ნოროვირუსით ინფიცირებულ პაციენტებს შორის მხოლოდ ჩვენი საჯარო ბაღების აღსაზრდელები არ ყოფილან. გვაქვს ინფორმაცია, რომ სხვა ინფიცირებული პაციენტებიც იყვნენ, - განაცხადა თბილისის მერის მოადგილე კახა აბულაძემ საზოგადოებრივი მაუწყებლის გადაცემაში „დღის თემა“ სტუმრობისას.

მისი თქმით, ყველა შესაბამისი უწყების კვლევებით დასტურდება, რომ საბავშვო ბაღებში რამდენიმე დღის წინ ბავშვების ავადობა ნოროვირუსმა გამოიწვია.

„ავადობის შემთხვევების გამოვლენისთანავე, ჩვენ საგანგებო რეჟიმით მუშაობა დავიწყეთ, ბაღების მართვის სააგენტოსთან ერთად. პროცესში ჩაერთო დაავადებათა კონტროლის ეროვნული ცენტრი, სურსათის ეროვნული სააგენტო და ყველა შესაბამისი უწყება. მინდა ყველას გადავუხადო მადლობა ოპერატიულობისთვის.

ავადობის მიზეზი უკვე დადგენილია. დაავადებათა კონტროლის ეროვნულმა ცენტრმა პირველი განცხადება 20 სექტემბერს გაავრცელა და ბავშვების ავადობა მაღალი ალბათობით დაუკავშირა ნოროვირუსს. უკვე 22 სექტემბერს კი ნოროვირუსი დადასტურდა. პარალელურად, ამავე დღეს სურსათის ეროვნულმა სააგენტომ გაავრცელა ინფორმაცია, რომ 80-მდე ნიმუშია შესწავლილი, კვლევები გრძელდება და ეს საკვებთან დაკავშირებული ინტოქსიკაცია არ ყოფილა“, - აღნიშნა კახა აბულაძემ.

მისივე თქმით, საბავშვო ბაღებში შემოდგომის პერიოდში ვირუსები აქტიურად ვრცელდება ხოლმე. რაც შეეხება კონკრეტულ ვირუსს, ბაღებში გარედან არის შესული.

„ფაქტია, რომ ეს ვირუსი საბავშვო ბაღებში გარედან არის შესული. ამ ეტაპზე საგამოძიებო პროცესი მიმდინარეობს. ჩვენც ველოდებით დასრულებას, რომ გავიგოთ, კონკრეტულად საიდან მოხდა ინფიცირება. ჩვენ კარგად გვესმის მშობლებისაც, რადგან ეს თემა ჩვენთვისაც განსაკუთრებით სენსიტიური იყო, სანამ მიზეზი დადგინდებოდა. ერთმნიშვნელოვნად საქმე გვაქვს ვირუსთან, რაც ჩვენ არ გვიკვირს. როგორც გაზაფხულზე, ასევე სააღმზრდელო წლის დაწყებასთან ერთად, საბავშვო ბაღებში ვირუსული პროცესები აქტიურდება ხოლმე. ამ შემთხვევაშიც სააღმზრდელო პროცესი ორი დღის განახლებული იყო, როცა ავადობის ფაქტები დადასტურდა“, - განაცხადა თბილისის მერის მოადგილემ. 

მისივე ინფორმაციით, ნოროვირუსის შემთხვევები არა მხოლოდ საჯარო ბაღების აღსაზრდელებში, არამედ სხვა ასაკობრივ პაციენტებშიც გამოვლინდა.

„დღეის მდგომარეობით, ბავშვებში გართულება არ გვქონია და აბსოლუტური უმრავლესობა გაწერილია სახლებში. ჩვენი აღსაზრდელები რამდენიმე დღეში საჯარო ბაღებში დაბრუნდებიან. აქვე ისიც უნდა აღინიშნოს, რომ ინფიცირებულ პაციენტებს შორის მხოლოდ ჩვენი საჯარო ბაღების აღსაზრდელები არ ყოფილან. გვაქვს ინფორმაცია, რომ სხვა ინფიცირებული პაციენტებიც იყვნენ.

ამ დღეების განმავლობაში ჩვენ ძალიან ბევრ სპეციალისტთან, მათ შორის პრაქტიკოს ექიმთან გვაქვს აქტიური საუბრები და ეს არ არის მხოლოდ საბავშვო ბაღებთან დაკავშირებული პროცესი. მაგალითად, გუშინ პედიატრმა თემურ მიქელაძემაც აღნიშნა, რომ ნოროვირუსის შემთხვევები მოსახლეობის სხვა ჯგუფებშიც დასტურდება, თუმცა ჰოსპიტალიზაცია არ მომხდარა, რადგან, ვირუსის სიმპტომატიკიდან გამომდინარე, სხვადასხვა ასაკობრივ ჯგუფში სხვადასხვანაირად ვლინდება“, - განაცხადა კახა აბულაძემ.