ინფრასტრუქტურის მინისტრმა რევაზ სოხაძემ ქვეშეთი–კობის მაგისტრალური გზის პროექტის მნიშვნელობაზე, მშენებლობის მიმდინარეობასა და ხარისხის კონტროლზე ისაუბრა.

„ქვეშეთი-კობის გზა ჩვენი ქვეყნისთვის სტრატეგიულად მნიშვნელოვანი და, საინჟინრო თვალსაზრისით, ერთ-ერთი ყველაზე რთული და საინტერესო პროექტია. მისი დასრულების შემდეგ თბილისიდან სტეფანწმინდამდე მგზავრობის დრო დაახლოებით საათ-ნახევრამდე შემცირდება, მნიშვნელოვნად გაუმჯობესდება გუდაურის მიმართულებით გადაადგილება და პროექტი ხელს შეუწყობს ქვეყნის სატრანზიტო ფუნქციის შემდგომ განვითარებას“, - განაცხადა რევაზ სოხაძემ.

მინისტრის თქმით, პროექტის მთავარი ბენეფიციარი მოსახლეობაა და სწორედ ამიტომ მნიშვნელოვანია, საზოგადოებას ჰქონდეს სრული და ობიექტური ინფორმაცია როგორც პროექტის მიმდინარეობის, ისე მშენებლობის პროცესში გამოვლენილი საკითხების შესახებ.

„ეს გზა შენდება ჩვენი მოსახლეობისთვის და ქვეყნისთვის. ამიტომ მნიშვნელოვანია, როდესაც პროექტზე ვსაუბრობთ, ერთმანეთისგან გავმიჯნოთ მშენებლობის მიმდინარე სამუშაო პროცესი და საბოლოო მიღება-ჩაბარება. ბუნებრივია, მედიის მხრიდან კრიტიკული კითხვები უნდა არსებობდეს, მაგრამ დასკვნის გაკეთებამდე საკითხი სიღრმისეულად უნდა იყოს შესწავლილი. ჩვენი მხრიდან სრული მზაობაა, ჟურნალისტებს მივაწოდოთ ინფორმაცია და ადგილზე დეტალურად გავაცნოთ მიმდინარე პროცესები - დასამალი არაფერი გვაქვს“, — აღნიშნა ინფრასტრუქტურის მინისტრმა.

რევაზ სოხაძემ პროექტის კონტრაქტორთან არსებულ გამოწვევებზეც ისაუბრა და აღნიშნა, რომ სამინისტროსა და საავტომობილო გზების დეპარტამენტს კონტრაქტორთან აქვს შენიშვნები როგორც სამუშაოების ვადებთან, ისე ცალკეულ შემთხვევებში ხარისხთან დაკავშირებით.

„ვერ ვიტყვით, რომ კონტრაქტორთან პრობლემები არ გვაქვს. გვქონდა გარკვეული შეფერხებები ვადებთან დაკავშირებით, ასევე გვქონდა და გვაქვს შენიშვნები ხარისხთან მიმართებით. ამ საკითხებზე კონტრაქტორთან აქტიური კომუნიკაცია მიმდინარეობს და ჩვენი ამოცანაა, ყველა არსებული პრობლემა სამუშაო პროცესში სათანადოდ მოგვარდეს. გვაქვს მოლოდინი, რომ პროექტი 2028 წლის ბოლოსთვის დასრულდება“, - განაცხადა მინისტრმა.

ქვეშეთი-კობის პროექტის ფარგლებში შენდება საინჟინრო თვალსაზრისით გამორჩეული ნაგებობებიც. მათ შორისაა 166 მეტრის სიმაღლის თაღოვანი ხიდი, რომლის მშენებლობაც ამჟამად აქტიურად მიმდინარეობს.

„ეს არის უნიკალური საინჟინრო ნაგებობა - 166 მეტრის სიმაღლის თაღოვანი ხიდი, რომლის ანალოგიც რეგიონში არ არსებობს. ასეთი მასშტაბისა და სირთულის პროექტის განხორციელებისას განსაკუთრებით მნიშვნელოვანია მუდმივი კონტროლი და ყველა გამოვლენილ საკითხზე დროული რეაგირება“, - აღნიშნა რევაზ სოხაძემ.

მინისტრის განცხადებით, ხარისხის კონტროლის მიმართულებით სამინისტრო ერთნაირი პრინციპით მოქმედებს ყველა პროექტზე, მათ შორის საერთაშორისო კონტრაქტების შემთხვევაშიც.

„ჩვენ არ ვამბობთ, რომ ინფრასტრუქტურულ პროექტებში პრობლემები არ არსებობს. პირიქით - სადაც პრობლემა გამოვლინდა, ამაზე საჯაროდ ვისაუბრეთ და შესაბამისი რეაგირებაც მოვახდინეთ. რამდენიმე პროექტთან დაკავშირებით, მათ შორის ხარისხის საკითხებზე, სისხლის სამართლის საქმეებიც აღიძრა. ამიტომ საუბარი იმაზე, თითქოს სამინისტრო ან საავტომობილო გზების დეპარტამენტი რაიმეს დამალვას ცდილობს, საფუძველს მოკლებულია. ჩვენი მიდგომაა, პრობლემა გამოვლინდეს, შეფასდეს და მასზე შესაბამისი რეაგირება განხორციელდეს“, - განაცხადა ინფრასტრუქტურის მინისტრმა.

რევაზ სოხაძის თქმით, ინფრასტრუქტურული პროექტების ხარისხი საქართველოს მთავრობისთვის ერთ-ერთი მთავარი პრიორიტეტია და ამ მიმართულებით კონტროლი კიდევ უფრო გაძლიერდება.

„ძალიან კარგია, რომ ხარისხის საკითხით საზოგადოებაც და მედიაც აქტიურად ინტერესდება. ჩვენ ამ თემაზე საუბარი დიდი ხნის წინ დავიწყეთ და ყოველდღიურად ვმუშაობთ იმისთვის, რომ ქვეყანაში აშენებული ინფრასტრუქტურა იყოს ხარისხიანი და უსაფრთხო. ამ პროცესში ღია ვართ თანამშრომლობისთვის, ინფორმაციის მიწოდებისა და ყველა კითხვაზე პასუხის გასაცემად“, - განაცხადა რევაზ სოხაძემ.