საქართველოში არსებული წყალმომარაგებისა და ენერგეტიკული ობიექტების მმართველი ჰოლდინგ-კომპანია GGU-ს საკრედიტო რეიტინგი S&P-მ „BB“ დონემდე გააუმჯობესა.

„Georgia Global Utilities-ის (GGU) ოპერაციებიდან მიღებული სახსრების (FFO) თანაფარდობა ვალთან ბოლო სამი წლის განმავლობაში 20%-ზე მაღლა ნარჩუნდებოდა, რაც მხარდაჭერილი იყო მესამე მარეგულირებელი პერიოდის ტარიფების ზრდით, რომელმაც შემოსავალი დაახლოებით 30%-ით გაზარდა.

ჩვენ ველით, რომ FFO/ვალი მიმდინარე მარეგულირებელი პერიოდის დარჩენილ წელსაც დაახლოებით 20%-ის დონეზე შენარჩუნდება და 2027 წლიდან მოყოლებული მნიშვნელოვნად 20%-ზე მაღლა იქნება, რაც განპირობებული იქნება როგორც რეგულირებადი წყლის ბიზნესიდან, ასევე არარეგულირებადი ელექტროენერგიის ბიზნესიდან გაზრდილი შემოსავლებით. ამ მიზეზით, ჩვენ გავზარდეთ Georgia Global Utilities JSC-ის გრძელვადიანი ემიტენტის საკრედიტო რეიტინგი „BB-“ დონიდან „BB“-მდე და იგივე ცვლილება მივანიჭეთ მის მოქმედ ობლიგაციებს” - წერს S&P.

S&P ელის 2027-2029 წლებში საბაზო სცენარით კომპანიის შემოსავლების ზრდას (როგორც რეგულირებადი წყლის, ისე არარეგულირებადი ელექტროენერგიის ბიზნესებიდან), რაც შემოსავლების მოცულობას დაახლოებით 380–410 მილიონ ლარამდე გაზრდის.

ცნობისთვის, Georgia Global Utilities (GGU) თბილისის, მცხეთისა და რუსთავის წყალმომარაგების სისტემებისა (gwp) და ენერგეტიკული ობიექტების მმართველი კომპანიაა. GGU ფლობს ოთხ ჰიდროელექტროსადგურს 149 MWh ჯამური დადგმული სიმძლავრით: თეთრიხევიჰესს, ბოდორნაჰესს, საგურამოჰესსა და ჟინვალის ჰიდროელექტროსადგურს, რომელიც საქართველოში სიდიდით მეორეა წყალსაცავიან ჰიდროელექტორსადგურებს შორის.

2022 წლიდან კომპანიის 80%-იანი წილის მფლობელია ევროპის წყალმომარაგების ბაზრის ერთ-ერთი უმსხვილესი წარმომადგენელი ესპანური კომპანია FCC Aqualia, ხოლო 20%-ს საინვესტიციო ჰოლდინგი "საქართველოს კაპიტალი" ფლობს.