველოსა და სომხეთის გარემოსდაცვითი მონიტორინგის შესაბამის უწყებებს შორის გაფორმებული მემორანდუმის მნიშვნელობა, რომელიც ხრამი-დებედას ტრანსსასაზღვრო მდინარის აუზს ეხება. მხარეებმა მზადყოფნა გამოთქვეს, ხელი შეუწყონ მემორანდუმის ეფექტიან განხორციელებას და გააძლიერონ თანამშრომლობა წყლის რესურსების მონიტორინგისა და ინფორმაციის გაცვლის მიმართულებით.

შეხვედრაზე ასევე განიხილეს კლიმატის ცვლილების საკითხები და ამ მიმართულებით თანამშრომლობის გაღრმავების შესაძლებლობები. ყურადღება გამახვილდა გამოცდილების გაზიარებისა და ერთობლივი ინიციატივების განხორციელების მნიშვნელობაზე.