თბილისის საკრებულოს თავმჯდომარემ, ზურაბ აბაშიძემ, საკრებულოში მიმდინარე სხდომაზე რუსთაველის გამზირის რეაბილიტაციის შესახებ ისაუბრა. მისი თქმით, რუსთაველის გამზირის სრული რეაბილიტაცია არის ისტორიული მნიშვნელობის პროექტი, რომელსაც განსაკუთრებული მნიშვნელობა აქვს დედაქალაქისთვის. როგორც ზურაბ აბაშიძემ განაცხადა, რუსთაველის გამზირი მხოლოდ თბილისის მთავარი გამზირი არ არის და ის ქვეყნის ისტორიის, კულტურისა და იდენტობის ერთ-ერთი მთავარი სიმბოლოა. ზურაბ აბაშიძის თქმით, სწორედ ამიტომ მისი განახლება განსაკუთრებული პასუხისმგებლობითა და მაღალი სტანდარტებით ხორციელდება.

თბილისის საკრებულოს თავმჯდომარემ პროექტის პირველ ეტაპზე დაგეგმილი სამუშაოების შესახებაც ისაუბრა. მისი თქმით, სამუშაოების ფარგლებში სრულად განახლდება მიწისქვეშა ინფრასტრუქტურა; შეიცვლება წყალმომარაგების, სანიაღვრე და გაზმომარაგების ქსელები და დამონტაჟდება თანამედროვე მიწისქვეშა ნარჩენშემკრები ურნები. მისივე თქმით, ამ პროცესში მნიშვნელოვანი წვლილი შეაქვს „ჯორჯიან უოთერ ენდ ფაუერს“, რომელიც 12.5 მილიონი ლარის ინვესტიციას ახორციელებს. ზურაბ აბაშიძის განცხადებით, კომპანიის მიერ 5 კილომეტრზე მეტი სიგრძის წყალმომარაგებისა და წყალარინების ქსელი სრულად განახლდება, მოეწყობა ახალი საკვანძო ჭები და თანამედროვე სახანძრო ჰიდრანტები. საკრებულოს თავმჯდომარის თქმით, პროექტის ფარგლებში ასევე განახლდება საგზაო ინფრასტრუქტურა, ტროტუარები, გარე განათება, გამწვანება, მოეწყობა თანამედროვე მიწისზედა ქვეითთა გადასასვლელები და სრულად ადაპტირებული გარემო შეიქმნება შეზღუდული შესაძლებლობის მქონე პირებისთვის.

„რა თქმა უნდა, გვესმის, რომ ასეთი მასშტაბის სამუშაოები დროებით გარკვეულ დისკომფორტს შექმნის როგორც თბილისელების, ისე დედაქალაქის სტუმრებისთვის. თუმცა, დარწმუნებული ვარ, ეს არის აუცილებელი ნაბიჯი, რომლის შედეგსაც ჩვენი ქალაქი ათწლეულების განმავლობაში მიიღებს. რუსთაველის გამზირის განახლება ნიშნავს ისტორიული მემკვიდრეობის შენარჩუნებას, თანამედროვე ურბანული გარემოს შექმნას და კიდევ ერთ მნიშვნელოვან ინვესტიციას თბილისის მომავალში“, - განაცხადა ზურაბ აბაშიძემ.